பிரேசிலில் கடந்த மூன்று மாதங்களில் 16 பேரைக் கொலை செய்ததாகக் கூறப்படும் 33 வயது ஜோர்லான் லோப்ஸ் டா சில்வா என்ற நபர், போலீசாரிடம் இருந்து தப்பிக்க பெண் வேடமிட்டு, இரண்டு வயது குழந்தையுடன் தப்பிச் செல்ல முயன்றபோது கைது செய்யப்பட்டுள்ளார். விசாரணையின்போது, தான் வாழ்நாளில் 80 பேரைக் கொலை செய்ததாக அவர் வாக்குமூலம் அளித்துள்ளதாகக் கூறப்படும் நிலையில், போலீசார் இதுவரை 16 கொலைகளை மட்டுமே அதிகாரப்பூர்வமாக உறுதிப்படுத்தியுள்ளனர்.
ஜோர்லான் லோப்ஸ் டா சில்வா மீது தற்போது 16 கொலைகள் தொடர்பாக வழக்குகள் பதிவு செய்யப்பட்டுள்ளன. மேலும், தான் 13 வயதாக இருந்தபோது தனது தந்தையைக் கொலை செய்ததாகவும் அவர் விசாரணையில் தெரிவித்துள்ளதாகக் கூறப்படுகிறது. சிறு வயது முதலே கொலைகளில் ஈடுபட்டு வந்ததாக அவர் அளித்துள்ள தகவல்களின் அடிப்படையில், அவரது பழைய குற்ற வழக்குகள் குறித்தும் போலீசார் தற்போது விசாரணை நடத்தி வருகின்றனர்.
ஒல்லியான மற்றும் மெலிந்த உடலமைப்பைக் கொண்ட சில்வாவை, உள்ளூர் மக்கள் தங்களுக்குள் “மொஸ்கிட்டோ” அதாவது “கொசு” என்று அழைத்து வந்துள்ளனர். தனது மெலிந்த உடலமைப்பைப் பயன்படுத்தி அடர்ந்த காடுகளுக்குள் சிறிய கூடாரங்களை அமைத்து, பல ஆண்டுகளாக அங்கு மறைந்து வாழ்ந்து வந்ததாகக் கூறப்படுகிறது. இதனால், ஒரு கொலைக்கும் மற்றொரு கொலைக்கும் இடையிலான தொடர்புகளைக் கண்டறிவது போலீசாருக்கு பெரும் சவாலாக இருந்துள்ளது.
இந்நிலையில், முலுங்கு பகுதியில் உள்ள பொதுச் சதுக்கம் ஒன்றில் 18 வயது இளைஞரைத் துப்பாக்கியால் சுட்டுக் கொன்ற சம்பவத்துக்குப் பிறகு, போலீசார் சில்வாவை தீவிரமாகத் தேடத் தொடங்கினர். தொடர்ந்து நடைபெற்ற தேடுதல் வேட்டையில் அவரது நடமாட்டம் குறித்து போலீசாருக்கு தகவல்கள் கிடைத்தன.
இதையடுத்து, போலீசார் இரண்டு நாட்கள் தீவிரமாகத் தேடியபோது, காட்டுக்குள் இருந்த தனது ரகசியக் கூடாரத்துக்குச் செல்ல முடியாமல் சில்வா தவித்ததாகக் கூறப்படுகிறது. போலீசாரிடம் சிக்கிவிடக் கூடாது என்பதற்காக, கருப்பு மற்றும் வெள்ளை நிறக் கோடுகள் கொண்ட ஆடையை அணிந்து, விக், கூலிங் கிளாஸ் மற்றும் நெயில் பாலிஷ் பயன்படுத்தி பெண் வேடமிட்டுள்ளார்.
தப்பிச் செல்லும்போது அவர் கையில் தூக்கிச் சென்ற இரண்டு வயது குழந்தை, அவரது சொந்தக் குழந்தையோ அல்லது உறவினரின் குழந்தையோ அல்ல என்றும் தெரிவிக்கப்பட்டுள்ளது. போலீசாரின் சந்தேகத்தைத் தவிர்ப்பதற்காக வேறு ஒருவரின் குழந்தையைத் தூக்கிக்கொண்டு தப்பிச் செல்ல அவர் முயன்றதாகக் கூறப்படுகிறது.
பெண் வேடமிட்டு இருந்தபோதிலும், அவரது உடையில் ஏற்பட்ட சிறிய மாற்றத்தால் வெளியில் தெரிந்த டாட்டூ எனப்படும் பச்சைக் குத்தலை வைத்து போலீசார் அவரை அடையாளம் கண்டுள்ளனர். இதையடுத்து, சில்வாவை போலீசார் கைது செய்தனர்.
சில்வா ஒரு பெரிய குற்றக் கும்பலைச் சேர்ந்தவர் என்று போலீசார் கூறியதாகத் தெரிவிக்கப்பட்டாலும், அந்தக் குற்றச்சாட்டை அவர் மறுத்துள்ளார். தான் குற்றவாளிகளை மட்டுமே குறிவைத்து கொலை செய்ததாகவும், அது தனது “தனிப்பட்ட போர்” என்றும் போலீசாரிடம் தெரிவித்ததாகக் கூறப்படுகிறது. எனினும், சில்வா கூறிய இந்தக் கூற்றுக்கு ஆதாரங்கள் இல்லை என்று போலீசார் தெரிவித்துள்ளனர்.
இந்த வழக்கை விசாரிக்கும் முதன்மை அதிகாரியான டக்ளஸ் கார்சியா, சில்வா அளித்ததாகக் கூறப்படும் வாக்குமூலத்தின் அடிப்படையில், பிரேசிலில் பல ஆண்டுகளாகத் துப்புத் துலங்காமல் கிடக்கும் பழைய கொலை வழக்குகளை மீண்டும் விசாரிக்க உத்தரவிட்டுள்ளார்.
குறிப்பாக, தான் 80 பேரைக் கொலை செய்ததாக சில்வா தெரிவித்ததாகக் கூறப்பட்டதைத் தொடர்ந்து, பிரேசிலின் பராய்பா மாகாணத்தில் கடந்த 20 ஆண்டுகளாகத் துப்புத் துலங்காமல் முடிவுக்கு வராமல் கிடக்கும் பல பழைய கொலை வழக்குகளை போலீசார் தற்போது மீண்டும் கையில் எடுத்துள்ளனர். அந்த வழக்குகளுக்கும் சில்வாவுக்கும் தொடர்பு உள்ளதா என்பது குறித்தும் விசாரணை நடைபெற்று வருகிறது.
கடந்த மூன்று மாதங்களில் 16 கொலைகளில் ஈடுபட்டதாக சில்வா மீது வழக்குகள் பதிவு செய்யப்பட்டுள்ள நிலையில், அவர் தெரிவித்துள்ள 80 கொலைகள் தொடர்பான தகவல்கள் அனைத்தும் இதுவரை அதிகாரப்பூர்வமாக உறுதி செய்யப்படவில்லை. எனவே, அவரது வாக்குமூலத்தின் உண்மைத் தன்மை குறித்தும் போலீசார் தொடர்ந்து விசாரணை நடத்தி வருகின்றனர்.
கைது செய்யப்பட்ட ஜோர்லான் லோப்ஸ் டா சில்வா, தற்போது பிரேசிலில் உள்ள அலகோய்ன்ஹா பொதுச் சிறையில் பலத்த பாதுகாப்புடன் அடைக்கப்பட்டுள்ளார். அவரது பழைய குற்றப் பின்னணி, உறுதிப்படுத்தப்பட்ட கொலை வழக்குகள் மற்றும் அவர் அளித்ததாகக் கூறப்படும் 80 கொலைகள் குறித்த வாக்குமூலம் ஆகியவற்றை அடிப்படையாகக் கொண்டு போலீசார் தொடர்ந்து விசாரணை மேற்கொண்டு வருகின்றனர்.