திருமணம் என்பது வாழ்க்கையில் மறக்க முடியாத மகிழ்ச்சியான தருணம். ஆனால், அந்த மகிழ்ச்சியை சில நிமிட “பிராங்க்” அல்லது “வேடிக்கை விளையாட்டு” சோகமாக மாற்றிவிடும் சம்பவங்கள் உலகம் முழுவதும் அதிகரித்து வருகின்றன.
சீனாவில் நடைபெற்ற ஒரு திருமணத்தில், அந்நாட்டு பாரம்பரியமான “ஹுனாவோ” (Hunao) என்ற பெயரில் நடத்தப்பட்ட கேலி விளையாட்டு ஒரு இளம்பெண்ணின் வாழ்க்கையையே புரட்டிப்போட்டது.
தனது தோழியின் திருமணத்தில் கலந்து கொண்ட 20 வயதான ஜுவாங் என்ற இளம்பெண்ணை, மணமகனின் நண்பர்கள் ஒரு அறைக்குள் அழைத்துச் சென்று, படுக்கை விரிப்பில் தூக்கி வீசும் விளையாட்டில் ஈடுபடுத்தினர். முதல் முறை பாதுகாப்பாகப் பிடிக்கப்பட்டாலும், இரண்டாவது முறை பிடிக்கத் தவறியதால், அவர் பலத்த வேகத்தில் கீழே விழுந்தார்.
இந்த விபத்தில் அவரது முதுகுத்தண்டு கடுமையாக சேதமடைந்தது. பல மாதங்கள் மருத்துவமனையில் சிகிச்சை பெற்ற அவர், நிரந்தர உடல்நலப் பாதிப்புக்கு உள்ளானதாக மருத்துவர்கள் தெரிவித்தனர். பின்னர் அவர் நீதிமன்றத்தை நாடி இழப்பீடு கோரிய நிலையில், இந்திய மதிப்பில் சுமார் 32 லட்சம் ரூபாய் இழப்பீடு வழங்க நீதிமன்றம் உத்தரவிட்டது. இதில் மணமக்கள், நிகழ்வை திட்டமிட்டவர்கள் மற்றும் விளையாட்டில் ஈடுபட்ட நண்பர்கள் அனைவரும் பொறுப்பேற்க வேண்டும் என்றும் நீதிமன்றம் தீர்ப்பளித்தது.
ஆனால், எவ்வளவு இழப்பீடு கிடைத்தாலும், இழந்த உடல்நலத்தையும் வாழ்க்கையையும் திரும்பப் பெற முடியாது என்பதே இந்தச் சம்பவத்தின் மிகப் பெரிய சோகம்.
இதேபோன்ற சம்பவங்கள் இன்று நம் நாட்டிலும் அதிகரித்து வருகின்றன. குறிப்பாக, யூடியூப் மற்றும் இன்ஸ்டாகிராம் போன்ற சமூக வலைதளங்களில் வைரலாகும் வீடியோக்களைப் பார்த்து, திருமண நிகழ்ச்சிகளில் மணமக்களை திடீரெனத் தூக்குவது, ஓட வைப்பது, பயமுறுத்துவது போன்ற ஆபத்தான செயல்கள் அதிகரித்து வருகின்றன.
என்னுடைய பார்வையில், “பிராங்க்” செய்வதில் தவறு இல்லை. ஆனால் அதற்கும் ஒரு எல்லை இருக்கிறது. நமக்கு நன்கு தெரிந்த நண்பர்கள் அல்லது சக ஊழியர்களிடம், அவர்கள் ரசிக்கும் வகையில், யாரையும் மனதளவிலோ உடலளவிலோ பாதிக்காத லேசான நகைச்சுவை பிராங்க் செய்வது வேறு.
ஆனால், இன்று சிலர் சமூக வலைதளங்களில் அதிக பார்வைகள் (Views) மற்றும் “லைக்ஸ்” பெற வேண்டும் என்பதற்காக, முற்றிலும் தெரியாத நபர்களையே குறிவைத்து அதிர்ச்சியூட்டும் பிராங்க் செய்கிறார்கள். அந்த நபருக்கு இதய நோய் இருக்கலாம், வேறு உடல்நலக் குறைபாடு இருக்கலாம் அல்லது மனஅழுத்தத்தில் இருக்கலாம். அதைப் பற்றி எதுவும் அறியாமல் அவர்களைப் பயமுறுத்துவது மிகப்பெரிய பொறுப்பற்ற செயல்.
வீடியோ எடுத்தவர் சிரித்துக்கொண்டே வீட்டுக்குச் சென்று விடலாம். ஆனால் பாதிக்கப்பட்டவர் மருத்துவமனைக்குச் செல்ல வேண்டிய நிலை ஏற்படலாம். சில நேரங்களில் உயிரிழப்புக்குக் கூட அது காரணமாகலாம்.
அதேபோல திருமண நிகழ்ச்சிகளிலும் “வேடிக்கை” என்ற பெயரில் மணமக்களைத் தூக்கி வீசுவது, நாற்காலியை இழுப்பது, தள்ளுவது, ஓட வைப்பது போன்ற செயல்கள் முற்றிலும் தவிர்க்கப்பட வேண்டும். திருமண நாளில் மணப்பெண்கள் கனமான ஆடைகளும் உயரமான காலணிகளும் அணிந்திருப்பதால், ஒரு சிறிய தவறும் பெரிய விபத்தாக மாறக்கூடும்.
பிராங்க் என்பது சிரிப்பை உருவாக்க வேண்டும்; மருத்துவமனைக்கு அனுப்பக் கூடாது. வேடிக்கை என்பது நினைவுகளை உருவாக்க வேண்டும்; வாழ்நாள் முழுவதும் வலியை உருவாக்கக் கூடாது.
“விளையாட்டு வினையாகும்” என்ற பழமொழிக்கு இந்தச் சம்பவம் மிகச் சிறந்த எடுத்துக்காட்டாக அமைந்துள்ளது. எந்தக் கொண்டாட்டமாக இருந்தாலும், பாதுகாப்புக்கே முதலிடம் கொடுப்போம். ஒருசில நிமிட பொழுதுபோக்கிற்காக, ஒருவரின் வாழ்நாள் மகிழ்ச்சியை பறித்துவிடும் செயல்களைத் தவிர்ப்போம்.