தனது திரைப்பட அனுபவங்கள் குறித்து பேசியுள்ள நடிகை அமலா பால், 2019-ஆம் ஆண்டு ரத்னகுமார் இயக்கத்தில் வெளியான ‘ஆடை’ திரைப்படத்தில் நடித்தது குறித்து மனம் திறந்துள்ளார். அந்தப் படத்தின் கதைக்கு அவசியமாக இருந்ததால் துணிச்சலான காட்சிகளில் நடிக்க ஒப்புக்கொண்டதாகக் கூறிய அவர், அதேபோன்ற கதாபாத்திரத்தில் தற்போது நடிக்கச் சொன்னால் நிச்சயம் மறுத்துவிடுவேன் என்று தெரிவித்துள்ளார். அந்தக் காலகட்டத்தில் அது மிகப்பெரிய ஆபத்தான முடிவாக இருந்தாலும், கதையின் தேவையை உணர்ந்தே அதற்கு சம்மதித்ததாகவும் அவர் குறிப்பிட்டுள்ளார்.
‘ஆடை’ படத்தில் அவர் நடித்த காமினி என்ற கதாபாத்திரம் சுதந்திரம் குறித்து அதிகம் பேசும் பெண்ணாக சித்தரிக்கப்பட்டிருந்தது. ஆனால், எதிர்பாராத சூழ்நிலையில் ஆடையின்றி சிக்கிக்கொள்ளும் நிலையில், சமூகத்தின் இருண்ட பக்கத்தை அந்தக் கதாபாத்திரம் எதிர்கொள்வதாகக் கதை அமைக்கப்பட்டிருந்தது.
இந்தக் கதையின் ஆழமும் கதாபாத்திரத்தின் தன்மையும் தன்னை ஈர்த்ததால்தான் அந்தக் காட்சிகளில் நடிக்க ஒப்புக்கொண்டதாக அமலா பால் தெரிவித்துள்ளார். அதே நேரத்தில், அந்தக் காட்சிகள் அழகியல் தன்மையை இழக்காமல் படமாக்கப்பட வேண்டும் என்பதில் உறுதியாக இருந்ததாகவும், இயக்குநர் ரத்னகுமார் மற்றும் ஒளிப்பதிவாளரை முழுமையாக நம்புவதற்கு தனக்கு சுமார் இரண்டு மாதங்கள் தேவைப்பட்டதாகவும் கூறியுள்ளார்.
அந்தக் காட்சிகள் படமாக்கப்பட்டபோது செட்டில் தேவையற்ற நபர்கள் யாரும் அனுமதிக்கப்படவில்லை என்றும் அமலா பால் தெரிவித்துள்ளார். இயக்குநர், ஒளிப்பதிவாளர் உள்ளிட்ட காட்சிக்குத் தேவையான முக்கியமான 15 தொழில்நுட்பக் கலைஞர்கள் மட்டுமே அந்தத் தளத்தில் இருந்ததாகவும், படக்குழுவினர் தனக்கு முழுமையான பாதுகாப்பையும் வசதியையும் ஏற்படுத்திக் கொடுத்ததால்தான் எந்தவித சங்கடமும் இன்றி அந்தக் காட்சிகளில் நடிக்க முடிந்ததாகவும் அவர் கூறியுள்ளார். மேலும், அந்தக் கதாபாத்திரத்திற்கு நியாயம் செய்யும் வகையில் தனது உடல் எடையைக் கணிசமாகக் குறைத்து, உடல்ரீதியாகவும் கடுமையாகத் தயாராகியதாக அவர் குறிப்பிட்டுள்ளார்.
அந்தக் காலகட்டத்தில் தன்னை “போல்ட் நடிகை” என்ற முத்திரைக்குள் சிக்கவைத்துவிடுவார்களோ என்ற பயம் தனக்கும் இருந்ததாக அமலா பால் ஒப்புக்கொண்டுள்ளார். ஆனால், இப்போது அதேபோன்ற கதையில் நடிக்க மறுப்பது பயத்தின் காரணமாக அல்ல என்றும், வயதும் அனுபவமும் மனிதனுக்கு கூடுதல் அறிவையும் முதிர்ச்சியையும் வழங்குவதாகவும் அவர் தெரிவித்துள்ளார்.
தற்போது தனக்கு அத்தகைய கதாபாத்திரங்களில் நடிக்க வேண்டிய அவசியம் இல்லை என்பதாலேயே அந்த முடிவை எடுத்துள்ளதாகவும் விளக்கியுள்ளார். 2026-ஆம் ஆண்டிலும் பெண்களின் உடல் மீதான சமூகத்தின் ஆர்வம் மாறவில்லை என்றும் அவர் சுட்டிக்காட்டியுள்ளார்.
தனது பழைய அனுபவத்தை நினைவுகூர்ந்த அமலா பால், “இப்போது அந்தப் பெண்ணைப் பார்க்கும்போது, ‘ப்ரோ, உனக்கு செம்ம தைரியம்டா’ என்று எனக்கே சொல்லத் தோன்றுகிறது” என்று சிரித்தபடி குறிப்பிட்டுள்ளார். ‘ஆடை’ திரைப்படம் வெளியானபோது தமிழ் சினிமாவில் பெரும் விவாதத்தை ஏற்படுத்தியிருந்த நிலையில், தற்போது அவர் தெரிவித்துள்ள இந்தக் கருத்துகள் மீண்டும் கவனம் பெற்றுள்ளன.
தென்னிந்திய சினிமாவில் கதாநாயகிகள் சித்தரிக்கப்படும் விதம் குறித்து பேசிய அமலா பால், இதற்காக ஒட்டுமொத்தத் திரையுலகையும் குறை சொல்ல முடியாது என்றும், அது குறிப்பிட்ட படத்தின் கதையையும் இயக்குநரின் பார்வையையும் பொறுத்தது என்றும் கூறியுள்ளார்.
குறிப்பாக மலையாள சினிமாவுக்கு அதிக துணிச்சல் இருப்பதாகக் குறிப்பிட்ட அவர், மற்ற மொழிகளைப் போல கதாநாயகர்களுக்கு அளவுக்கு மீறிய பில்டப் கொடுக்காமல், அவர்களை யதார்த்தமான மனிதர்களாக சித்தரிக்கும் போக்கு அங்கு இருப்பதாகப் பாராட்டியுள்ளார். அதேவேளையில், சினிமா தற்போது மாறி வருவதாகவும், பெண் மையக் கதைகளும் திறமையான பெண் கலைஞர்களும் தங்களுக்குரிய இடத்தைப் பெற்று வருவதாகவும் தெரிவித்துள்ளார்.
அமலா பால் தனது திரையுலகப் பயணத்தில் ஒரு கட்டத்தில் சினிமாவிலிருந்து முற்றிலும் விலகிவிடலாம் என்று முடிவு செய்ததாகவும் தெரிவித்துள்ளார். தொடர்ந்து ஒரு படத்திலிருந்து மற்றொரு படத்துக்குச் சென்றுகொண்டிருந்ததால், நிஜ வாழ்க்கையிலிருந்து ஓடி ஒளிவது போன்ற உணர்வு ஏற்பட்டதாகவும், தனது படங்களின் வெற்றி மற்றும் உறவுகளின் மூலமாகவே தனது இருப்பைத் தேடிக்கொண்டிருந்ததாகவும் அவர் கூறியுள்ளார்.
தனது தந்தையின் மறைவுக்குப் பிறகுதான் தன்னுடைய பயங்களை எதிர்கொள்ள வேண்டும் என்ற புரிதல் ஏற்பட்டதாகவும், அதற்காக சினிமாவில் இருந்து தற்காலிக இடைவெளி எடுத்ததாகவும் உருக்கமாக தெரிவித்துள்ளார்.
இந்த இடைவெளிக் காலத்தை அவர் நகைச்சுவையாக “வாஷிங் மெஷின் பேஸ்” என்று அழைத்துள்ளார். தனது மனதில் தேங்கியிருந்த பாரங்களைச் சுத்தம் செய்து, மனரீதியாகத் தன்னை மீண்டும் தயார்படுத்திக்கொள்ள அந்த ஓய்வு காலம் ஒரு ‘டிடாக்ஸ்’ போல் உதவியதாகவும் அமலா பால் தெரிவித்துள்ளார்.
ஒரு முன்னணி நடிகை திடீரென இடைவெளி எடுத்தால், திரையுலகமும் ரசிகர்களும் தன்னை மறந்துவிடுவார்கள் என்று தனது குடும்பத்தினர் அச்சப்பட்டதாகவும், ஆனால் அந்த அச்சங்களைப் பொருட்படுத்தாமல் தனது மன அமைதிக்கே முன்னுரிமை அளித்து ஓய்வு எடுத்ததாகவும் கூறியுள்ளார்.
தென்னிந்திய சினிமாவில் பெண்கள் அதிக கவர்ச்சியாகக் காட்டப்படுவது குறித்தும் பேசிய அவர், அதற்காக ஒட்டுமொத்தத் திரையுலகையும் குறை கூற முடியாது என்றும், குறிப்பிட்ட படத்தின் கதை மற்றும் இயக்குநரின் பார்வையே முக்கியமானது என்றும் மீண்டும் வலியுறுத்தியுள்ளார். தற்போது சினிமா மாற்றம் கண்டு வருவதாகவும், பெண் மையக் கதாபாத்திரங்களும் திறமையான பெண் கலைஞர்களும் தங்களுக்குரிய இடத்தை தைரியமாகப் பெற்று வருவதாகவும் அவர் குறிப்பிட்டுள்ளார்.
சமீபத்தில் ஒரு குழந்தைக்குத் தாயான அமலா பால், தாய்மைப் பருவத்துக்குப் பிறகு தனது வாழ்க்கையைப் பார்க்கும் கண்ணோட்டமே மாறிவிட்டதாக தெரிவித்துள்ளார். தாயான பிறகு தனக்கு கூடுதல் பொறுமையும், திரைப்படங்களையும் கதாபாத்திரங்களையும் தேர்வு செய்வதில் அதிக முதிர்ச்சியும் ஏற்பட்டுள்ளதாக அவர் கூறியுள்ளார். இதன் காரணமாகவே தற்போது தனது கலைத் தேர்வுகளில் முன்பைவிட தெளிவாக முடிவெடுப்பதாகவும் தெரிவித்துள்ளார்.
அமலா பால் கடைசியாக பிரித்விராஜுடன் மலையாளத்தில் வெளியான ‘ஆடுஜீவிதம்’ மற்றும் ஆசிப் அலியுடன் நடித்த ‘லெவல் கிராஸ்’ ஆகிய திரைப்படங்களில் நடித்திருந்தார். இதனிடையே, அவரது தற்போதைய கருத்துகளைத் தொடர்ந்து, ரசிகர்கள் சிலர் அவர் நடித்த பழைய திரைப்படமான ‘சிந்து சமவெளி’யையும் சமூக வலைதளங்களில் ஒப்பிட்டு விவாதித்து வருகின்றனர். அந்தப் படத்தில் நடித்ததையும் பின்னர் அவர் தவறாகக் குறிப்பிட்டிருந்த நிலையில், தற்போது ‘ஆடை’ திரைப்படம் குறித்தும் இதுபோன்ற கருத்தைத் தெரிவித்திருப்பது இணையத்தில் பேசுபொருளாகியுள்ளது.