இந்திய பேட்மிண்டன் நட்சத்திரம் பி.வி. சிந்து, தனது விளையாட்டு வாழ்க்கையின் மிகவும் கடினமான காலகட்டத்தில் கிரிக்கெட் வீரர் விராட் கோலியுடன் நடத்திய ஒரு தொலைபேசி உரையாடல், தனக்கு மிகப்பெரிய மன உறுதியையும் புதிய நம்பிக்கையையும் அளித்ததாக நெகிழ்ச்சியுடன் தெரிவித்துள்ளார். அந்த ஆலோசனையின் பலனாகவே, தற்போது ஜப்பான் ஓபனில் தனது முதல் BWF சூப்பர் 750 பட்டத்தை வென்று வரலாற்றுச் சாதனை படைத்துள்ளதாகவும் அவர் கூறியுள்ளார்.
இரண்டு முறை ஒலிம்பிக் பதக்கம் வென்றுள்ள பி.வி. சிந்து, கடந்த இரண்டு ஆண்டுகளாக தொடர் தோல்விகள், காலில் ஏற்பட்ட ஸ்டிரெஸ் பிராக்சர் (Stress Fracture) காயம், பாரிஸ் ஒலிம்பிக்கில் ஆரம்ப சுற்றிலேயே வெளியேறிய ஏமாற்றம் உள்ளிட்ட காரணங்களால் கடுமையான மன அழுத்தத்தையும் பார்ம் இழப்பையும் சந்தித்து வந்தார்.
அந்த இக்கட்டான சூழலில், விளையாட்டு வாழ்க்கையின் ஏற்றத் தாழ்வுகளை நன்கு அறிந்த விராட் கோலியை சிந்து தொடர்புகொண்டதாக கூறப்படுகிறது. சில நிமிடங்களிலேயே கோலி பதிலளித்ததுடன், மறுநாளே பெங்களூரில் சிந்து மற்றும் அவரது கணவர் வெங்கட தத்த சாயை நேரில் சந்தித்து நீண்ட நேரம் ஆலோசனை வழங்கியதாகவும் தெரிவிக்கப்பட்டுள்ளது.
அப்போது, “பதக்கங்களையும் கோப்பைகளையும் வெல்ல வேண்டும் என்ற அழுத்தத்தில் இருந்து வெளியே வாருங்கள். முதலில் பேட்மிண்டனை ரசித்து விளையாடிய அந்த ஆரம்பகால மகிழ்ச்சியை மீண்டும் கண்டுபிடியுங்கள்” என்று கோலி அறிவுறுத்தியதாக சிந்து தெரிவித்துள்ளார்.
மேலும், “எப்போதும் விட்டுக்கொடுக்காதே, சிந்து” என்ற கோலியின் வார்த்தைகள் தனது சிந்தனையையே முழுமையாக மாற்றியதாகவும் அவர் கூறியுள்ளார்.
இதுகுறித்து சிந்து மேலும் பேசுகையில், “நாங்கள் என்ன பேசினோம் என்பது எப்போதும் எங்களுக்குள்ளேயே இருக்கும். அவர் அதிகமாகப் பேசவில்லை. ஆனால் அவர் கூறிய ஒவ்வொரு வார்த்தையும் எனக்குள் ஆழமான தாக்கத்தை ஏற்படுத்தியது” என்று நெகிழ்ச்சியுடன் தெரிவித்தார்.
இதையடுத்து, டோக்கியோ மெட்ரோபாலிட்டன் ஜிம்னாசியத்தில் நடைபெற்ற ஜப்பான் ஓபன் இறுதிப்போட்டியில், உலகத் தரவரிசையில் முன்னணி வீராங்கனையான ஜப்பானின் அகானே யமகுச்சியை 21-17, 21-17 என்ற நேர் செட்களில் வீழ்த்தி சிந்து சாம்பியன் பட்டத்தை கைப்பற்றினார்.
இதன் மூலம், ஜப்பான் ஓபன் 43 ஆண்டுகால வரலாற்றில் மகளிர் ஒற்றையர் பிரிவில் பட்டம் வென்ற முதல் இந்திய வீராங்கனை என்ற பெருமையை அவர் பெற்றுள்ளார்.
மேலும், தனது 31-வது வயதில் BWF சூப்பர் 750 பட்டத்தை வென்ற மிக வயதான வீராங்கனை என்ற சாதனையையும் சிந்து படைத்துள்ளார். கடந்த 19 மாதங்களில் அவர் கைப்பற்றிய முதல் சர்வதேச பட்டம் இதுவாகும்.
சிந்துவின் மீள்வரவு எளிதானதாக இருக்கவில்லை. 2025-ஆம் ஆண்டு பயிற்சியின்போது கால் விரலில் தசைநார் கிழிவு ஏற்பட்டதால், விளையாட்டு எலும்பியல் நிபுணர் டாக்டர் தின்ஷா பர்திவாலாவின் ஆலோசனையின்படி மூன்று மாதங்கள் முழுமையான ஓய்வில் இருக்க வேண்டியிருந்தது.
அதன்பிறகு, உடல் மற்றும் மன ரீதியான மீட்சிக்காக அவரது கணவர் வெங்கட தத்த சாய், அமெரிக்காவின் அட்லாண்டா நகரிலுள்ள Exos Sports Performance மையத்திற்கு அழைத்துச் சென்றார். அங்கு சிந்து தீவிர உடற்தகுதி மற்றும் தசை வலிமை பயிற்சிகளை மேற்கொண்டார்.
தனது மோசமான காலத்தைப் பற்றி பேசியபோது, விராட் கோலி தனது கிரிக்கெட் வாழ்க்கையில் நீண்ட காலம் சர்வதேச சதம் அடிக்க முடியாமல் தவித்த அனுபவத்தையும் பகிர்ந்ததாக சிந்து கூறியுள்ளார்.
“நான் ரன்களை குவிப்பதற்காக மட்டும் விளையாடுவதை நிறுத்திவிட்டு, மீண்டும் பேட்டிங் செய்வதை ரசிக்கத் தொடங்கியபோதுதான் என் இயல்பான ஆட்டம் திரும்பியது” என்று கோலி கூறிய அந்த அனுபவம், தனது விளையாட்டை அணுகும் முறையையே மாற்றியதாக சிந்து தெரிவித்துள்ளார்.
இதுகுறித்து சிந்துவின் கணவர் வெங்கட தத்த சாய் கூறுகையில், இந்த வெற்றிக்குப் பின்னால் 13 பேர் கொண்ட மருத்துவ மற்றும் விளையாட்டு அறிவியல் ஆதரவுக் குழுவின் அர்ப்பணிப்பான உழைப்பு இருப்பதாக குறிப்பிட்டார்.
இறுதிப்போட்டியில் அகானே யமகுச்சியை வீழ்த்தி சாம்பியன் பட்டத்தை வென்ற தருணத்தில், சிந்து மட்டுமல்லாமல் அவரது பயிற்சியாளர்கள் மற்றும் முழு ஆதரவுக் குழுவினரும் உணர்ச்சிவசப்பட்டு ஆனந்தக் கண்ணீர் வடித்ததாக கூறப்படுகிறது.
தொடர் தோல்விகள், காயங்கள் மற்றும் மன அழுத்தத்திலிருந்து மீண்டு, புதிய உத்வேகத்துடன் வரலாற்றுச் சாதனை படைத்துள்ள பி.வி. சிந்துவின் இந்த வெற்றி, இந்திய விளையாட்டு ரசிகர்களுக்கு புதிய நம்பிக்கையையும் உத்வேகத்தையும் அளித்துள்ளது.