தமிழ்நாட்டில் செயல்பட்டு வரும் சுமார் 2,500 டாஸ்மாக் மதுபானக் கடைகளைத் தனியார்மயமாக்க தமிழக அரசு தீவிரமாக ஆலோசித்து வருவதாக தகவல்கள் வெளியாகியுள்ளன. பல ஆண்டுகளுக்குப் பிறகு டாஸ்மாக் நிர்வாகத்தில் மிகப்பெரிய மாற்றத்தை ஏற்படுத்தக்கூடிய இந்த நடவடிக்கை குறித்து, விரைவில் இறுதி முடிவு எடுக்கப்படும் என கூறப்படுகிறது.
கடந்த 2003-ஆம் ஆண்டுக்குப் பிறகு, சுமார் 23 ஆண்டுகள் கழித்து, மதுபானச் சில்லறை விற்பனை முறையில் மீண்டும் தனியார் பங்களிப்பை அறிமுகப்படுத்தும் வகையில், தேவையான சட்டத்திருத்த மசோதா வரும் ஆகஸ்ட் மாத சட்டப்பேரவைக் கூட்டத்தொடரில் தாக்கல் செய்யப்படலாம் என்றும் தகவல்கள் தெரிவிக்கின்றன.
முதற்கட்டமாக, மாநகராட்சிகள் மற்றும் நகராட்சிப் பகுதிகளில் இயங்கி வரும் சுமார் 2,500 டாஸ்மாக் கடைகளும், அவற்றுடன் இணைந்துள்ள பார்களும் தனியார் நிர்வாகத்திடம் ஒப்படைக்கப்படும் என்று கூறப்படுகிறது.
இந்த புதிய திட்டத்தின்படி, மதுபானக் கடைகளை அரசே நேரடியாக நடத்தும் நடைமுறையை கைவிட்டு, உரிமக் கட்டணம் (License Fee) மற்றும் ஆயத்தீர்வை வரி (Excise Revenue) ஆகியவற்றின் மூலம் மட்டுமே அரசு வருவாய் ஈட்டும் முறை அறிமுகப்படுத்தப்பட உள்ளது. இது, புதுச்சேரி, கர்நாடகா மற்றும் ஆந்திரப் பிரதேசம் போன்ற அண்டை மாநிலங்களில் நடைமுறையில் உள்ள மாதிரியைப் பின்பற்றியதாக இருக்கும் எனத் தகவல்கள் தெரிவிக்கின்றன.
டாஸ்மாக் கடைகளில் நீண்ட காலமாக எழுந்து வரும் நிர்ணயிக்கப்பட்ட விலையை விட அதிக விலைக்கு (Over MRP) மது விற்பனை செய்யப்படுவது தொடர்பான புகார்கள், நிர்வாகச் சுமை, மேலும் “அரசே மது விற்கிறது” என்ற விமர்சனத்தைத் தவிர்ப்பது போன்ற காரணங்களால் இந்தத் திட்டம் பரிசீலிக்கப்பட்டு வருவதாகக் கூறப்படுகிறது.
இதுகுறித்து, மதுவிலக்கு மற்றும் ஆயத்தீர்வைத் துறை அமைச்சர் விக்னேஷ், “ரெஸ்டோ பார் அமைப்பு மற்றும் டாஸ்மாக் கடைகளைத் தனியார்மயமாக்குவது குறித்து பல்வேறு தரப்பினரின் கருத்துகளைக் கேட்டு ஆலோசித்து வருகிறோம்” என்று ஏற்கனவே தெரிவித்திருந்தார்.
முதலமைச்சர் விஜய் தலைமையிலான தவெக அரசு, ஆட்சிப் பொறுப்பேற்ற பிறகு, பள்ளிகள், வழிபாட்டுத் தலங்கள் மற்றும் பேருந்து நிலையங்களுக்கு அருகில் இருந்த 717 டாஸ்மாக் கடைகளை மூட நடவடிக்கை எடுத்திருந்தது. அந்த நடவடிக்கையைத் தொடர்ந்து, தற்போது இந்த தனியார்மயமாக்கல் திட்டம் குறித்து தீவிரமாக ஆலோசனை நடைபெற்று வருகிறது.
இந்தத் திட்டத்திற்கு எதிர்க்கட்சிகள் கடும் எதிர்ப்புத் தெரிவித்துள்ளன. பாமக தலைவர் அன்புமணி ராமதாஸ், “அரசு மது விற்கிறது என்ற அவப்பெயரைப் போக்க தனியாரிடம் ஒப்படைப்பது, மூட்டைப்பூச்சிக்குப் பயந்து வீட்டைக் கொளுத்துவதற்கு ஒப்பானது. இது மதுப் பழக்கத்தை மேலும் அதிகரிக்க வழிவகுக்கும்” என்று கடுமையாக விமர்சித்துள்ளார்.
அதேபோல், அமமுக பொதுச்செயலாளர் டிடிவி தினகரனும் இந்தத் திட்டத்திற்குத் தனது எதிர்ப்பைப் பதிவு செய்துள்ளார்.
அண்மையில், சென்னை உயர்நீதிமன்றத்தின் வழிகாட்டுதலின்படி, டாஸ்மாக் கடைகளில் Over MRP-க்கு மது விற்பனை செய்தால், சம்பந்தப்பட்ட ஊழியர்கள் நிரந்தரப் பணிநீக்கம் செய்யப்படுவார்கள் என்று அதிகாரிகள் எச்சரித்திருந்தனர். இதுபோன்ற தொடர் புகார்களுக்கு முற்றுப்புள்ளி வைப்பதற்கும் இந்த நிர்வாக மாற்றம் உதவும் என அரசு தரப்பில் கருதப்படுவதாகத் தகவல்கள் வெளியாகியுள்ளன.
புதிய திட்டத்தின்படி, மதுபானங்களை அரசே நேரடியாகக் கொள்முதல் (Procurement) செய்யும். ஆனால், சில்லறை விற்பனையை (Retail Sales) உரிமம் பெற்ற தனியார் நிறுவனங்கள் மேற்கொள்ளும் வகையில் புதிய நிர்வாகக் கட்டமைப்பு உருவாக்கப்படலாம் என்று கூறப்படுகிறது.
மேலும், மதுக்கடைகளை நேரடியாக நடத்துவதில் அரசுக்கு எந்தப் பெருமையும் இல்லை என்ற நிலைப்பாட்டின் அடிப்படையில், இந்த தனியார்மயமாக்கல் நடவடிக்கை எதிர்காலத்தில் மாநிலம் முழுவதும் உள்ள டாஸ்மாக் கடைகளைப் படிப்படியாகக் குறைக்கும் அல்லது மூடும் நடவடிக்கைக்கான முதல் கட்டமாக இருக்கலாம் என்ற கருத்தும் அரசியல் வட்டாரங்களில் பேசப்பட்டு வருகிறது.
இதற்கிடையில், தற்போது டாஸ்மாக் நிறுவனத்தில் பணியாற்றி வரும் ஆயிரக்கணக்கான தற்காலிக ஊழியர்களின் எதிர்காலம் என்னவாகும்? என்ற கேள்வியும் எழுந்துள்ளது. இவர்களில் பலருக்கு நிரந்தரப் பணி, காலமுறை ஊதியம் மற்றும் பணி பாதுகாப்பு இல்லாத நிலையில், கடைகள் தனியார் வசம் சென்றால் அவர்களின் வேலைவாய்ப்பு மற்றும் மறுவாழ்வு எப்படி உறுதி செய்யப்படும் என்ற கவலை அதிகரித்துள்ளது.
இதனால், இந்த விவகாரம் தொடர்பாக அரசு, தொழிற்சங்க பிரதிநிதிகளுடன் ஆலோசனை நடத்தலாம் என்றும் எதிர்பார்க்கப்படுகிறது.
இதனிடையே, சமூக வலைத்தளங்களிலும் இந்த விவகாரம் குறித்து பரவலான விவாதம் நடைபெற்று வருகிறது. சிலர், “தனியார்மயமாக்கப்பட்டால் மதுபானங்களின் தரம் உயரும்; கூடுதல் விலைக்கு விற்பனை செய்யும் நடைமுறை குறையும்” என்று ஆதரவு தெரிவித்து வருகின்றனர்.
மற்றொரு தரப்பினர், “இது மதுபான விற்பனையை மேலும் ஊக்குவிக்கும். மதுவிலக்கு என்ற நீண்டகால இலக்கை பாதிக்கும் அபாயமும் உள்ளது” என்று கவலை வெளியிட்டு வருகின்றனர்.
இதற்கிடையில், 2,500 டாஸ்மாக் கடைகளைத் தனியார்மயமாக்குவது தொடர்பான அதிகாரப்பூர்வ அறிவிப்பும், இறுதி முடிவும், அதற்கான வழிகாட்டு நெறிமுறைகளும் விரைவில் வெளியாகும் என எதிர்பார்க்கப்படுகிறது. இந்த முடிவு, தமிழ்நாட்டின் மதுபான விற்பனை நிர்வாகத்தில் மிகப்பெரிய மாற்றத்தை ஏற்படுத்தக்கூடிய முக்கிய நடவடிக்கையாகப் பார்க்கப்படுகிறது.