முதல்வர்’ விஜய் மற்றும் அவரது மகன் ஜேசன் சஞ்சய் இடையே அண்மைக் காலமாக குடும்ப ரீதியான கருத்து வேறுபாடுகள் நிலவுவதாக பல்வேறு வதந்திகள் சமூக வலைத்தளங்களில் பரவி வந்த நிலையில், தற்போது இருவரது படங்களும் திரையரங்குகளில் நேரடியாக மோதவிருப்பது கோலிவுட்டில் பெரும் கவனத்தை ஈர்த்துள்ளது.
தமிழக முதல்வராகப் பொறுப்பேற்றுள்ள நடிகர் விஜய்யின் இறுதித் திரைப்படமான ‘ஜனநாயகன்’ நீண்டகால தணிக்கைக் குழு தாமதங்களுக்குப் பிறகு, இறுதியாக 2026 ஜூலை மாதத்தில் திரையரங்குகளில் வெளியாகத் தயாராகியுள்ளது.
அதே நேரத்தில், விஜய்யின் மகன் ஜேசன் சஞ்சய் இயக்குநராக அறிமுகமாகும் ‘சிக்மா’ திரைப்படம் 2026 ஜூலை 31ஆம் தேதி வெளியாகும் என அதிகாரப்பூர்வமாக அறிவிக்கப்பட்டுள்ளது. இதன் மூலம் தந்தையின் கடைசிப் படமும், மகனின் முதல் படமும் ஒரே மாதத்தில் வெளியாகும் சூழல் உருவாகியுள்ளது.
எச். வினோத் இயக்கத்தில் விஜய் நடித்துள்ள ‘ஜனநாயகன்’ அரசியல் பின்னணியிலான அதிரடித் திரைப்படமாக உருவாகியுள்ளது. ஜனவரி மாதத்தில் வெளியாகத் திட்டமிடப்பட்டிருந்த இப்படம், தணிக்கை தொடர்பான தாமதங்களால் ஒத்திவைக்கப்பட்டு தற்போது ஜூலை மாத வெளியீட்டுக்குத் தயாராகியுள்ளது.
மறுபுறம், சந்தீப் கிஷன் மற்றும் ஃபரியா அப்துல்லா நடித்துள்ள ‘சிக்மா’ திரைப்படத்தை லைகா புரொடக்ஷன்ஸ் நிறுவனம் தயாரித்துள்ளது. புதையல் தேடலை மையமாகக் கொண்ட ஹெய்ஸ்ட் த்ரில்லர் வகை படமான இது, 2026 ஜூலை 31ஆம் தேதி உலகம் முழுவதும் வெளியாகவுள்ளது.
இதனால், ஒரே மாதத்தில் அப்பாவின் கடைசிப் படமும், மகனின் முதல் படமும் வெளியாக இருப்பது கோலிவுட்டில் பெரும் எதிர்பார்ப்பை ஏற்படுத்தியுள்ளது.
இதற்கிடையில், விஜய் மற்றும் அவரது மனைவி சங்கீதா விவாகரத்து பெறவுள்ளதாகவும், ஜேசன் சஞ்சய் தனது தந்தையை இன்ஸ்டாகிராமில் அன்ஃபாலோ செய்துவிட்டார் என்றும், தனது பெயருக்குப் பின்னால் தந்தையின் ‘V’ என்ற இனிஷியலுக்குப் பதிலாக தாயாரின் பெயரைக் குறிக்கும் ‘S’ என்ற எழுத்தைப் பயன்படுத்தி வருகிறார் என்றும் பல்வேறு வதந்திகள் சமூக வலைத்தளங்களில் பரவின.
ஆனால், ஜூலை 1ஆம் தேதி ஜேசன் சஞ்சய் பேசிய பழைய வீடியோ ஒன்று இணையத்தில் வெளியாகி வைரலானது. அதில், சிறுவயதில் பள்ளிக்குச் சென்றபோது, தனது தந்தை விஜய்யின் தீவிர ரசிகரான சீரியல் நடிகர் ஜெமினி மணி, தன்னை வேடிக்கையாக ‘கடத்த’ முயன்ற சம்பவத்தை நகைச்சுவையுடனும் நெகிழ்ச்சியுடனும் பகிர்ந்து கொண்டார்.
அந்த வீடியோவில், தனது தந்தை விஜயைப் பற்றி ஜேசன் சஞ்சய் இயல்பாகவும் பாசத்துடனும் பேசியிருப்பது ரசிகர்களின் கவனத்தை ஈர்த்துள்ளது. இதன் மூலம், தந்தை – மகன் இடையே பெரிய அளவில் விரிசல் எதுவும் இல்லை என்றும், அண்மையில் பரவிய தகவல்கள் வெறும் வதந்திகளாக இருக்கலாம் என்றும் ரசிகர்கள் சமூக வலைத்தளங்களில் கருத்து தெரிவித்து வருகின்றனர்.