“வரலாற்றை அழிக்க முடியாது! சட்டுனு ஒரு பதிலை சொல்லுங்க – சல்மான் கானுக்கு நீதிமன்றம் நோட்டீஸ்”

பாலிவுட் நடிகர் சல்மான் கானுக்கு டெல்லி உயர்நீதிமன்றம் நோட்டீஸ் அனுப்பியுள்ளது. ‘காலா ஹிரண்: தி பேட்டில் ஃபார் லெகசி’ (Kala Hiran: The Battle for Legacy) என்ற இந்தி திரைப்படத்தின் வெளியீட்டுக்குத் தடை விதிக்கக் கோரி சல்மான் கான் தொடர்ந்த வழக்கு தொடர்பாகவே இந்த நோட்டீஸ் அனுப்பப்பட்டுள்ளது.

இந்தப் படத்தின் தயாரிப்பாளர் அமித் ஜானி, டெல்லி உயர்நீதிமன்றத்தில் மனு ஒன்றைத் தாக்கல் செய்துள்ளார். அதில், சல்மான் கான் ஏற்கனவே தனது பெயர், குரல், புகைப்படம் உள்ளிட்ட ஆளுமை உரிமைகளைப் (Personality Rights) பாதுகாக்கக் கோரி தொடர்ந்த வழக்கும், ‘காலா ஹிரண்’ திரைப்படத்தின் வெளியீட்டுக்குத் தடை கோரி அவர் தொடர்ந்துள்ள புதிய வழக்கும் ஒரே மாதிரியான விவகாரங்களை உள்ளடக்கியவை என்று வாதிட்டுள்ளார்.

ஒரே விவகாரம் தொடர்பாக இரண்டு தனித்தனி வழக்குகள் ஒரே நேரத்தில் விசாரிக்கப்படுவது இணையான விசாரணைக்கு (Parallel Litigation) வழிவகுக்கும் என்றும், இதனால் நீதிமன்றத்தின் நேரமும் வளங்களும் தேவையின்றி பயன்படுத்தப்படும் என்றும் தயாரிப்பாளர் தரப்பில் தெரிவிக்கப்பட்டுள்ளது. இதையடுத்து, சல்மான் கான் தொடர்ந்துள்ள புதிய வழக்கின் மீதான அடுத்தகட்ட நடவடிக்கைகளை ஏன் நிறுத்தி வைக்கக் கூடாது என்பதற்கு பதிலளிக்குமாறு நீதிபதி அனூப் ஜெயராம் பம்பானி சல்மான் கானுக்கு நோட்டீஸ் அனுப்பியுள்ளார்.

சல்மான் கான் தனது பெயர், குரல், புகைப்படம் உள்ளிட்ட ஆளுமை உரிமைகளைப் பாதுகாக்கக் கோரி ஏற்கனவே டெல்லி உயர்நீதிமன்றத்தில் வழக்குத் தொடர்ந்திருந்தார். இந்த வழக்கில், கடந்த 2025-ஆம் ஆண்டு டிசம்பர் 11-ஆம் தேதி சல்மான் கானுக்கு ஆதரவாக நீதிமன்றம் இடைக்காலத் தடை உத்தரவு பிறப்பித்திருந்தது. அதன்பின்னர், குறிப்பாக ‘காலா ஹிரண்: தி பேட்டில் ஃபார் லெகசி’ திரைப்படத்தை எதிர்த்து, அதன் வெளியீட்டுக்குத் தடை விதிக்கக் கோரி சல்மான் கான் தனியாக மற்றொரு வழக்கைத் தொடர்ந்தார்.

முன்னதாக, ஜூலை 27-ஆம் தேதி, சல்மான் கானின் ஆளுமை உரிமைகளை மீறும் வகையில் இருப்பதாகக் கூறப்பட்ட ‘காலா ஹிரண்’ திரைப்படத்தின் டீசர் மற்றும் சமூக வலைதளப் பதிவுகளை உடனடியாக நீக்குமாறு ஆன்லைன் தளங்களுக்கு நீதிமன்றம் உத்தரவிட்டிருந்தது. ஒரு பிரபலத்தின் நற்பெயருக்கு பாதிப்பை ஏற்படுத்தக்கூடிய டிஜிட்டல் பதிவுகள் இணையத்தில் வேகமாகப் பரவி நீண்ட காலம் நீடிக்கக்கூடும் என்பதால் இந்த நடவடிக்கை எடுக்கப்பட்டது.

தனது நற்பெயரைக் கெடுத்து, அதன் மூலம் வணிக ரீதியாக லாபம் ஈட்டுவதற்காகவே 1998-ஆம் ஆண்டு நடைபெற்ற கருப்பு மான் (Blackbuck) வேட்டை விவகாரத்தை திரைப்படக் குழுவினர் திட்டமிட்டு பரபரப்பாக்குவதாக சல்மான் கான் குற்றம்சாட்டியுள்ளார். மேலும், இந்தப் படம் தனது வாழ்க்கை வரலாற்றுப் படம் இல்லாத நிலையில், தனது ஆளுமை உரிமைகளைப் பயன்படுத்தி அதன் வெளியீட்டைத் தடுக்க முயற்சிப்பதாகவும் படக்குழு தரப்பில் எதிர்ப்பு தெரிவிக்கப்பட்டுள்ளது.

சல்மான் கான் தாக்கல் செய்த மனுவில், படத்தின் போஸ்டரில் இடம்பெறும் கதாநாயகன், சல்மான் கான் வழக்கமாக அணியும் நீலக்கல் பிரேஸ்லெட்டைப் போன்ற ஒரு பிரேஸ்லெட்டை அணிந்திருப்பதாகக் குறிப்பிட்டுள்ளார். மேலும், ராஜஸ்தான் நீதிமன்றம் சல்மான் கானை ஆயுதச் சட்ட வழக்கிலிருந்து ஏற்கனவே விடுதலை செய்துள்ள நிலையில், போஸ்டரில் இடம்பெறும் நபர் கையில் துப்பாக்கியுடன் இருப்பது போல் சித்தரிக்கப்பட்டிருப்பதும் தனது நற்பெயருக்கு பாதிப்பை ஏற்படுத்தும் நோக்கம் கொண்டது என்றும் அவர் தெரிவித்துள்ளார்.

இதற்கு மாறாக, 1998-ஆம் ஆண்டு நடைபெற்ற கருப்பு மான் வேட்டை விவகாரம் பொதுவெளியில் உள்ள ஒரு வரலாற்றுச் சம்பவம் என்றும், அந்தச் சம்பவத்தை அடிப்படையாகக் கொண்டு திரைப்படம் உருவாக்குவதை சல்மான் கான் தனது ஆளுமை உரிமைகளைப் பயன்படுத்தித் தடுக்க முடியாது என்றும் தயாரிப்பாளர் அமித் ஜானி தரப்பில் வாதிடப்பட்டுள்ளது. இந்த வரலாற்றுச் சம்பவத்தை இணையத்திலிருந்தோ அல்லது மக்களின் நினைவிலிருந்தோ ‘அழித்துவிட’ சல்மான் கானுக்கு எந்தச் சட்டப்பூர்வ உரிமையும் இல்லை என்றும் படக்குழு தெரிவித்துள்ளது.

மேலும், ‘காலா ஹிரண்’ திரைப்படம் சல்மான் கானின் வாழ்க்கை வரலாற்றுப் படம் அல்ல என்றும், பொதுவெளியில் உள்ள ஒரு சம்பவத்தை மையமாகக் கொண்டு திரைப்படம் எடுப்பதை ஆளுமை உரிமைகளை முன்வைத்து தடுக்க முடியாது என்றும் தயாரிப்பாளர் தரப்பு வாதிட்டுள்ளது.

இந்தத் திரைப்படம் இதுவரை சென்சார் போர்டின் சான்றிதழைப் பெறவில்லை என்றும், படத்தின் அதிகாரப்பூர்வ டிரெய்லர் கூட இன்னும் வெளியாகவில்லை என்றும் தயாரிப்பாளர் தரப்பில் நீதிமன்றத்தில் தெரிவிக்கப்பட்டுள்ளது. எனவே, தற்போதைய நிலையில் திரைப்படம் வெளியாகாது என்றும் தயாரிப்பாளர் அமித் ஜானி தெரிவித்துள்ளார்.

‘காலா ஹிரண்’ திரைப்படத்தை இயக்குபவர் பாரத் எஸ். ஸ்ரீநாத். தயாரிப்பாளர் அமித் ஜானி. இவர்கள் ஏற்கனவே உதய்பூரில் தையல்காரர் கன்ஹையா குமார் கொல்லப்பட்ட நிஜ சம்பவத்தை மையமாக வைத்து ‘உதய்பூர் ஃபைல்ஸ்’ (Udaipur Files) என்ற திரைப்படத்தை உருவாக்கியவர்கள். இதனால், இவர்களின் புதிய திரைப்பட முயற்சிக்கும் சல்மான் கான் தரப்பு ஆரம்பத்திலேயே எதிர்ப்பு தெரிவித்துள்ளது.

ஒரே விவகாரம் தொடர்பாக இரண்டு தனித்தனி வழக்குகள் தொடரப்பட்டுள்ளதால், புதிய வழக்கின் மீதான நடவடிக்கையை நிறுத்தக் கோரி தயாரிப்பாளர் அமித் ஜானி தாக்கல் செய்த மனுவுக்கு சல்மான் கான் பதிலளிக்க வேண்டும். இந்த மனு தொடர்பான அடுத்தகட்ட விசாரணையை டெல்லி உயர்நீதிமன்றம் டிசம்பர் 16-ஆம் தேதிக்கு ஒத்திவைத்துள்ளது