சவூதி அரேபியா மீது ஹூதி போராட்டக்காரர்கள் சமீபத்தில் நடத்திய தாக்குதல்கள் உலக நாடுகளின் கவலையை ஏற்படுத்தியுள்ளன. ஹூதிகள் கமிஸ் முஷைத், அபா, தாயிஃப் நகரங்களை பாலிஸ்டிக் ஏவுகணைகள், ட்ரோன்கள் மூலம் குறிவைத்தனர், இதில் ஏராளமான பொதுமக்கள் காயமடைந்தனர். உள்கட்டமைப்புகள் சேதமடைந்தன. இந்தத் தாக்குதல்கள் சவூதி அரேபியாவுக்கு கவலையை ஏற்படுத்தியுள்ளன.
இதற்கிடையில், இந்தியா இந்தத் தாக்குதல்களைக் கண்டித்து ஒரு அறிக்கையை வெளியிட்டுள்ளது. அதில், ”சவூதி அரேபியா மீதான ஹூதி போராட்டக்காரர்களின் தாக்குதல்களை ஏற்றுக்கொள்ள முடியாது. அவை பிராந்தியப் பாதுகாப்புக்கு அச்சுறுத்தல். இந்தத் தாக்குதல்கள் முக்கியமான பாப் அல்-மண்டேப் நீர்வழியில் கப்பல்களின் போக்குவரத்திற்கு அச்சுறுத்தலாக இருக்கிறது. சவூதி அரேபியாவின் வர்த்தக நிறுவனங்கள் மீதான தாக்குதல்கள், மக்கா நகரின் மீதான தாக்குதல் முயற்சிகள் கண்டிக்கத்தக்கது.
யேமனில் மோசமடைந்து வரும் பாதுகாப்பு நிலைமை ஆழ்ந்த கவலையளிக்கிறது. சவூதி அரேபியாவின் இறையாண்மைக்குட்பட்ட பகுதிகளை, குறிப்பாக பொதுமக்கள், வர்த்தக நிறுவனங்களை குறிவைப்பதையும், மெக்கா நகரின் மீதான தாக்குதல் முயற்சியையும் நாங்கள் கண்டிக்கிறோம்.
இதுபோன்ற தாக்குதல்கள் பிராந்திய பாதுகாப்பு, ஸ்திரத்தன்மையை சீர்குலைக்கும். பாப்-எல்-மண்டேப் பகுதியில் தடையற்ற கப்பல் போக்குவரத்திற்கு அச்சுறுத்தலாக இருக்கிறது. இது எங்களுக்கு ஏற்றுக்கொள்ள முடியாதது. இப்பகுதியில் விரைவில் அமைதியும் ஸ்திரத்தன்மையும் மீட்டெடுக்கப்படும் என்று நம்புகிறோம்” எனக் கூறியுள்ளது.
சவுதிக்கு பாகிஸ்தான் ஆதரவு
இந்தத் தாக்குதல்கள் தொடர்பாக பாகிஸ்தானும் ஒரு அறிக்கையை வெளியிட்டுள்ளது. ”சவூதி அரேபியாவைப் பாதுகாக்க பாகிஸ்தான் எந்த எல்லைக்கும் செல்லும். வளைகுடா நாட்டின் பாதுகாப்பிற்கான பாகிஸ்தானின் அர்ப்பணிப்பு நிபந்தனையற்றது. பாகிஸ்தான் சவூதி அரேபிய ராச்சியத்துடன் இராஜதந்திர ரீதியாகவும், உடல் ரீதியாகவும் முழுமையாக நிற்கிறது. நாங்கள் எந்த எல்லைக்கும் செல்வோம்” என்று கூறியுள்ளது.
மெக்கா கூட்டுப் பாதுகாப்பு ஒப்பந்தம்
பாகிஸ்தான், சவூதி அரேபியா, துருக்கி ஆகிய நாடுகள் கடந்த மாதம் மெக்கா கூட்டுப் பாதுகாப்பு ஒப்பந்தத்தில் கையெழுத்திட்டன. இதன்படி, இந்த மூன்று நாடுகளில் ஏதேனும் ஒன்றின் மீதான ஆயுதத் தாக்குதல், அனைத்து நாடுகளின் மீதான தாக்குதலாகக் கருதப்படும். இந்தச் சூழலில், பாகிஸ்தானின் அறிக்கை முக்கியத்துவம் வாய்ந்ததாகக் கருதப்படுகிறது.
சவூதி அரேபியா – ஹூதி பதற்றம்
சவூதி அரேபியா – யேமனின் ஹூதி கிளர்ச்சியாளர்களுக்கு இடையே பதற்றம் சீராக அதிகரித்து வருகிறது. சமீபத்திய நாட்களில், ஹூத்தி கிளர்ச்சியாளர்கள் சவூதி தளங்கள் மீது தாக்குதல் நடத்தியதோடு, செங்கடலில் உள்ள முக்கியத்துவம் வாய்ந்த பாப் அல்-மண்டேப் ஜலசந்தியின் மீதும் தங்கள் கட்டுப்பாட்டை நிலைநாட்டியுள்ளனர். ஹூத்திகள் சவூதி எண்ணெய் ஆலைகள், பிற முக்கிய உள்கட்டமைப்புகள் மீது தாக்குதல் நடத்தியுள்ளதால், மேற்கு ஆசியாவில் நிலைமை மேலும் மோசமடைந்துள்ளது.