முன்னாள் பிரதமர் ராஜீவ் காந்தியின் 82வது பிறந்தநாளை முன்னிட்டு, தனது தந்தை மறைந்த பிறகு தாய் சோனியா காந்தி அனுபவித்த வேதனைகள் குறித்து காங்கிரஸ் தலைவர் ராகுல் காந்தி உருக்கமாகப் பதிவிட்டுள்ளார். “அப்பா மறைவுக்குப் பிறகு உங்கள் வாழ்க்கை எவ்வளவு கடினமாக இருந்தது என்பதை நானும் பிரியங்காவும் மட்டுமே அறிவோம்” என்று ராகுல் காந்தி தெரிவித்துள்ளார்.
ராஜீவ் காந்தியின் பிறந்தநாளான ஆகஸ்ட் 20ஆம் தேதி, ராகுல் காந்தி தனது எக்ஸ் தளத்தில் இந்தப் பதிவை வெளியிட்டார். சோனியா காந்தி தனது வாழ்க்கையைப் பற்றி முதன்முறையாக எழுதியுள்ள “Belonging: A Journey of Love” என்ற சுயசரிதை புத்தகம் விரைவில் வெளியாகவுள்ள நிலையில், அதையொட்டியே ராகுல் காந்தியின் இந்த உருக்கமான பதிவு வெளியாகியுள்ளது.
544 பக்கங்களைக் கொண்ட இந்தப் புத்தகம் நவம்பர் 10ஆம் தேதி உலகளவில் வெளியாகவுள்ளது. ஆல்பிரட் ஏ. நாஃப் மற்றும் பெங்குயின் ரேண்டம் ஹவுஸ் ஆகிய பதிப்பகங்கள் இணைந்து இப்புத்தகத்தை அச்சு மற்றும் ஆடியோ வடிவங்களில் வெளியிடுகின்றன.
ராகுல் காந்தி தனது பதிவில், “அப்பா எங்களை விட்டு பிரிந்த அந்த நாளிலிருந்து, வாழ்க்கை உங்கள் மீது வீசிய அனைத்து சவால்களையும் துன்பங்களையும் என்றும் குறையாத தைரியத்தோடும் கண்ணியத்தோடும் நீங்கள் எதிர்கொண்டதை நான் பார்த்திருக்கிறேன்” என்று குறிப்பிட்டுள்ளார்.
“அப்பா மறைவுக்குப் பிறகு உங்கள் வாழ்க்கை எவ்வளவு கடினமாக இருந்தது என்பதை நானும் பிரியங்காவும் மட்டுமே அறிவோம். உங்களைப் போன்ற மிகவும் தனிப்பட்ட விஷயங்களை வெளியில் பகிராத ஒருவர், தனது அழகான கதையை உலகத்திடம் சொல்வது எவ்வளவு கடினம் என்பதையும் நான் அறிவேன். உங்கள் கதையை உங்களை நேசிக்கும் கோடிக்கணக்கான மக்கள் படிக்கப் போகிறார்கள் என்பதை நினைத்து பெருமைப்படுகிறேன்” என்றும் ராகுல் தெரிவித்துள்ளார்.
மேலும், “இன்று அப்பாவின் பிறந்தநாளில், அவர் மேலிருந்து புன்னகையுடன் தனது அழகான சோனியாவைப் பெருமையுடன் பார்த்துக் கொண்டிருப்பதை என்னால் காண முடிகிறது” என்று ராகுல் காந்தி உருக்கமாகக் குறிப்பிட்டுள்ளார்.
சோனியா காந்தியின் இந்தப் புத்தகத்தில் அவரது தனிப்பட்ட வாழ்க்கை, ராஜீவ் காந்தியுடனான காதல் மற்றும் திருமணம், இந்திய அரசியல் குடும்பத்திற்குள் அவர் நுழைந்த விதம் உள்ளிட்ட பல்வேறு முக்கியமான நிகழ்வுகள் இடம்பெற்றுள்ளன.
19 வயதில் கேம்பிரிட்ஜில் படித்துக்கொண்டிருந்தபோது ராஜீவ் காந்தியை முதன்முதலில் சந்தித்தது முதல், இந்தியாவின் முன்னாள் பிரதமர் இந்திரா காந்தியின் மருமகளாக டெல்லிக்கு வந்தது வரையிலான பல்வேறு அனுபவங்களையும் அவர் பதிவு செய்துள்ளார்.
இந்திரா காந்தியை முதன்முதலில் சந்தித்தது, இந்திய கலாச்சாரத்தை கற்றுக்கொண்டது, ஹிந்தி பேசத் தொடங்கியது, புடவை அணியப் பழகியது, இந்திய உணவுகளை ரசிக்கத் தொடங்கியது போன்ற தனிப்பட்ட நினைவுகளும் புத்தகத்தில் இடம்பெற்றுள்ளதாக தெரிவிக்கப்படுகிறது.
ராஜீவ் காந்தியின் ஆரம்பகால வாழ்க்கை, அவர் விமானியாக இருந்த காலம், அவரது சகோதரர் சஞ்சய் காந்தியின் மரணம், இந்திரா காந்தியின் படுகொலை, அதன்பின்னர் ராஜீவ் காந்தியின் படுகொலை என அடுத்தடுத்து சோனியா காந்தி எதிர்கொண்ட பேரிழப்புகளும் புத்தகத்தில் இடம்பெற்றுள்ளன.
ஒரு காலத்தில் அரசியலில் ஈடுபடுவதில் சோனியா காந்திக்கு எந்த விருப்பமும் இல்லை. இந்திரா காந்தியின் மறைவுக்குப் பிறகு ராஜீவ் காந்தி அரசியலுக்கு வருவதையே அவர் கடுமையாக எதிர்த்ததாகவும் கூறப்படுகிறது. ஆனால், காலத்தின் சூழலும், ராஜீவ் காந்தியின் படுகொலையும் அவரை வேறு வழியின்றி அரசியல் களத்திற்குள் கொண்டு வந்ததாக சோனியா காந்தி தனது புத்தகத்தில் குறிப்பிட்டுள்ளார்.
“மிகுந்த மனவேதனையும் பேரிழப்புகளுமே என்னை இந்த பொது அரசியல் உலகிற்குள் தள்ளின. அதுவரை எனது தனிப்பட்ட வாழ்க்கையை நான் மிகவும் தீவிரமாகப் பாதுகாத்து வந்தேன்” என்று சோனியா காந்தி தெரிவித்துள்ளார்.
2004ஆம் ஆண்டு காங்கிரஸ் தலைமையிலான கூட்டணி ஆட்சியை அமைத்தபோது, பிரதமர் பதவி சோனியா காந்தியை நோக்கி வந்தது. ஆனால், அவர் அந்தப் பதவியை ஏற்காமல் மன்மோகன் சிங்கை பிரதமராகத் தேர்வு செய்தார். அந்த முடிவுக்குப் பின்னால் இருந்த காரணங்கள் மற்றும் அப்போது நடைபெற்ற உள்கட்சி விவாதங்கள் குறித்தும் புத்தகத்தில் சோனியா காந்தி விரிவாகப் பேசியுள்ளதாக கூறப்படுகிறது.
இந்தப் புத்தகம் வெறும் அரசியல் வாழ்க்கையின் பதிவாக மட்டுமல்லாமல், இத்தாலியின் ஒரு எளிய குடும்பத்தில் பிறந்த சோனியா மைனோ, இந்தியாவின் மிக முக்கியமான அரசியல் குடும்பத்தின் மருமகளாக மாறிய பயணத்தையும் விவரிக்கிறது.
கடந்த ஆறு தசாப்தங்களில் இந்தியா சந்தித்த பல்வேறு சமூக மற்றும் அரசியல் மாற்றங்களை நேரில் பார்த்த சாட்சியாகவும் தனது அனுபவங்களை அவர் பதிவு செய்துள்ளதாக தெரிவிக்கப்படுகிறது.
1965ஆம் ஆண்டு கேம்பிரிட்ஜில் உள்ள ஒரு காபி கடையில் சோனியா மைனோவும் ராஜீவ் காந்தியும் சந்தித்தது, அவர்களுக்குள் காதல் மலர்ந்தது, பின்னர் திருமணம் நடைபெற்றது உள்ளிட்ட தனிப்பட்ட வாழ்க்கையின் முக்கிய தருணங்களும் இந்தப் புத்தகத்தில் இடம்பெற்றுள்ளன.
இதனிடையே, சோனியா காந்தியின் புத்தகத்தின் அட்டைப்படமும் வெளியாகியுள்ளது. அதில் சோனியா காந்தியும் ராஜீவ் காந்தியும் ஒருவரையொருவர் அன்புடன் பார்த்துக்கொள்ளும் அரிய பழைய புகைப்படம் இடம்பெற்றுள்ளது. இதைப் பார்த்த பிரியங்கா காந்தி, தனது பெற்றோரின் வாழ்க்கை “நம் காலத்தின் மிகச்சிறந்த காதல் கதைகளில் ஒன்று” என்று குறிப்பிட்டு, தனது தாயின் தைரியத்தைப் பாராட்டியுள்ளார்.
புத்தக வெளியீடு குறித்து சோனியா காந்தி வெளியிட்டுள்ள அறிக்கையில், “என் வாழ்க்கையைப் பற்றி எழுதுவது எனக்கு அவ்வளவு எளிதாக இருக்கவில்லை. பல தசாப்தங்களாக என் மனதிற்குள் மிகவும் ஆழமாகப் பூட்டி வைத்திருந்த தனிப்பட்ட தருணங்களையும் அனுபவங்களையும் உலகத்தோடு பகிர்வதற்காக என்னை நானே திறந்து காட்ட வேண்டியிருந்தது” என்று தெரிவித்துள்ளார்.
இந்திய அரசியலில் மிகவும் தனிப்பட்ட விஷயங்களை வெளிப்படையாகப் பேசாதவராக அறியப்படும் சோனியா காந்தி, தனது சுமார் 60 ஆண்டுகால இந்திய வாழ்க்கை, குடும்பம், காதல், இழப்புகள் மற்றும் அரசியல் பயணம் குறித்து விரிவாக எழுதியிருப்பது இந்தப் புத்தகத்தின் மீதான எதிர்பார்ப்பை அதிகரித்துள்ளது.
குறிப்பாக, 2004ஆம் ஆண்டு பிரதமர் பதவியை ஏற்க சோனியா காந்தி ஏன் மறுத்தார்? மன்மோகன் சிங்கை பிரதமராகத் தேர்வு செய்ததன் பின்னணியில் நடைபெற்ற அரசியல் ஆலோசனைகள் என்ன? ராஜீவ் காந்தியின் மரணத்திற்குப் பிறகு சோனியா காந்தி எதிர்கொண்ட மனவேதனைகள் என்ன? என்பது போன்ற பல கேள்விகளுக்கு “Belonging: A Journey of Love” புத்தகம் பதிலளிக்கும் என எதிர்பார்க்கப்படுகிறது.
நவம்பர் 10ஆம் தேதி உலகளவில் வெளியாக உள்ள இந்தப் புத்தகம், சோனியா காந்தியின் தனிப்பட்ட வாழ்க்கை மற்றும் இந்திய அரசியலில் அவர் வகித்த முக்கிய பங்கு குறித்து புதிய தகவல்களை வெளிக்கொண்டு வரும் என அரசியல் வட்டாரங்களில் எதிர்பார்ப்பு நிலவுகிறது.