அக்டோபர் 10-ம் தேதி காங்கிரஸ் மூத்த தலைவர் ராகுல் காந்தியும், அக்டோபர் 11-ம் தேதி பிரதமர் நரேந்திர மோடியும் அடுத்தடுத்து சென்னை வர உள்ளனர்.முதல்வர் விஜய்யின் தவெக ராகுல் காந்தியை எப்படிக் கையாளப் போகிறது, பிரதமர் மோடியுடனான சந்திப்பில் என்ன அணுகுமுறையைக் கடைப்பிடிக்கப் போகிறது என்ற கேள்விகள் எழுந்துள்ளன.
ராகுல் காந்தி, மோடி ஆகிய இரு தேசியத் தலைவர்களின் அடுத்தடுத்த வருகைகள், தவெக அரசின் அரசியல் நிலைப்பாட்டுக்கு ஒரு முக்கியமான சோதனையாக அமையுமா? என்ற எதிர்பார்ப்பும் உருவாகியுள்ளது.
காங்கிரஸ் – தவெக உறவில் விரிசல்?
தமிழகத்தில் தேர்தலின்போதும், தேர்தலுக்குப் பின்னரும் திமுக கூட்டணியில் இருந்து காங்கிரஸ் வெளியேறுவதை சோனியா காந்தி விரும்பவில்லை என்று கூறப்படுகிறது. தொகுதிப் பங்கீட்டின்போது ராகுல் காந்திக்கும், திமுக தரப்புக்கும் இடையே இழுபறி ஏற்பட்ட நிலையில், ப.சிதம்பரம் உள்ளிட்ட மூத்த தலைவர்கள் தலையிட்டு பிரச்சினையைச் சமாளித்தனர்.
இதற்கிடையே, தவெக ஆட்சி அமைப்பதற்கு காங்கிரஸ் ஆதரவு அளிக்க வேண்டும் என்ற நிலைப்பாட்டில் ராகுல் காந்தி தீவிரமாகச் செயல்பட்டார். சிபிஐ, சிபிஎம், இந்திய யூனியன் முஸ்லிம் லீக் உள்ளிட்ட கட்சிகளின் தலைவர்களிடம் தவெக ஆட்சி அமைக்க ஆதரவு திரட்ட அவர் பேசியதாகவும், மல்லிகார்ஜுன கார்கேவை திருமாவளவனிடம் பேச வைத்ததாகவும் தகவல்கள் வெளியாகின.
இந்த ஆதரவுக்குப் பின்னர் காங்கிரஸ் கட்சிக்கு இரண்டு அமைச்சர் பதவிகளும், விஜய்க்கு நெருக்கமாகச் செயல்பட்ட பிரவீன் சக்கரவர்த்திக்கு மாநிலங்களவை உறுப்பினர் பதவியும் கிடைத்தது. ஆனால், ஆட்சி அமைந்த சில காலத்திலேயே விஜய் – ராகுல் காந்தி இடையிலான நெருக்கத்தில் விரிசல் ஏற்பட்டுள்ளதாகக் காங்கிரஸ் வட்டாரங்களில் அதிருப்தி நிலவியது.
கூட்டணிக்கு உரிய மரியாதை இல்லை
காங்கிரஸ் கட்சியின் முன்னாள் நிர்வாகிகள் சிலர் தெரிவிப்பதாகக் கூறப்படும் கருத்துகள் இந்த அதிருப்தியை வெளிப்படுத்துகின்றன. “விஜய்க்காக ராகுல் காந்தி பல்வேறு முயற்சிகளை மேற்கொண்டார். தவெக ஆட்சியைத் தக்கவைக்க உதவியதுடன், காங்கிரஸ் கட்சிக்கும் சில பதவிகள் கிடைக்க வழிவகை செய்தார். ஆனால், ஆட்சிக்கு வந்த பிறகு காங்கிரஸுடனான பழைய நெருக்கத்தை விஜய் குறைத்துக்கொண்டதாகத் தெரிகிறது. தவெக அமைச்சர்கள் சில நேரங்களில் காங்கிரஸை வேண்டாத விருந்தாளியைப் போல நடத்துவதாக உணர்கிறோம்” என்று அவர்கள் அதிருப்தி தெரிவித்ததாகக் கூறப்படுகிறது.
2029 மக்களவைத் தேர்தலில் ராகுல் காந்தியைப் பிரதமர் வேட்பாளராக முன்னிறுத்திக் காங்கிரஸ் கட்சியினர் பிரசாரம் செய்து வரும் நிலையில், விஜய்யை அடுத்த பிரதமராக முன்னிறுத்தும் வகையில் தவெக ஆதரவாளர்கள் சிலர் பேசுவது காங்கிரஸ் தரப்பில் அதிருப்தியை ஏற்படுத்தியுள்ளது.
நீட் தேர்வு, வாக்காளர் பட்டியல் சிறப்புத் தீவிரத் திருத்தம் உள்ளிட்ட விவகாரங்களில் ராகுல் காந்தி தீவிரமாகப் போராடி வரும் நிலையில், தவெக தரப்பில் இருந்து எதிர்பார்த்த அரசியல் ஆதரவு கிடைப்பதில்லை என்பதும் காங்கிரஸ் நிர்வாகிகளின் மற்றொரு குற்றச்சாட்டு.
இந்தியா கூட்டணி விவகாரத்திலும் அதிருப்தி
டெல்லியில் நடைபெறும் இந்தியா கூட்டணிக் கூட்டங்களில் தவெக பங்கேற்காதது குறித்தும் காங்கிரஸ் வட்டாரங்களில் கேள்விகள் எழுந்துள்ளது. அதே நேரத்தில், சென்னையில் சத்தியமூர்த்தி பவனில் நடைபெறும் இந்தியா கூட்டணிக் கட்சிகளின் ஆலோசனைக் கூட்டங்களில் தவெக தரப்பு பங்கேற்பது எந்த வகையான அரசியல் அணுகுமுறை என்ற விவாதமும் எழுந்துள்ளது.
தவெக, பாஜகவுடன் நேரடி மோதலைத் தவிர்க்க முயற்சிக்கிறதா என்ற சந்தேகமும் காங்கிரஸ் நிர்வாகிகள் சிலரிடம் இருக்கிறது. இந்த விவகாரங்கள் அனைத்தும் ராகுல் காந்தியின் சென்னை வருகையின்போது விவாதிக்கப்படுமா? என்ற எதிர்பார்ப்பும் நிலவுகிறது.
ராகுல் காந்தியைச் சந்திக்க விஜய் திட்டமிட்டாரா?
அக்டோபர் 10-ம் தேதி மாலை சென்னை தீவுத்திடலில் நடைபெறும் மாணவர்களுடனான கலந்துரையாடல் நிகழ்ச்சியில் ராகுல் காந்தி பங்கேற்க உள்ளார். இந்தச் சந்தர்ப்பத்தைப் பயன்படுத்தி ராகுல் காந்தியையும் முதல்வர் விஜய்யையும் நேரில் சந்திக்க வைக்க தமிழக காங்கிரஸ் நிர்வாகிகள் சிலர் முயற்சி மேற்கொண்டனர்.
இதுதொடர்பாக விஜய்க்கு நெருக்கமான அமைச்சர்கள் தரப்பில் ஆலோசனை நடைபெற்றதாகவும் தகவல்கள் வெளியாகியுள்ளன. “காங்கிரஸ் கட்சி எங்களுக்கு ஆதரவு அளித்ததை நாங்கள் மறுக்கவில்லை. அதற்குப் பதிலாக இரண்டு அமைச்சர் பதவிகளும், மாநிலங்களவை உறுப்பினர் பதவியும் வழங்கப்பட்டுள்ளன. ஆனால், நாங்கள் இப்போது ஆளும் கட்சி. காங்கிரஸ் எடுக்கும் ஒவ்வொரு அரசியல் முடிவையும் நாங்கள் அப்படியே பின்பற்ற முடியாது” என்று விஜய்க்கு நெருக்கமானவர்கள் கூறியுள்ளனர்.
பாஜக அரசுடன் மோத வேண்டுமா?
மத்திய அரசுடன் இணக்கமான உறவைப் பேண வேண்டும் என்பதே விஜய்யின் அணுகுமுறையாக இருப்பதாக அவரது ஆதரவாளர்கள் தெரிவிக்கின்றனர். டெல்லியில் பாஜக தலைமையிலான அரசு ஆட்சியில் இருக்கும் நிலையில், தமிழகத்தின் நிர்வாகத் தேவைகளுக்காக மத்திய அரசுடன் மோதல் போக்கைக் கடைப்பிடிப்பதைத் தவிர்க்க வேண்டும் என்பது தவெக தரப்பின் வாதம்.
இந்தச் சூழலில், ராகுல் காந்தியைச் சந்திப்பது பாஜக தரப்புக்கு அதிருப்தியை ஏற்படுத்துமா? என்பது குறித்தும் தவெக தரப்பில் ஆலோசிக்கப்பட்டுள்ளது. “ராகுல் காந்தியைச் சந்தித்தே ஆக வேண்டும் என்ற கட்டாயம் இல்லை. அவர் காங்கிரஸ் கட்சி நிகழ்ச்சிக்காக வருகிறார். கடந்த ஆகஸ்ட் 1-ம் தேதி மாமல்லபுரம் வந்தபோதுகூட அவரை நாம் சந்திக்கவில்லை. இப்போதும் அவர் வந்து செல்லட்டும். பிரதமர் மோடியைச் சிறப்பாக வரவேற்று அனுப்புவதில் கவனம் செலுத்தலாம். கரூர் சம்பவம் தொடர்பாக சிபிஐ விசாரணை நடைபெறும் சூழலில், தேவையில்லாமல் டெல்லி அரசைச் சீண்ட வேண்டுமா?” என்று ஆலோசனையில் சிலர் கேள்வி எழுப்பியுள்ளனர்.
அதே நேரத்தில், “காங்கிரஸ் கட்சி நமக்கு முக்கியமான கூட்டணிக் கட்சி. ராகுல் காந்தியைப் புறக்கணிப்பது சரியாக இருக்காது. அவரைச் சந்திப்பதன் மூலம் கூட்டணி உறவை வலுப்படுத்தலாம்” என்ற கருத்தும் முன்வைக்கப்பட்டுள்ளது. இரு தரப்பினரின் கருத்துகளையும் கேட்ட பிறகு, ராகுல் காந்தியைச் சந்திப்பதற்கு விஜய் சம்மதித்ததாகக் கூறப்படுகிறது.
ஆதவ் அர்ஜுனா வரவேற்பு; விஜய் வீட்டில் விருந்தா?
இந்தத் தகவல்களின்படி, அக்டோபர் 10-ம் தேதி சென்னை வரும் ராகுல் காந்தியை அமைச்சர் ஆதவ் அர்ஜுனா வரவேற்று, முதல்வர் விஜய்யின் இல்லத்திற்கு அழைத்துச் செல்லத் திட்டமிடப்பட்டுள்ளதாகக் கூறப்படுகிறது.
அங்கு விஜய்யுடன் விருந்தில் பங்கேற்றபடியே இருவரும் அரசியல் நிலவரம், கூட்டணி உறவு, எதிர்காலத் தேர்தல் வியூகங்கள் உள்ளிட்ட விவகாரங்கள் குறித்து ஆலோசிக்கக்கூடும் என்று கூறப்படுகிறது.
மோடி வருகை: விஜய்க்கு அரசியல் சவால்
அக்டோபர் 10-ம் தேதி ராகுல் காந்தியும், அக்டோபர் 11-ம் தேதி பிரதமர் மோடியும் சென்னை வருவதாகக் கூறப்படும் நிலையில், இரு தலைவர்களுடனும் விஜய் எத்தகைய அணுகுமுறையைக் கடைப்பிடிக்கிறார் என்பது கவனிக்கப்படும் விஷயமாக மாறியுள்ளது.
ராகுல் காந்தியைச் சந்திப்பதன் மூலம் காங்கிரஸ் கூட்டணி உறவை வலுப்படுத்த வேண்டிய அவசியம் ஒருபுறம் இருக்கிறது. மறுபுறம், மத்திய அரசுடன் இணக்கமான உறவைப் பேண வேண்டிய நிர்வாகத் தேவை தவெக அரசுக்கு இருப்பதாகக் கூறப்படுகிறது. இந்த இரண்டுக்கும் இடையில் சமநிலையை ஏற்படுத்துவதுதான் விஜய்க்கு முன்னுள்ள முக்கியமான அரசியல் சவாலாகப் பார்க்கப்படுகிறது.