அமெரிக்க அதிபர் டொனால்ட் டிரம்ப், கூகுள் மேப்ஸில் அட்லாண்டிக் பெருங்கடலின் பெயரை “டிரம்ப் பெருங்கடல்” (Trump Ocean) அல்லது “அமெரிக்கப் பெருங்கடல்” (American Ocean) என்று மாற்றுமாறு விடுத்த கோரிக்கையை, கூகுள் நிறுவனத்தின் தலைமைச் செயல் அதிகாரி சுந்தர் பிச்சை நிராகரித்ததாகத் தெரிவித்துள்ளார்.
பெருங்கடல்கள் பல நாடுகளின் எல்லைகளைத் தொட்டுச் செல்லும் சர்வதேச நீர்ப்பரப்புகள் என்பதால், அவற்றின் பெயரைத் தன்னிச்சையாக மாற்றுவது சாத்தியமில்லை என்று சுந்தர் பிச்சை விளக்கியதாக டிரம்ப் கூறியுள்ளார்.
தென் கரோலினா மாநிலத்தின் கிளெம்சன் பகுதியில் நடைபெற்ற தேர்தல் பிரசாரக் கூட்டத்தில் பேசிய டிரம்ப், சுந்தர் பிச்சையுடனான தனது உரையாடல் குறித்து இந்தத் தகவலைப் பகிர்ந்துகொண்டார். கூகுள் இணை நிறுவனர் செர்ஜி பிரினையும் சுந்தர் பிச்சையையும் “அசாத்தியமான புத்திசாலிகள்” என்று பாராட்டிய டிரம்ப், அட்லாண்டிக் பெருங்கடலின் பெயரை மாற்ற முடியுமா என்று சுந்தர் பிச்சையிடம் நேரடியாகக் கேட்டதாகத் தெரிவித்தார்.
அதற்கு சுந்தர் பிச்சை, “இல்லை, இல்லை… இந்த முறை என்னால் அதைச் செய்ய முடியாது” என்று மறுத்ததாக டிரம்ப் கூறினார். மேலும், பெருங்கடல்கள் ஏரிகளைப் போன்றவை அல்ல என்றும், பல நாடுகளின் எல்லைகளை உள்ளடக்கியிருப்பதால் அவற்றின் பெயரை மாற்றுவது மிகவும் சிக்கலானது என்றும் சுந்தர் பிச்சை விளக்கியதாக அவர் குறிப்பிட்டார். இந்த விவகாரத்தில் தங்களை வற்புறுத்த வேண்டாம் என்றும் சுந்தர் பிச்சை பணிவாகத் தெரிவித்ததாக டிரம்ப் கூறினார்.
இதையடுத்து, அட்லாண்டிக் பெருங்கடலின் பெயரை மாற்றும் திட்டத்தைத் தற்போதைக்கு கைவிடுவதாக டிரம்ப் தெரிவித்தார். “நாம் அதை அட்லாண்டிக் பெருங்கடல் என்றே தொடர்ந்து அழைப்போம், சரியா?” என்று கூட்டத்தினரிடம் கேட்ட அவர், பெயரை மாற்றாததால் ஐரோப்பிய நாடுகள் மகிழ்ச்சியடையும் என்றும் நகைச்சுவையாகக் குறிப்பிட்டார்.
இருப்பினும், பெருங்கடலின் பெயரை மாற்றும் எண்ணத்தை டிரம்ப் முழுமையாகக் கைவிடவில்லை. அட்லாண்டிக் பெருங்கடலுக்குப் பதிலாகப் பசிபிக் பெருங்கடலின் பெயரை “அமெரிக்கப் பெருங்கடல்” என்று மாற்றலாமா என்றும் அவர் கூட்டத்தில் விளையாட்டாகக் கேட்டார். அட்லாண்டிக் மற்றும் பசிபிக் ஆகிய இரண்டு பெருங்கடல்கள்தான் தனக்குப் பிடிக்கும் என்றும், அவற்றில் ஒன்றுக்கு அமெரிக்கா அல்லது தனது பெயரைச் சூட்டுவது குறித்தே யோசிப்பதாகவும் அவர் கூறினார்.
அமெரிக்க அதிபர் பதவியில் இருந்து விலகுவதற்குள், தனது பெயரிலோ அல்லது அமெரிக்காவின் பெயரிலோ ஒரு பெரிய நதி அல்லது பெருங்கடல் இருக்க வேண்டும் என்ற விருப்பம் தனக்கு இருப்பதாகவும் டிரம்ப் பேசியுள்ளார். அதேவேளையில், நியூயார்க்கில் உள்ள ஹட்சன் நதி மற்றும் மிசிசிப்பி நதி ஆகியவற்றின் பெயர்களை மாற்றும் எண்ணம் தனக்கு இல்லை என்றும் அவர் தெரிவித்துள்ளார். குறிப்பாக, மாலுமி ஹென்றி ஹட்சன் மீதான மரியாதையின் காரணமாக ஹட்சன் நதியின் பெயரை மாற்றப் போவதில்லை என்று நகைச்சுவையாகக் குறிப்பிட்டார்.
இதற்கு முன்பாக, டிரம்ப் நிர்வாகத்தின் உத்தரவையடுத்து, அமெரிக்காவில் உள்ள பயனர்களுக்கான கூகுள் மேப்ஸில் மெக்சிகோ வளைகுடாவின் பெயர் “அமெரிக்க வளைகுடா” (Gulf of America) என்று மாற்றப்பட்டது. மேலும், ஒண்டாரியோ ஏரியின் பெயரை “அமெரிக்க ஏரி” (Lake America) என்று மாற்றியதாகவும் டிரம்ப் தனது உரையில் குறிப்பிட்டார். இந்தப் பெயர் மாற்றங்களைச் சுட்டிக்காட்டிய அவர், வளைகுடாவின் பெயர் மாற்றத்தால் ஏற்பட்ட பரபரப்பிலிருந்து கூகுள் நிறுவனம் இன்னும் முழுமையாக மீளவில்லை என்றும் நகைச்சுவையாகக் கூறினார்.
ஆனால், அட்லாண்டிக் பெருங்கடலின் பெயரை மாற்றுவது தொடர்பான கோரிக்கைக்கு சுந்தர் பிச்சை மறுப்பு தெரிவித்ததாக டிரம்ப் கூறியிருப்பது தற்போது கவனம் பெற்றுள்ளது. சர்வதேச எல்லைகளுடன் தொடர்புடைய பெருங்கடலின் பெயரை மாற்றுவதில் உள்ள சிக்கல்களை அவர் சுட்டிக்காட்டியதாக டிரம்ப் தெரிவித்துள்ளார். அதேநேரத்தில், இந்த உரையாடல் குறித்தோ, டிரம்ப் தெரிவித்த கருத்துகள் குறித்தோ கூகுள் நிறுவனம் இதுவரை அதிகாரப்பூர்வ விளக்கம் எதையும் வெளியிடவில்லை.