தமிழக கோயில்களில் திமுக ஆட்சிக் காலத்தில் நடைபெற்றதாக கூறப்படும் முறைகேடுகள் மற்றும் ஊழல்களை ஒழிப்போம் என்ற வாக்குறுதியுடன் ஆட்சிக்கு வந்த தவெக அரசும், தற்போது திமுக ஆட்சியின் பாதையிலேயே பயணிப்பதாக பாஜக குற்றம்சாட்டியுள்ளது.
குறிப்பாக, திருச்செந்தூர் கோவில் அறங்காவலர் குழு நியமனம் தொடர்பாக பாஜக முன்வைத்துள்ள குற்றச்சாட்டுகள் அரசியல் வட்டாரத்தில் பரபரப்பை ஏற்படுத்தியுள்ளன.
திருச்செந்தூர் தரிசன டிக்கெட் முறைகேடு
தவெக அரசு பதவியேற்ற ஆரம்பகட்டத்தில், இந்து சமய அறநிலையத்துறை அமைச்சர் ரமேஷ், தனது அடையாளங்களை மறைத்துக்கொண்டு திருச்செந்தூர் கோவிலுக்குச் சென்று ஆய்வு செய்ததாகவும், அப்போது நடைபெற்றதாக கூறப்பட்ட தரிசன டிக்கெட் முறைகேட்டை கண்டறிந்ததாகவும் தெரிவிக்கப்பட்டது.
இதனைத் தொடர்ந்து அந்த விவகாரம் தொடர்பாக வழக்குப்பதிவு செய்யப்பட்டதுடன், சம்பந்தப்பட்டவர்கள் மீது நடவடிக்கை எடுக்கப்பட்டு சஸ்பெண்ட் செய்யப்பட்டனர். அந்த நேரத்தில் நடைபெற்ற முறைகேட்டுக்கு அப்போதைய கோவில் நிர்வாகமே காரணம் என அமைச்சர் ரமேஷ் குற்றம்சாட்டியிருந்தார்.
பழைய நிர்வாகத்தினருக்கே மீண்டும் பொறுப்பு
இந்நிலையில், முந்தைய ஆட்சிக்காலத்தில் நடைபெற்றதாக கூறப்படும் போலி தரிசன டிக்கெட் ஊழல் தொடர்பான விசாரணை தொடர்ந்து நடைபெற்று வரும் நிலையில், திமுக ஆட்சிக் காலத்தில் திருச்செந்தூர் கோவில் அறங்காவலர் குழுத் தலைவராக இருந்த நபரையே மீண்டும் தவெக அரசு நியமித்துள்ளதாக பாஜக தரப்பில் குற்றச்சாட்டு முன்வைக்கப்பட்டுள்ளது.
மேலும், அந்த பழைய அறங்காவலர் குழுவில் இடம்பெற்றிருந்த பெரும்பாலான நபர்களே மீண்டும் புதிய அறங்காவலர் குழுவிலும் பொறுப்பேற்றுள்ளதாகவும் பாஜக தரப்பில் கூறப்படுகிறது. இதனால், முந்தைய நிர்வாகத்தின் மீது முறைகேடு தொடர்பான குற்றச்சாட்டுகள் எழுந்த நிலையில், அதே நிர்வாகத்துடன் தொடர்புடையவர்களுக்கு மீண்டும் பொறுப்பு வழங்கப்பட்டிருப்பது ஏன் என்ற கேள்வியையும் பாஜக எழுப்பியுள்ளது.
இந்து அல்லாதவர்களுக்கும் பதவி
இதற்கிடையே, திருச்செந்தூர் கோவில் அறங்காவலர் குழுவில் இந்து அல்லாதவர்களும் உறுப்பினர்களாக நியமிக்கப்பட்டுள்ளதாக மற்றொரு குற்றச்சாட்டு எழுந்துள்ளது. கோவில் அறங்காவலர் குழு நியமனம் தொடர்பாக பல்வேறு கேள்விகள் எழுந்துள்ள நிலையில், இந்த நியமனங்கள் எந்த அடிப்படையில் மேற்கொள்ளப்பட்டன என்பது குறித்து முழுமையான விசாரணை நடத்தப்பட வேண்டும் என பாஜக வலியுறுத்தியுள்ளது.
மாவட்ட ஆட்சியரிடம் பாஜக புகார்
இந்த விவகாரம் தொடர்பாக தூத்துக்குடி மாவட்ட ஆட்சியரிடம் பாஜக சார்பில் புகார் அளிக்கப்பட்டுள்ளது.
திருச்செந்தூர் கோவில் அறங்காவலர் குழு நியமனம் தொடர்பான முழு விவரங்களையும் ஆய்வு செய்து, நியமன நடைமுறையில் ஏதேனும் விதிமீறல்கள் அல்லது முறைகேடுகள் நடைபெற்றுள்ளதா என்பதை விசாரிக்க வேண்டும் என அந்த புகாரில் வலியுறுத்தப்பட்டுள்ளது.
ஏற்கனவே கோவில் நிர்வாகம் தொடர்பாக முறைகேடு குற்றச்சாட்டுகள், விசாரணைகள் இருந்து வரும் நிலையில், புதிய அறங்காவலர் குழு நியமனம் குறித்தும் வெளிப்படையான விசாரணை நடத்தப்பட வேண்டும் என்பதே பாஜகவின் கோரிக்கையாக உள்ளது.
திருச்செந்தூர் கோவில் அறங்காவலர் குழு நியமனம் தொடர்பாக பாஜக முன்வைத்துள்ள இந்த குற்றச்சாட்டுகளுக்கு அரசு மற்றும் சம்பந்தப்பட்ட கோவில் நிர்வாகம் தரப்பில் என்ன விளக்கம் அளிக்கப்படும் என்பதும் தற்போது அரசியல் வட்டாரத்தில் விவாதங்களை கிளப்பி உள்ளது.