இஸ்ரேலிய சிறைகளுக்கு வெளியே ஆழமான அகழிகளை அமைப்பதற்கான ஒரு திட்டம் முன்வைக்கப்பட்டுள்ளது. இந்த அகழிகளில் பசியுள்ள முதலைகள் வைக்கப்படும். சிறையிலிருந்து தப்பிக்கும் கைதிகள் அவற்றுக்கு உணவாகிவிடுவார்கள். இஸ்ரேலிய அரசின் இந்தத் திட்டத்தைச் சுற்றுச்சூழல் ஆர்வலர்கள் கடுமையாக எதிர்த்துள்ளனர். வனவிலங்குப் பாதுகாப்பு அமைப்புகளும் தங்கள் ஆட்சேபனைகளைத் தெரிவித்துள்ளன. இந்தத் திட்டம் முதன்முதலில் டிசம்பர் 2025-ல் இஸ்ரேலிய தேசியப் பாதுகாப்பு அமைச்சர் இட்டாமர் பென்-க்விர் என்பவரால் கொண்டுவரப்பட்ட யோசனை.
இது, அதி உயர் பாதுகாப்புச் சிறையைச் சுற்றி முதலைக் அகழிகளைப் பயன்படுத்தும் திட்டம். இந்த யோசனை, அமெரிக்க அதிபர் டொனால்ட் ட்ரம்பின் “அல்லிகேட்டர் அல்காட்ராஸ்” என்ற திட்டத்தால் ஈர்க்கப்பட்டதாகக் கூறப்படுகிறது. இது, புளோரிடாவில் குடியேறிகளைத் தடுத்து வைக்கும் ஒரு சிறைச்சாலைக்கு வழங்கப்படும் பெயர். அப்போதிருந்து, இந்த முன்மொழிவு இஸ்ரேலில் முதலைகளின் நிலை, அவற்றை வளர்ப்பகத்தில் நிர்வகித்தல், நிலம், வனவிலங்குகள் தொடர்பான முடிவுகளில் சுற்றுச்சூழல் விதிமுறைகளின் பங்கு ஆகியவை குறித்த ஒரு பெரிய விவாதத்தின் பகுதியாக மாறியுள்ளது.
நைல் முதலை ஒரு காலத்தில் ஆப்பிரிக்காவின் சில பகுதிகள் முதல் மத்திய கிழக்கு வரை பரந்து விரிந்திருந்தது. வேட்டையாடுதல், வாழ்விட இழப்பு, அணை கட்டுமானம் ஆகியவற்றால் அப்பகுதியின் பெரும் பகுதிகளில் இருந்த அவை மறைந்துபோக ஆரம்பித்தன. தற்போது இஸ்ரேல் என்று அழைக்கப்படும் பகுதியில் கடைசியாக 1905-ல் காட்டு நைல் முதலை காணப்பட்டது. அதன் பிறகு, இந்த இனம் பாதுகாப்பு மையங்கள், முதலைப் பண்ணைகளில் மனித மேற்பார்வையின் கீழ் உயிர் பிழைத்து வருகிறது. இஸ்ரேல் 2012-ல் அவற்றின் வணிக ரீதியான சுரண்டலையும் தடை செய்தது.
ஜூலை 15, 2026 அன்று, இஸ்ரேலின் சுற்றுச்சூழல் பாதுகாப்பு அமைச்சர் இடிட் சில்மன், அவற்றின் “பாதுகாக்கப்பட்ட” அந்தஸ்தை நீக்கி, இந்த விலங்குகளை “பண்ணையில் வளர்க்கப்படும் காட்டு விலங்குகள்” என்ற எதிர்பாராத, முற்றிலும் புதிய பிரிவில் வைத்தபோது இந்த நிலைமை மாறியது. சிறைச்சாலைகளுக்கு வெளியே உள்ள அகழிகளில் முதலைகளை வைத்திருக்க இது செய்யப்பட்டது. முதலைகளை இப்போது இஸ்ரேல் சிறை சேவையின் கட்டுப்பாட்டின் கீழ் வைத்திருக்க முடியும். இது இஸ்ரேலிய சிறைகளின் அதிகபட்ச பாதுகாப்புப் பிரிவுகளைச் சுற்றி முதலை அகழிகளைக் கட்டுவதற்கான ஒரு திட்டத்தை முன்னெடுத்துச் செல்ல உதவும்.