தலைமை தேர்தல் ஆணையர் ஞானேஷ் குமாருக்கு பத்ம பூஷன் விருது வழங்கப்பட வேண்டும் என மேற்கு வங்க பாஜக தலைவர் சமிக் பட்டாச்சார்யா அதிரடி கிளப்பியுள்ளார்.
செய்தியாளர்களிடம் பேசிய சமிக் பட்டாச்சார்யா, ”மாநிலத்தில் அமைதியான முறையில் தேர்தலை நடத்தியதற்கும், வாக்காளர் பட்டியலைத் திருத்தியதற்கும் அவருக்கு குறைந்தபட்சம் பத்ம பூஷன் விருது வழங்கப்பட வேண்டும். காங்கிரஸ் கட்சிக்குள்ளேயே உள்ள தலைவர்கள் கூட காந்தியின் வார்த்தைகளை பெரிதாக எடுத்துக்கொள்வதில்லை.
உண்மை என்னவென்றால், காங்கிரஸ் கட்சியே ராகுல் காந்தியின் வார்த்தைகளுக்குச் செவிசாய்ப்பதில்லை. அவர்கள் அவரைப் பெரிதாக எடுத்துக்கொள்வதில்லை. ஞானேஷ் குமார் குறைந்தபட்சம் பத்ம பூஷன் விருதையாவது பெற வேண்டும். மேற்கு வங்கத்தில் தேர்தல் நடத்தப்பட்ட விதமும், நிர்வாக நடவடிக்கைகளும் பாராட்டுக்குரியது. வாக்காளர்கள் எந்தவித வன்முறையோ அச்சமோ இன்றி தங்கள் வாக்குரிமையைப் பயன்படுத்த முடிந்தது.
இவ்வளவு நீண்ட காலத்திற்குப் பிறகு, எந்தவிதமான அச்சுறுத்தல் சூழலும் நிலவவில்லை என்பதில் மேற்கு வங்க மக்கள் மகிழ்ச்சியடைகின்றனர். கொலைச் சம்பவங்கள் எதுவும் நடைபெறவில்லை. மக்கள் உண்மையில் வாக்களிக்க அனுமதிக்கப்பட்டனர். அதுமட்டுமின்றி, ஒரு எல்லை மாநிலமான இங்கு, வாக்காளர் பட்டியலிலிருந்து வங்கதேச ஊடுருவல்காரர்களின் பெயர்களை நீக்கும் நடவடிக்கையை ஞானேஷ் குமார் முன்னெடுத்தார். தேர்தல் முறைகேடுகளைத் தடுக்க எடுக்கப்பட்ட நடவடிக்கைகளை மக்கள் பெரிதும் பாராட்டுகின்றனர். மேற்கு வங்க மக்கள் இதுபோன்ற ஒரு தேர்தலை அரிதாகவே கண்டிருக்கிறார்கள். எனவே, மேற்கு வங்கப் பொது மக்கள் ஞானேஷ் குமாருக்கு முழு ஆதரவு அளிக்கின்றனர்.
இதற்கிடையில், பல மாநிலங்களில் தேர்தல் ஆணையத்திற்கு எதிரான காங்கிரஸ் போராட்டங்கள் தீவிரமடைந்த நிலையில், தலைமைத் தேர்தல் ஆணையர் ஞானேஷ் குமார் ராஜினாமா செய்யக் கோரி, இந்திய இளைஞர் காங்கிரஸ் டெல்லியில் உள்ள ரைசினா சாலையில் இருந்து ஜந்தர் மந்தர் வரை பேரணி நடத்தியது. பீகாரின் பாட்னாவில், ஞானேஷ் குமாருக்கு எதிராகப் போராடி, அவரது ராஜினாமாவைக் கோரிய காங்கிரஸ் தொண்டர்களைக் கலைக்க காவல்துறை நீர்த்தாரைகளைப் பயன்படுத்தியது. பஞ்சாபிலும் போராட்டங்கள் நடைபெற்றன. போராட்டத்தின்போது சில போராட்டக்காரர்கள் காவல்துறை வாகனங்கள் மீது ஏறினர்.
ஜம்மு காஷ்மீர், அசாம், உத்தரகாண்ட், மேற்கு வங்கம், உத்தரப் பிரதேசம், இமாச்சலப் பிரதேசம் மற்றும் மணிப்பூர் உள்ளிட்ட பல மாநிலங்களிலும் காங்கிரஸ் தொண்டர்கள் போராட்டத்தில் ஈடுபட்டனர். இமாச்சலப் பிரதேசத்தின் சிம்லாவில், தேர்தல் ஆணையம் தொடர்பான பிரச்சினைகளுக்காக காங்கிரஸ் தலைவர்களும் தொண்டர்களும் மாநில தேர்தல் ஆணைய அலுவலகத்திற்கு வெளியே போராட்டத்தில் ஈடுபட்டனர். போராட்டத்தின்போது, போராட்டக்காரர்கள் மாநில தேர்தல் ஆணைய அலுவலகத்திற்கு வெளியே இருந்த அதிகாரப்பூர்வ பலகையில் கருப்பு மை பூசினர்.