கர்நாடக அரசு தாக்கல் செய்திருந்த மேகதாது அணையின் திருத்தப்பட்ட விரிவான திட்ட அறிக்கையை (Detailed Project Report – DPR), மத்திய நீர்வள ஆணையம் (Central Water Commission – CWC) நிராகரித்து திருப்பி அனுப்பியுள்ளது. நாடாளுமன்றத்தில், “மேகதாது அணை கட்ட தமிழ்நாட்டின் அனுமதி தேவையில்லை” என்று மத்திய ஜல்சக்தித் துறை இணை அமைச்சர் ராஜ்பூஷண் சௌத்ரி தெரிவித்ததைத் தொடர்ந்து தமிழ்நாட்டில் கடும் அரசியல் சர்ச்சை எழுந்திருந்த நிலையில், தற்போது வெளியாகியுள்ள இந்தத் தகவல் கர்நாடகாவிற்கு பெரும் பின்னடைவாகவும், தமிழ்நாட்டிற்கு சாதகமான முக்கிய முன்னேற்றமாகவும் பார்க்கப்படுகிறது.
மத்திய நீர்வள ஆணையம் வெளியிட்டுள்ள தகவலின்படி, கர்நாடகா தாக்கல் செய்த திருத்தப்பட்ட திட்ட அறிக்கையில் பல்வேறு விதிமீறல்கள் மற்றும் முரண்பாடுகள் இருப்பது கண்டறியப்பட்டதால், அந்த அறிக்கை நிராகரிக்கப்பட்டுள்ளது.
ஆணையத்தின் ஆய்வில், கர்நாடகாவின் புதிய திட்டம் காவிரி நீர் நடுவர் மன்றத்தின் இறுதித் தீர்ப்புக்கும், 2018ஆம் ஆண்டு உச்ச நீதிமன்றம் வழங்கிய தீர்ப்புக்கும் முரணாக இருப்பதாகக் குறிப்பிடப்பட்டுள்ளது.
குடிநீர் தேவையை காரணமாகக் காட்டி, சட்டப்படி அனுமதிக்கப்பட்ட அளவை விட அதிகமாக நீரைச் சேமித்து பயன்படுத்தும் வகையில் திட்டம் வடிவமைக்கப்பட்டுள்ளதாகவும் CWC சுட்டிக்காட்டியுள்ளது. குறிப்பாக, பயன்பாட்டிற்காகச் சேமிக்க அனுமதிக்கப்பட்ட 2.2 டி.எம்.சி அளவை விட அதிகமாக நீரைப் பயன்படுத்த கர்நாடகா திட்டமிட்டுள்ளதாக ஆணையம் தெரிவித்துள்ளது.
மேலும், 2019ஆம் ஆண்டு தாக்கல் செய்யப்பட்ட அசல் திட்ட அறிக்கையில் இடம்பெறாத சிவனசமுத்திரம் நீர்மின் திட்டம், தற்போது தாக்கல் செய்யப்பட்ட திருத்தப்பட்ட அறிக்கையில் இணைக்கப்பட்டிருப்பதையும் ஆணையம் கேள்வி எழுப்பியுள்ளது.
பெங்களூரு மாநகரின் தற்போதைய குடிநீர் தேவை, காவிரி ஆற்றில் இருந்து கர்நாடகா தற்போது பயன்படுத்தி வரும் நீரின் உண்மையான அளவு உள்ளிட்ட முக்கிய தகவல்கள் சமீபத்திய தரவுகளின் அடிப்படையில் வழங்கப்படாமல், பழைய புள்ளிவிவரங்களே பயன்படுத்தப்பட்டுள்ளதாகவும் மத்திய நீர்வள ஆணையம் தெரிவித்துள்ளது.
அதேபோல், கர்நாடக அரசு அளித்துள்ள பல தகவல்கள் ஒன்றுக்கொன்று முரண்படுவதாகவும், அவற்றின் நம்பகத்தன்மை சந்தேகத்திற்குரியதாக இருப்பதாகவும் ஆணையம் தனது அறிக்கையில் குறிப்பிட்டுள்ளது.
சில தினங்களுக்கு முன்பு மாநிலங்களவையில், “உச்ச நீதிமன்றத் தீர்ப்பின்படி காவிரி ஆற்றின் குறுக்கே அணை கட்ட அண்டை மாநிலங்களின் அனுமதி அவசியம் என்று குறிப்பிடப்படவில்லை” என மத்திய ஜல்சக்தித் துறை இணை அமைச்சர் ராஜ்பூஷண் சௌத்ரி தெரிவித்திருந்தார். இந்தக் கருத்து தமிழ்நாட்டில் கடும் எதிர்ப்பையும் அரசியல் பரபரப்பையும் ஏற்படுத்தியது.
அதனைத் தொடர்ந்து, தமிழ்நாடு முதலமைச்சர் சி. ஜோசப் விஜய், பிரதமர் நரேந்திர மோடிக்கு அவசரக் கடிதம் எழுதி, மத்திய அமைச்சரின் பதிலை திரும்பப் பெற வேண்டும் என்றும், காவிரி நடுவர் மன்றத் தீர்ப்புக்கு எதிராக மேகதாது திட்டத்திற்கு எந்தவித அனுமதியும் வழங்கக் கூடாது என்றும் வலியுறுத்தினார்.
இதற்கு முன்பாக, கடந்த ஜூன் 19ஆம் தேதி தமிழ்நாடு சட்டமன்றத்தில் மேகதாது அணைத் திட்டத்திற்கு எதிராக ஒருமனதாக தீர்மானமும் நிறைவேற்றப்பட்டது.
இந்த அரசியல் சூழ்நிலைக்கு மத்தியில், கர்நாடகா தாக்கல் செய்திருந்த திட்ட அறிக்கையை உச்ச நீதிமன்ற வழிகாட்டுதல்களுக்கு ஏற்ப திருத்தி மீண்டும் சமர்ப்பிக்குமாறு கூறி மத்திய நீர்வள ஆணையம் திருப்பி அனுப்பியிருப்பது, தமிழ்நாட்டு விவசாயிகள் மத்தியில் நிம்மதியை ஏற்படுத்தியுள்ளது.
இந்நிலையில், இந்த முக்கிய முடிவு கடந்த ஜூன் 29ஆம் தேதியே எடுக்கப்பட்டிருந்தாலும், தற்போது தான் அது அதிகாரப்பூர்வமாக வெளிச்சத்திற்கு வந்துள்ளது.
தமிழகத்தைச் சேர்ந்த ‘பூவுலகின் நண்பர்கள்’ என்ற சுற்றுச்சூழல் அமைப்பு, தகவல் அறியும் உரிமைச் சட்டத்தின் (RTI) கீழ் தாக்கல் செய்த மனுவிற்கு மத்திய அரசு அளித்த பதிலின் மூலம் இந்த விவரங்கள் தெரியவந்துள்ளன.
மத்திய நீர்வள ஆணையம் மேற்கொண்ட ஆய்வில், 2019ஆம் ஆண்டு கர்நாடகா தாக்கல் செய்த அசல் திட்ட அறிக்கைக்கும், 2026ஆம் ஆண்டு ஏப்ரல் 21ஆம் தேதி தாக்கல் செய்யப்பட்ட திருத்தப்பட்ட திட்ட அறிக்கைக்கும் இடையே பல முக்கிய வேறுபாடுகள் இருப்பது கண்டறியப்பட்டுள்ளது.
59.46 டி.எம்.சி நேரடி சேமிப்புத் திறன் கொண்ட மிகப்பெரிய நீர்த்தேக்கத்தை அமைப்பதற்கான காரணங்கள் போதுமான ஆதாரங்களுடன் விளக்கப்படவில்லை என்றும் ஆணையம் தெரிவித்துள்ளது.
மேலும், முந்தைய திட்ட அறிக்கையில் குறிப்பிடப்பட்டதை விட, தற்போது நுகர்வுப் பயன்பாட்டிற்கான நீரின் அளவை 6.95 டி.எம்.சி ஆக கர்நாடகா உயர்த்தியிருப்பதையும் CWC சுட்டிக்காட்டியுள்ளது.
இதற்கிடையில், மேகதாது அணை விவகாரமும் காவிரி நீர் பகிர்வு பிரச்சனையும் தொடர்பாக முக்கிய அரசியல் முன்னேற்றம் ஒன்று உருவாகியுள்ளது.
தமிழ்நாடு முதலமைச்சர் சி. ஜோசப் விஜய், வரும் ஆகஸ்ட் 3ஆம் தேதி பெங்களூரு செல்ல உள்ளார். கர்நாடக முதலமைச்சர் டி.கே. சிவகுமார், காவிரி நீர்ப்பிடிப்புப் பகுதிகளை ஹெலிகாப்டர் மூலம் நேரில் ஆய்வு செய்ய அழைப்பு விடுத்திருந்தார். ஆனால், அந்த அழைப்பை தமிழக முதலமைச்சர் ஏற்கவில்லை.
அதற்குப் பதிலாக, ஆகஸ்ட் 3ஆம் தேதி பெங்களூருவில் உள்ள விதான சௌதா வளாகத்தில் கர்நாடக முதலமைச்சருடன் நேரடியாகச் சந்தித்து, காவிரி நீர் வெளியீடு மற்றும் மேகதாது அணை விவகாரம் குறித்து பேச்சுவார்த்தை நடத்த முடிவு செய்யப்பட்டுள்ளதாக தகவல்கள் தெரிவிக்கின்றன.
இந்தச் சந்திப்பில் தமிழ்நாடு தலைமைச் செயலாளர் எம். சாய் குமாரும் கலந்து கொள்ளவுள்ளதாக கூறப்படுகிறது.
தமிழக நீர்வளத் துறை அதிகாரிகள் மற்றும் விவசாயிகள் அமைப்புகளின் வாதங்களின்படி, கே.ஆர்.எஸ். (KRS) மற்றும் கபினி அணைகளுக்குக் கீழே, தமிழக எல்லையான பிலிகுண்டுலுவிற்கு மேல்பகுதியில் உருவாகும் உபரி நீரைத் தடுக்கவே சுமார் 80 டி.எம்.சி கொள்ளளவு கொண்ட மேகதாது அணை திட்டமிடப்பட்டுள்ளது.
கர்நாடகா கூறும் குடிநீர் தேவை என்பது உண்மையான காரணம் அல்ல என்றும், தமிழகத்திற்கு உரிய காவிரி நீரைத் தடுத்து, தங்களது பயன்பாட்டிற்காக சேமித்து வைப்பதற்கான முயற்சியே இந்தத் திட்டம் என்றும் தமிழக அதிகாரிகளும், விவசாயிகள் அமைப்புகளும் தொடர்ந்து குற்றம் சாட்டி வருகின்றன.
இதனால், மேகதாது அணை விவகாரம் மீண்டும் தமிழ்நாடு – கர்நாடகா இடையிலான நீர்ப் பங்கீட்டு அரசியலை தீவிரப்படுத்தியுள்ளது. மத்திய நீர்வள ஆணையத்தின் இந்த நிராகரிப்பு, அடுத்தகட்டமாக கர்நாடகா என்ன நடவடிக்கை எடுக்கிறது, மத்திய அரசு எவ்வாறு செயல்படுகிறது, மேலும் இந்த விவகாரம் நீதிமன்றத்தில் எந்த திசையில் நகர்கிறது என்பதையே அனைவரும் உன்னிப்பாக கவனித்து வருகின்றனர்.