டெல்லியை மையமாகக் கொண்டு செயல்பட்டு வரும், தங்களை “கரப்பான் பூச்சிகள்” (Cockroaches) என்று அழைத்துக் கொள்ளும் இளைஞர் அமைப்பின் உரிமைப் போராட்டம் தற்போது நாடு முழுவதும் பேசுபொருளாக மாறியுள்ளது. இந்த அமைப்பின் அண்மைய போராட்டம் டெல்லியில் பெரும் கவனத்தை ஈர்த்துள்ளது.
போராட்டம் நடைபெற்ற ஜந்தர் மந்தர் பகுதி முழுவதும் இளைஞர்களால் நிரம்பியிருந்தது. குறிப்பாக ஜென்சி (Gen Z) தலைமுறையைச் சேர்ந்த ஆயிரக்கணக்கான இளைஞர்கள் அங்கு திரண்டிருந்தனர்.
இந்த அமைப்பின் முக்கிய முகமாகக் கருதப்படும் அபிஜீத் திப்கே, அமெரிக்காவின் வாஷிங்டனில் இருந்து டெல்லி வந்த உடனேயே நேரடியாக போராட்டக் களத்திற்குச் சென்றார். அவரை வரவேற்கவும் ஆதரவு தெரிவிக்கவும் ஏராளமான இளைஞர்கள் அங்கு குவிந்திருந்தனர்.
அபிஜீத் திப்கே மட்டுமல்லாமல், பிரபல சுற்றுச்சூழல் ஆர்வலர் சோனம் வாங்சுக் உள்ளிட்ட பல்வேறு சமூக செயற்பாட்டாளர்களும் இந்தப் போராட்டத்திற்கும் , இளைஞர்களின் கோரிக்கைகளுக்கு ஆதரவு தெரிவித்தனர்.
இந்தப் போராட்டம் ஒரு நாள் நிகழ்வாக முடிவடையாது என்றும், இது நாடு முழுவதும் பரவக்கூடிய மக்கள் இயக்கமாக வளரக்கூடும் என்றும் போராட்டக்காரர்கள் தெரிவித்தனர். தங்களை “கரப்பான் பூச்சிகள்” என்றே அழைக்க வேண்டும் என்றும், அதையே தங்களின் அடையாளமாக ஏற்றுக்கொண்டுள்ளதாகவும் அவர்கள் கூறினர்.
அவர்களின் கருத்துப்படி, சமூக ஊடகங்களில் அதிக நேரம் செலவிடும், வேலைவாய்ப்பு மற்றும் கல்வி சார்ந்த பிரச்சினைகளால் பாதிக்கப்பட்ட இளைஞர்களின் குரலாகவே இந்த இயக்கம் உருவாகியுள்ளது.
போராட்டத்தின் முக்கிய கோரிக்கையாக, நீட் தேர்வு மற்றும் பிற தேசிய அளவிலான தேர்வுகளில் நடைபெற்றதாகக் கூறப்படும் முறைகேடுகள் முன்வைக்கப்பட்டன. இந்த விவகாரங்களுக்கு அரசியல் மற்றும் நிர்வாக ரீதியாக பொறுப்பேற்க வேண்டியவர்கள் பதிலளிக்க வேண்டும் என்றும், மத்திய கல்வி அமைச்சர் தர்மேந்திர பிரதான் பதவி விலக வேண்டும் என்றும் போராட்டக்காரர்கள் வலியுறுத்தினர்.
தேர்வு முறைகேடுகளால் மாணவர்களின் எதிர்காலம் பாதிக்கப்பட்டுள்ளதாகவும், பல மாணவர்கள் கடுமையான மனஅழுத்தத்திற்கு ஆளாகியுள்ளதாகவும் அவர்கள் குற்றஞ்சாட்டினர்.
இந்தப் போராட்டத்தில் டெல்லி மட்டுமல்லாமல், பீகார், உத்தரப் பிரதேசம், தமிழ்நாடு, மேற்குவங்கம், மகாராஷ்டிரா, குஜராத் உள்ளிட்ட பல மாநிலங்களில் இருந்து இளைஞர்கள் பங்கேற்றனர். காஷ்மீர் முதல் கன்னியாகுமரி வரை, கொல்கத்தா முதல் மும்பை வரை பல்வேறு பகுதிகளைச் சேர்ந்தவர்கள் ஒன்றிணைந்து தங்களது குரலை வெளிப்படுத்தினர்.
இது ஒரு தொடக்கம் மட்டுமே என்றும், எதிர்காலத்தில் இளைஞர்களின் உரிமைகள் தொடர்பான பல்வேறு பிரச்சினைகளுக்காக தொடர்ந்து குரல் கொடுக்கப் போவதாகவும் அவர்கள் தெரிவித்தனர்.
இந்த அமைப்புக்கு சமூக ஊடகங்களில் தொடர்ந்து ஆதரவு அதிகரித்து வருவதாகவும், பல லட்சம் பேர் உறுப்பினர்களாக இணைந்து வருவதாகவும் கூறப்படுகிறது. இதையடுத்து, இவர்களைப் பற்றிய பல்வேறு விமர்சனங்களும் சமூக ஊடகங்களில் பரவி வருகின்றன.
அதற்கு பதிலளித்த போராட்டக்காரர்கள், தாங்களே உண்மையான இந்தியர்கள் என்றும், தங்களின் போராட்டம் மாணவர்கள் மற்றும் இளைஞர்களின் நலனுக்காக மட்டுமே என்றும் தெரிவித்தனர்.
முதலில் இந்தப் போராட்டத்திற்கு அனுமதி வழங்கப்படவில்லை. நாடாளுமன்றம் அருகே போராட்டம் நடத்தத் திட்டமிடப்பட்டிருந்த நிலையில், பின்னர் ஜந்தர் மந்தரில் போராட்டம் நடத்த காவல்துறை அனுமதி வழங்கியது.
இந்தப் போராட்டம் மேலும் பெரிதாக மாறக்கூடும் என்ற சூழ்நிலையில், அதிகாரிகள் சமரச அணுகுமுறையை எடுத்ததாகக் கூறப்படுகிறது.
நீட் உள்ளிட்ட தேர்வு முறைகேடுகளுக்கு எதிராக நடைபெற்ற இந்தப் போராட்டத்தில், கரப்பான் பூச்சி முகமூடிகள் அணிந்து, கைகளில் பூக்களை ஏந்திய ஆயிரக்கணக்கான இளைஞர்களும் மாணவர்களும் வினோதமான முறையில் தங்களது எதிர்ப்பைப் பதிவு செய்தனர்.
மத்திய கல்வி அமைச்சர் தர்மேந்திர பிரதான் ராஜினாமா செய்ய வேண்டும் அல்லது பதவியிலிருந்து நீக்கப்பட வேண்டும் என போராட்டக்காரர்கள் 7 நாட்கள் கெடு விதித்துள்ளனர். அந்தக் காலக்கெடுவுக்குள் நடவடிக்கை எடுக்கப்படாவிட்டால், அடுத்த சனிக்கிழமை முதல் ஜந்தர் மந்தரில் தொடர் போராட்டங்கள் நடத்தப்படும் என அமைப்பின் நிறுவனர் அபிஜீத் திப்கே எச்சரித்துள்ளார்.
மொத்தத்தில், டெல்லியில் நடைபெற்ற இந்த இளைஞர் போராட்டம் நாடு முழுவதும் கவனத்தை ஈர்த்துள்ளதுடன், எதிர்காலத்தில் பல்வேறு இடங்களில் தொடரும் ஒரு பெரிய இளைஞர் இயக்கமாக உருவெடுக்கக்கூடும் என்ற கருத்து பரவலாக பேசப்பட்டு வருகிறது.