திருமண மேட்ரிமோனி தளங்களில் நடைபெறும் போலி கணக்குகள், ஆள்மாறாட்டம் மற்றும் பண மோசடிகளைத் தடுக்கும் வகையில், பயனர்களின் விருப்பத்தின் பேரில் ஆதார் சரிபார்ப்பு முறையை மேற்கொள்ள தமிழக அரசுக்கு அனுமதி வழங்கப்பட்டுள்ளது.
மேட்ரிமோனி இணையதளங்களில், குறிப்பாக Matrimony.com போன்ற தளங்களில் வரன் தேடுபவர்கள் தங்களது அடையாளத்தை உறுதிப்படுத்த ஆதார் விவரங்களைச் சரிபார்த்துக்கொள்ளலாம். இந்த ஆதார் சரிபார்ப்பு கட்டாயமானது அல்ல என்றும், முழுமையாக பயனர்களின் விருப்பத்திற்கு உட்பட்டது என்றும் தெரிவிக்கப்பட்டுள்ளது.
ஆதார் விவரங்களை வழங்க விரும்பாதவர்கள், ஓட்டுநர் உரிமம், பாஸ்போர்ட் அல்லது பான் கார்டு உள்ளிட்ட அரசு அங்கீகரித்த பிற ஆவணங்களைப் பயன்படுத்தி தங்களது அடையாளத்தை உறுதிப்படுத்திக் கொள்ளலாம். ஆதார் வழங்காத காரணத்திற்காக எந்தப் பயனருக்கும் மேட்ரிமோனி நிறுவனங்கள் சேவையை மறுக்கக் கூடாது என்றும், மாற்று ஆவணங்களைச் சமர்ப்பிப்பதற்கான எளிய வழிமுறைகளை வழங்க வேண்டும் என்றும் விதிமுறை வகுக்கப்பட்டுள்ளது.
மேட்ரிமோனி நிறுவனங்கள் பயனரின் ஆதார் எண்ணைப் பயன்படுத்தி சரிபார்ப்பை மேற்கொள்வதற்கு முன்பாக, சம்பந்தப்பட்ட பயனரின் முறையான ஒப்புதலைக் கட்டாயம் பெற வேண்டும். பயனரின் அனுமதியின்றி ஆதார் விவரங்களைத் தன்னிச்சையாகச் சரிபார்க்கவோ அல்லது சேமிக்கவோ கூடாது. மேலும், வழங்கிய ஒப்புதலை எந்த நேரத்திலும் திரும்பப் பெறும் உரிமையும் பயனருக்கு வழங்கப்பட்டுள்ளது.
சென்னை உயர் நீதிமன்றத்தின் முந்தைய உத்தரவின்படி, மேட்ரிமோனி தளங்களில் வரன் தேடுவோரின் வயது, பிறந்த தேதி, முகவரி மற்றும் திருமண நிலை உள்ளிட்ட அடிப்படை விவரங்கள் முறையான ஆவணங்களின் அடிப்படையில் சரிபார்க்கப்பட்ட பின்னரே சுயவிவரங்களை இணையதளத்தில் பதிவேற்ற வேண்டும் என அறிவுறுத்தப்பட்டுள்ளது. ஒருவர் ஏற்கனவே திருமணம் செய்தவரா, விவாகரத்து பெற்றவரா அல்லது திருமண நிலை தொடர்பான தகவல்களை மறைத்துள்ளாரா என்பதும் உரிய சான்றிதழ்கள் மூலம் சரிபார்க்கப்பட வேண்டும்.
ஆதார் அல்லது பிற அரசு அங்கீகரித்த ஆவணங்களின் மூலம் அடையாளம் சரிபார்க்கப்பட்ட பயனர்களின் சுயவிவரத்தில், அது சரிபார்க்கப்பட்ட கணக்கு என்பதைக் குறிக்கும் பிரத்யேக Visual Indicator இடம்பெறும். சமூக வலைதளங்களில் உள்ள ‘புளூ டிக்’ போன்ற இந்தக் குறியீட்டின் மூலம், சம்பந்தப்பட்ட சுயவிவரம் சரிபார்க்கப்பட்டதா என்பதை மற்ற பயனர்கள் எளிதில் அறிந்துகொள்ள முடியும்.
ஆன்லைன் திருமணத் தகவல் மையங்களில் போலி கணக்குகளை உருவாக்கி பெண்களை ஏமாற்றுவது, பண மோசடியில் ஈடுபடுவது, ஆள்மாறாட்டம் செய்வது மற்றும் வயது, முகவரி, வேலை உள்ளிட்ட விவரங்களைப் பொய்யாகப் பதிவிடுவது போன்ற புகார்கள் அதிகரித்துள்ளன. இதனைத் தொடர்ந்து, ஆன்லைன் வரன் தேடலில் நம்பகத்தன்மையை அதிகரிக்கவும், பயனர்களின் பாதுகாப்பை உறுதி செய்யவும் இந்த ஆவணச் சரிபார்ப்பு முறை கொண்டுவரப்பட்டுள்ளது.
இந்த ஆதார் சரிபார்ப்பு முறை, மத்திய மின்னணு மற்றும் தகவல் தொழில்நுட்ப அமைச்சகத்தின் (MeitY) ‘ஆதார் நல்லாட்சி போர்டல்’ விதிகளின் கீழ் முறையான அனுமதி பெற்றே தமிழக அரசால் நடைமுறைப்படுத்தப்பட்டுள்ளது. பொதுமக்கள் பயன்படுத்தும் அனைத்து தனியார் ஆன்லைன் சேவைகளிலும் ஆதார் சரிபார்ப்பை தன்னிச்சையாக இணைக்க முடியாது என்றும், முக்கியமான தேவைகளுக்காக மட்டுமே மத்திய அரசு இதற்கான அனுமதியை வழங்குகிறது என்றும் தெரிவிக்கப்பட்டுள்ளது.
அந்த வகையில், ஆன்லைன் திருமணத் தகவல் மையங்களில் நடைபெறும் மோசடிகளைத் தடுக்கும் நோக்கில், ‘ஆதார் நல்லாட்சி போர்டல்’ விதிகளின் கீழ் சிறப்பு அனுமதியாக இந்த நடைமுறை கொண்டுவரப்பட்டுள்ளது. மத்திய மின்னணு மற்றும் தகவல் தொழில்நுட்ப அமைச்சகம் வெளியிட்டுள்ள அறிவிப்பின்படி, தமிழ்நாட்டைத் தலைமையிடமாகக் கொண்டு செயல்படும் Matrimony.com தளத்திற்கு முதன்முறையாக தமிழக அரசு மூலம் இந்த ஆதார் சரிபார்ப்பு வசதியைப் பயன்படுத்துவதற்கான முறையான அனுமதி வழங்கப்பட்டுள்ளது. இதன் தொடர்ச்சியாக, மற்ற திருமணத் தகவல் மையங்களுக்கும் இந்த வசதி விரிவுபடுத்தப்படும் என எதிர்பார்க்கப்படுகிறது.
ஆதார் சரிபார்ப்பின் மூலம், மேட்ரிமோனி தளத்தில் உள்ள சுயவிவரத்திற்குப் பின்னால் இருக்கும் நபரும், அடையாள ஆவணங்களில் உள்ள நபரும் ஒருவரே என்பதை UIDAI-யின் அதிகாரப்பூர்வ தரவுத்தளத்தின் மூலம் தொழில்நுட்ப ரீதியாக உறுதி செய்ய முடியும் என தெரிவிக்கப்பட்டுள்ளது. இதன் மூலம் போலி அடையாளங்களைப் பயன்படுத்தி நடைபெறும் திருமண மோசடிகள் மற்றும் ஆள்மாறாட்டத்தைத் தடுப்பதற்கான கூடுதல் பாதுகாப்பு கிடைக்கும் என எதிர்பார்க்கப்படுகிறது.
இந்த உத்தரவு தமிழக அரசின் சமூக நலன் மற்றும் மகளிர் உரிமைத் துறை மூலம் அரசாணையாக அரசிதழில் முறைப்படி வெளியிடப்பட்டுள்ளது. இதனால், அரசிதழில் வெளியிடப்பட்ட தேதியிலிருந்தே இந்த விதிமுறைகள் அமலுக்கு வந்துள்ளன.
ஆதார் சரிபார்ப்பு நடைமுறை அறிமுகப்படுத்தப்பட்டாலும், பயனர்களின் தனிப்பட்ட தரவுகளை மேட்ரிமோனி நிறுவனங்கள் தவறாகப் பயன்படுத்துவதைத் தடுக்கும் வகையிலும் விதிமுறைகள் வகுக்கப்பட்டுள்ளன. பயனரின் ஒப்புதல் இல்லாமல் ஆதார் சரிபார்ப்பு மேற்கொள்ளக் கூடாது என்பதுடன், ஒப்புதலைத் திரும்பப் பெறும் உரிமையும் உறுதி செய்யப்பட்டுள்ளது. ஆதார் வழங்காத காரணத்திற்காக சேவை மறுக்கக் கூடாது என்பதும் விதிமுறைகளில் தெளிவுபடுத்தப்பட்டுள்ளது.
இதன் மூலம் ஆன்லைன் திருமணத் தகவல் மையங்களில் போலி கணக்குகள், ஆள்மாறாட்டம் மற்றும் பண மோசடிகளைத் தடுப்பதுடன், வரன் தேடுபவர்களின் அடையாளம், திருமண நிலை மற்றும் சுயவிவரங்களின் நம்பகத்தன்மையை அதிகரிப்பதே தமிழக அரசின் இந்த நடவடிக்கையின் முக்கிய நோக்கமாகக் கருதப்படுகிறது.