உத்தரப்பிரதேச மாநிலம், ஹாபூர் மாவட்டத்தில் ஓடும் காரின் கூரை மீது நின்றுகொண்டு பணத்தை அள்ளி வீசியபடி ஆபத்தான ஸ்டண்டில் ஈடுபட்ட இளைஞரை போலீசார் கைது செய்துள்ளனர். மேலும், இந்தச் செயலுக்குப் பயன்படுத்தப்பட்ட கருப்பு நிற ஸ்கார்பியோ காரையும் பறிமுதல் செய்துள்ளனர். இந்தச் சம்பவம் தொடர்பான வீடியோ சமூக வலைத்தளங்களில் வெளியாகி பெரும் அதிர்ச்சியை ஏற்படுத்தியுள்ளது.
உத்தரப்பிரதேச மாநிலம், கர்முக்தேஷ்வர் பகுதியில் உள்ள சரூர்பூர் கிராமத்தில் இந்தச் சம்பவம் நடைபெற்றுள்ளது. இரவு நேரத்தில் வேகமாகச் சென்றுகொண்டிருந்த கருப்பு நிற ஸ்கார்பியோ காரின் கூரை மீது இளைஞர் ஒருவர் நின்றுகொண்டு, கையில் வைத்திருந்த பண நோட்டுகளைச் சாலையில் பறக்கவிட்டுள்ளார். அதே நேரத்தில், காரில் இருந்து ஆபத்தான முறையில் வானவேடிக்கை பட்டாசுகளும் தொடர்ந்து வெடிக்கச் செய்யப்பட்டுள்ளன.
பொதுவாகத் திருமண விழாக்கள் மற்றும் ஊர்வலங்களின்போது தரையில் நின்று பட்டாசுகள் வெடிக்கப்படுவது வழக்கம். ஆனால், இந்தச் சம்பவத்தில் ஓடும் காரின் உள்ளிருந்தே பட்டாசுகளை மேல்நோக்கி வெடிக்கச் செய்திருப்பது பார்ப்பவர்களை அதிர்ச்சியடைய வைத்துள்ளது.
முதலில் இந்த வீடியோ ஏதோ ஒரு தேசிய நெடுஞ்சாலையில் எடுக்கப்பட்டிருக்கலாம் எனத் தோன்றிய நிலையில், போலீசார் மற்றும் உள்ளூர் மக்கள் மேற்கொண்ட விசாரணையில், சரூர்பூர் கிராமத்தின் உள்ளே உள்ள குறுகிய சாலையில்தான் இந்தச் சம்பவம் நடைபெற்றது என்பது தெரியவந்துள்ளது.
சமூக வலைத்தளங்களில் லைக்குகள் மற்றும் பார்வைகளைப் பெறுவதற்காகவே இந்த ஆபத்தான செயல் அரங்கேற்றப்பட்டதாகக் கூறப்படுகிறது. ஓடும் காரின் கூரை மீது நின்றுகொண்டு பணத்தை வீசுவதுடன், பட்டாசுகளையும் வெடிக்கச் செய்திருப்பது சாலையில் பயணிக்கும் மற்ற வாகன ஓட்டிகளுக்கும் பொதுமக்களுக்கும் பெரும் ஆபத்தை ஏற்படுத்தும் வகையில் அமைந்துள்ளது.
இந்த வீடியோ சமூக வலைத்தளங்களில் வேகமாகப் பரவியதைத் தொடர்ந்து, ஹாபூர் மாவட்டம், கர்முக்தேஷ்வர் காவல் நிலைய போலீசார் வழக்குப் பதிவு செய்து விசாரணையைத் தொடங்கினர். தொடர்ந்து மேற்கொள்ளப்பட்ட தீவிர தேடுதல் வேட்டையில், ஸ்டண்டில் ஈடுபட்ட இளைஞரை போலீசார் கைது செய்தனர்.
விசாரணையில், கைது செய்யப்பட்ட இளைஞர் ஃபாஸ் (Faiz) என்பதும், அவர் அதே சரூர்பூர் கிராமத்தைச் சேர்ந்த ஷெர்தீன் என்பவரின் மகன் என்பதும் தெரியவந்துள்ளது. மேலும், இந்த ஸ்டண்ட் செய்வதற்குப் பயன்படுத்தப்பட்ட UP 37 AB 6810 என்ற பதிவு எண் கொண்ட கருப்பு நிற ஸ்கார்பியோ காரையும் போலீசார் மீட்டு, காவல் நிலையத்திற்குக் கொண்டு சென்று பறிமுதல் செய்துள்ளனர்.
குறிப்பாக, அக்டோபர் 29, 2026 அன்று இந்த வீடியோ சமூக வலைத்தளங்களில் வைரலானதைத் தொடர்ந்து, சில மணி நேரங்களிலேயே போலீசார் நடவடிக்கை எடுத்து சம்பந்தப்பட்ட இளைஞரைக் கைது செய்ததுடன், காரையும் பறிமுதல் செய்துள்ளனர்.
இதற்கிடையே, சமூக வலைத்தளங்களில் வெறும் லைக்குகள் மற்றும் வியூஸ்களைப் பெறுவதற்காக இதுபோன்ற ஆபத்தான செயல்களில் ஈடுபட்டு, தங்களது உயிரையும் மற்றவர்களின் உயிரையும் பணயம் வைக்க வேண்டாம் என ஹாபூர் மாவட்ட போலீசார் கடுமையாக எச்சரித்துள்ளனர். போக்குவரத்து விதிகளை மீறி, பொதுமக்களின் பாதுகாப்புக்கு அச்சுறுத்தல் ஏற்படுத்தும் வகையில் செயல்படுபவர்கள் மீது சட்டப்படி கடும் நடவடிக்கை எடுக்கப்படும் என்றும் தெரிவித்துள்ளனர்.
இந்த வீடியோவைப் பார்த்த நெட்டிசன்கள் பலரும் இளைஞரின் செயலுக்குக் கடும் கண்டனம் தெரிவித்து வருகின்றனர். குறிப்பாக, பணத்தை வீசி விளம்பரம் தேடுவதற்குப் பதிலாக உண்மையிலேயே ஏழை மக்களுக்கு உதவும் எண்ணம் இருந்திருந்தால், அந்தப் பணத்தை நேரடியாக அவர்களிடம் கொடுத்திருக்கலாம் எனப் பலரும் கருத்து தெரிவித்து வருகின்றனர்.
மேலும், மக்களின் சுயமரியாதையைப் பாதிக்கும் வகையில் பணத்தைச் சாலையில் வீசுவதும், சமூக வலைத்தளங்களில் பிரபலமடைவதற்காகப் பொதுமக்களின் பாதுகாப்பைப் பணயம் வைப்பதும் ஏற்றுக்கொள்ள முடியாத செயல் என விமர்சித்து வருகின்றனர்.
இன்ஸ்டாகிராம் ரீல்ஸ் மற்றும் சமூக வலைத்தளப் பிரபலமோகத்தால் இளைஞர்கள் தங்களது உயிருக்கு மட்டுமின்றி, சாலையில் பயணிக்கும் அப்பாவிப் பொதுமக்களின் உயிருக்கும் ஆபத்தை ஏற்படுத்தும் வகையில் செயல்படுவது கவலைக்குரிய போக்காக மாறி வருகிறது. இதுபோன்ற ஆபத்தான ஸ்டண்ட்களில் ஈடுபடுவதைத் தவிர்த்து, போக்குவரத்து விதிகளையும் பொதுமக்களின் பாதுகாப்பையும் மதித்து நடக்க வேண்டும் என்பதையே இந்தச் சம்பவம் மீண்டும் வலியுறுத்துகிறது.