சமூக வலைத்தளங்களில் வைரலாக பரவி வரும் தனது பழைய வீடியோ தொடர்பாக விளக்கம் அளிக்கும் வகையில், தமிழ்நாடு மனிதவள மேம்பாட்டுத்துறை அமைச்சர் டி. சரத்குமார் தனது மனைவி மற்றும் குழந்தையுடன் இணைந்து ஒரு விளக்க வீடியோவை வெளியிட்டுள்ளார்.
சேப்பாக்கம் மைதானத்தில் நடைபெற்ற ஐபிஎல் (IPL) போட்டியின் போது, அமைச்சர் சரத்குமார் தனது மொபைல் போன் திரையின் மீது ஒரு வெள்ளை நிறப் பொருளை, வங்கி அட்டை (Bank Card) பயன்படுத்தி வரிசையாக நசுக்கும் வகையில் காட்சியளிக்கும் வீடியோ ஒன்று சமூக வலைத்தளங்களில் வெளியாகி வைரலானது.
இந்த வீடியோவை அடிப்படையாகக் கொண்டு, அவர் போதைப்பொருள் பயன்படுத்தியதாக பலரும் சமூக வலைத்தளங்களில் தவறான விமர்சனங்களையும் குற்றச்சாட்டுகளையும் முன்வைத்தனர்.
இந்த சர்ச்சை குறித்து விளக்கம் அளித்த அமைச்சர், இது சுமார் 2 ஆண்டுகளுக்கு முன்பு தனது குடும்பத்துடன் ஐபிஎல் போட்டி காணச் சென்றபோது எடுக்கப்பட்ட பழைய வீடியோ என்று தெரிவித்துள்ளார்.
அப்போது தனது ஒன்றரை வயது குழந்தைக்கு உடல்நிலை சரியில்லாமல் (சளி) இருந்ததாகவும், மருத்துவர் பரிந்துரைத்த மாத்திரையை குழந்தை விழுங்க மறுத்ததால், அதைத் தூளாக்கி தண்ணீரில் கலந்து கொடுப்பதற்காக மொபைல் திரையில் வைத்து நசுக்கியதாகவும் அவர் கூறியுள்ளார்.
அந்த வீடியோவை தனது நண்பர் ஒருவர் பதிவு செய்திருந்ததாகவும், அதை தற்போது அரசியல் உள்நோக்கத்துடன் தவறான அர்த்தத்தில் பரப்பி வருவதாகவும் அமைச்சர் வேதனை தெரிவித்துள்ளார். அமைச்சரின் இந்த விளக்கத்தை அவரது மனைவியும் அந்த வீடியோவில் உறுதிப்படுத்தியுள்ளார்.
முதலமைச்சர் ஜோசப் விஜய் தலைமையில் போதைப்பொருள் ஒழிப்பு விழிப்புணர்வு பேரணி நடைபெற்ற அதே நாளில், இந்த பழைய வீடியோ திட்டமிட்டு பரப்பப்பட்டதாக அமைச்சரின் ஆதரவாளர்கள் தெரிவித்து வருகின்றனர். சமூக வலைத்தளங்களில் வைரலாகும் அந்த வீடியோவின் இறுதியில் ‘ThugLife’ என்ற டேக்லைன் சேர்க்கப்பட்டிருந்ததும் குறிப்பிடத்தக்கது.
மேலும், அந்த வீடியோவில் அமைச்சர் மொபைல் திரையில் மாத்திரையை நசுக்குவதற்காக ஏடிஎம்/வங்கி அட்டை (ATM/Bank Card) மற்றும் 500 ரூபாய் நோட்டு பயன்படுத்தியதாக கூறப்படுகிறது. இந்த செயல்முறை போதைப்பொருள் நுகர்வோர் பயன்படுத்தும் முறையை ஒத்திருந்ததாக சிலர் விமர்சித்ததால், இந்த சர்ச்சை தீவிரமடைந்துள்ளது.
இந்த வீடியோ ஜூன் 26ஆம் தேதி திட்டமிட்டு பரப்பப்பட்டதாகவும், அது சர்வதேச போதைப்பொருள் ஒழிப்பு தினத்துடன் இணைந்த முக்கிய அரசியல் நிகழ்வுகளுக்கு மத்தியில் வெளியாகியதாகவும் கூறப்படுகிறது. அன்றைய தினம் தமிழக முதலமைச்சர் ஜோசப் விஜய் சென்னையில் ‘Start Run… Stop Drugs’ என்ற போதைப்பொருள் விழிப்புணர்வு மாரத்தான் ஓட்டத்தைத் தொடங்கி வைத்திருந்தார்.
இதனால், தமிழக வெற்றிக் கழக அரசு போதைப்பொருள் ஒழிப்பை தீவிரமாக கையிலெடுத்திருந்த சூழலில், அமைச்சரின் இந்த வீடியோ வெளியானது அரசியல் வட்டாரங்களில் பெரும் சர்ச்சையை ஏற்படுத்தியுள்ளது.
இதுகுறித்து அமைச்சர் சரத்குமார் கூறுகையில், “மைதானத்தில் பலத்த பாதுகாப்பு மற்றும் மக்கள் கூட்டம் மத்தியில் நான் எப்படி போதைப்பொருள் பயன்படுத்த முடியும்? அது தவறான புரிதல் மட்டுமே,” என்று விளக்கம் அளித்துள்ளார்.
மேலும், குழந்தை மாத்திரையை விழுங்க மறுத்ததால் அவசரமாக மைதானத்திலேயே அதை நசுக்க வேண்டிய சூழல் ஏற்பட்டதாகவும் அவர் தெரிவித்துள்ளார்.
அமைச்சரின் விளக்கத்தை சிலர் ஏற்றுக்கொண்டாலும், எதிர்க்கட்சிகள் மற்றும் சமூக வலைத்தள பயனர்கள் சிலர் இதில் சந்தேகம் எழுப்பி, அமைச்சர் தனது பதவியை ராஜினாமா செய்ய வேண்டும் என வலியுறுத்தி வருகின்றனர். மேலும், முதலமைச்சர் ஜோசப் விஜய் இந்த விவகாரம் குறித்து உயர்மட்ட போலீஸ் விசாரணைக்கு உத்தரவிட வேண்டும் என்ற கோரிக்கைகளும் எழுந்துள்ளன.