‘காக்ரோச் ஜனதா கட்சி’ (CJP) தலைவர் அபிஜித் தீப்கே, டெல்லி காவல்துறையினரால் கைது செய்யப்படுவதற்கு முன்பாகப் பதிவு செய்த வீடியோ சமூக வலைத்தளங்களில் வெளியாகி பரபரப்பை ஏற்படுத்தியுள்ளது. தான் கைது செய்யப்படலாம் என்று முன்கூட்டியே கணித்த அவர், அவ்வாறு நடந்தால் போராட்டத்தை எவ்வாறு தொடர வேண்டும் என்பது குறித்து தனது ஆதரவாளர்களுக்கு வீடியோ மூலம் அறிவுறுத்தியுள்ளார்.
மும்பையிலிருந்து ஏர் இந்தியா விமானம் மூலம் டெல்லி இந்திரா காந்தி சர்வதேச விமான நிலையத்திற்கு வந்தடைந்த அபிஜித் தீப்கே, பயணிகள் அனைவரும் விமானத்திலிருந்து இறங்குவதற்கு முன்பே டெல்லி காவல்துறையினரால் கைது செய்யப்பட்டார். பெண் காவலர்கள் உட்படப் பல போலீஸார் விமானத்திற்குள் நுழைந்து அவரைக் கைது செய்தனர். அப்போது, காவல்துறையினருடன் அவர் கடுமையான வாக்குவாதத்தில் ஈடுபட்டார்.
தான், அசுதோஷ் ரங்கா, சௌரவ் தாஸ் ஆகிய மூவரும் கைது செய்யப்பட்டால், டெல்லி ஜந்தர் மந்தரில் திட்டமிடப்பட்டுள்ள CJP போராட்டத்தை அஜிங்கியா ஷிண்டே முன்னின்று நடத்துவார் என்று அபிஜித் தீப்கே தனது வீடியோவில் தெரிவித்துள்ளார்.
“நீங்கள் இந்த வீடியோவைப் பார்க்கிறீர்கள் என்றால், நாங்கள் கைது செய்யப்பட்டுவிட்டோம் என்று அர்த்தம். ஆனால், எந்தச் சூழ்நிலையிலும் இந்த இயக்கம் நின்றுவிடக் கூடாது. அனைவரும் அஜிங்கியா ஷிண்டேவுக்கு முழு ஆதரவு அளிக்க வேண்டும்” என்றும் அவர் கேட்டுக்கொண்டுள்ளார்.
இதற்கிடையே, விமானத்திற்குள் காவல்துறையினர் நுழைந்தபோது எடுக்கப்பட்ட மற்றொரு இன்ஸ்டாகிராம் நேரலைக் காணொளியும் வெளியாகியுள்ளது. அதில், “எங்களைக் கைது செய்யுங்கள்; நாங்கள் பயப்படவில்லை. இது அப்பட்டமான சர்வாதிகாரம்” என்று அபிஜித் தீப்கே காவல்துறையினருடன் வாக்குவாதத்தில் ஈடுபடுவது பதிவாகியுள்ளது. மேலும், “முன்னாள் பிரதமர் இந்திரா காந்திகூட இப்படிச் செய்யவில்லை” என்றும் அவர் கூறியதாகத் தெரிவிக்கப்படுகிறது.
கைது நடவடிக்கையின்போது பெண் காவலர்கள் அவரைச் சூழ்ந்துகொண்ட நிலையில், “தயவுசெய்து ஆண் அதிகாரிகளை முன்னால் அனுப்புங்கள்; நானும் ஓர் ஆண்தான்” என்று அவர் கூறியதாகவும் அந்தக் காணொளியில் பதிவாகியுள்ளது. இந்த வீடியோக்கள் தற்போது சமூக வலைத்தளங்களில் பரவி வருகின்றன.
வாக்காளர் பட்டியலில் குளறுபடிகள் இருப்பதாகக் குற்றஞ்சாட்டி, இந்தியத் தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்று வலியுறுத்தி, டெல்லி ஜந்தர் மந்தரில் CJP அமைப்பினர் பெரிய அளவிலான போராட்டத்தை நடத்தத் திட்டமிட்டிருந்தனர். ஆனால், இந்தப் போராட்டத்துக்குக் காவல்துறை அனுமதி மறுத்ததாகத் தெரிவிக்கப்படுகிறது.
போராட்டம் தீவிரமடைவதைத் தடுக்கும் வகையில், டெல்லியின் முக்கியப் பகுதிகளில் ஆயிரக்கணக்கான பாதுகாப்புப் படையினர் குவிக்கப்பட்டனர். சில மெட்ரோ நிலையங்களும் சந்தைகளும் மூடப்பட்டதுடன், மொபைல் இணையச் சேவைகளும் தற்காலிகமாக நிறுத்தப்பட்டதாகக் கூறப்படுகிறது. ஜந்தர் மந்தரை நோக்கி வர முயன்ற 400-க்கும் மேற்பட்ட போராட்டக்காரர்களை டெல்லி காவல்துறையினர் நள்ளிரவில் கைது செய்ததாகத் தகவல்கள் தெரிவிக்கின்றன.
மேலும், டெல்லி முழுவதும் 20,000-க்கும் மேற்பட்ட பாதுகாப்புப் படையினர் குவிக்கப்பட்டதாகவும், சுமார் 45 மெட்ரோ நிலையங்கள் மூடப்பட்டதாகவும் கூறப்படுகிறது. இதனால், டெல்லியின் பல பகுதிகளில் கடுமையான கட்டுப்பாடுகள் நிலவின.
வாக்காளர் பட்டியலின் சிறப்புத் தீவிரத் திருத்தப் பணியின்போது (SIR), சுமார் 13 கோடி மக்களின் பெயர்கள் நீக்கப்பட்டதாகவும், இதில் குளறுபடிகள் நடந்துள்ளதாகவும் CJP குற்றஞ்சாட்டியுள்ளது. பெயர்கள் நீக்கப்பட்டவர்களில் பெரும்பாலானோர் ஒரு குறிப்பிட்ட சமூகத்தைச் சேர்ந்தவர்கள் என்றும், இந்த நடவடிக்கை பிரதமர் நரேந்திர மோடி தலைமையிலான பாஜக அரசுக்குச் சாதகமாக மேற்கொள்ளப்பட்டதாகவும் அந்த அமைப்பு குற்றம் சாட்டியுள்ளது. இந்தக் குற்றச்சாட்டுகளின் அடிப்படையிலேயே தலைமைத் தேர்தல் ஆணையர் ஞானேஷ் குமார் பதவி விலகக் கோரி போராட்டம் நடத்தத் திட்டமிட்டதாகத் தெரிவிக்கப்படுகிறது.
அபிஜித் தீப்கே மட்டுமின்றி, CJP கட்சியின் முக்கியக் கொள்கைப் பரப்புச் செயலாளர் சௌரவ் தாஸ், இணை ஒருங்கிணைப்பாளர் அசுதோஷ் ரங்கா, சட்டப்பிரிவுத் தலைவர் ரத்னா சிங் மற்றும் பிரபல யூடியூபர் துருவ் ரதீ ஆகியோரும் டெல்லி காவல்துறையினரால் கைது செய்யப்பட்டுள்ளதாகத் தகவல்கள் வெளியாகியுள்ளன.
அபிஜித் தீப்கே பயணித்த அதே ஏர் இந்தியா விமானத்தில் இருந்த சக பயணி ஒருவர், செய்தி நிறுவனத்துக்கு அளித்த பேட்டியில், விமானம் தரையிறங்கிய பிறகும் பயணிகள் வெளியேற அனுமதிக்கப்படாமல் காத்திருக்க வைக்கப்பட்டதாகக் கூறியுள்ளார்.
மேலும், “முன்பகுதியில் ‘இன்குலாப் ஜிந்தாபாத்’ என்று கோஷமிட்டனர். சிலர் செய்யும் செயல்களால் ஒட்டுமொத்தப் பொதுமக்களும் அவதிப்படுகிறார்கள். வாக்காளர் பட்டியலில் தவறு இருந்தால் உச்ச நீதிமன்றம் அதைப் பார்த்துக்கொள்ளும். இவர்கள் ஏன் இப்படி ஊரையே முடக்குகிறார்கள்?” என்று அவர் ஆவேசமாகக் கேள்வி எழுப்பியுள்ளார்.
இதற்கிடையே, அபிஜித் தீப்கே கைது செய்யப்பட்டுச் சில மணி நேரங்களுக்குப் பிறகு, அவரது பாட்டி சாவித்திரிபாய் (85) உயிரிழந்ததாகச் சோகமான தகவல் வெளியானது. மகாராஷ்டிராவில் உள்ள தனது சொந்தக் கிராமத்தில் இன்று காலை 11.30 மணியளவில் அவர் காலமானதாகத் தெரிவிக்கப்பட்டுள்ளது.
காவல்துறையினர் இந்தத் தகவலை அபிஜித் தீப்கேவிடம் தெரிவித்ததாகவும், அவரது பாட்டியின் இறுதிச்சடங்கில் கலந்துகொள்ள விரும்புகிறாரா அல்லது காவலில் தொடர விரும்புகிறாரா என்பதை அவரே முடிவு செய்துகொள்ளலாம் என்று ஊடகங்களுக்குத் தகவல் கசிந்ததாகவும் கூறப்படுகிறது.
ஆனால், CJP அமைப்பினர் இதற்கு மாறாகக் குற்றஞ்சாட்டியுள்ளனர். அபிஜித் தீப்கே எங்கு வைக்கப்பட்டுள்ளார் என்பது தங்களுக்குத் தெரியவில்லை என்றும், அவருடனோ அவரது வழக்கறிஞர்களுடனோ பேசுவதற்கு அனுமதி வழங்கப்படவில்லை என்றும் அவர்கள் தெரிவித்துள்ளனர். மேலும், “இந்தச் சோகமான சூழலில்கூட காவல்துறையினர் அரசியல் செய்கிறார்கள்” என்றும் குற்றம் சாட்டியுள்ளனர்.
அபிஜித் தீப்கே எங்கு தடுத்து வைக்கப்பட்டுள்ளார் என்பது குறித்த விவரங்களை காவல்துறை இதுவரை வெளியிடவில்லை என்று CJP தரப்பினர் தெரிவித்துள்ளனர். போராட்டத்துக்கு முன்பாக முக்கிய நிர்வாகிகள் கைது செய்யப்பட்டுள்ளதும், நூற்றுக்கணக்கான போராட்டக்காரர்கள் கைது செய்யப்பட்டதாகத் தகவல்கள் வெளியாகியுள்ளதும், டெல்லியில் கடுமையான பாதுகாப்புக் கட்டுப்பாடுகள் விதிக்கப்பட்டுள்ளதும் அரசியல் வட்டாரங்களில் பரபரப்பை ஏற்படுத்தியுள்ளது.