ஈரானின் புதிய உச்சத் தலைவராகப் பொறுப்பேற்றுள்ள மொஜ்தபா கமேனியின் உடல்நிலை மிகவும் மோசமடைந்துள்ளதாகவும், அவர் உயிருக்கு ஆபத்தான நிலையில் தீவிர சிகிச்சைப் பிரிவில் அனுமதிக்கப்பட்டுள்ளதாகவும் இஸ்ரேலின் சேனல் 14 உள்ளிட்ட சில ஊடகங்கள் செய்தி வெளியிட்டுள்ளன.
அவரது உடல்நிலை குறித்து ஈரான் அரசுத் தரப்பில் இருந்து அதிகாரப்பூர்வமான உறுதியான தகவல் எதுவும் வெளியாகாத நிலையில், இந்தச் செய்திகள் மேற்காசியப் பிராந்தியத்தில் பெரும் பரபரப்பை ஏற்படுத்தியுள்ளன.
2026 பிப்ரவரி 28 அன்று அமெரிக்கா மற்றும் இஸ்ரேல் இணைந்து நடத்தியதாகக் கூறப்படும் வான்வழித் தாக்குதலில், அப்போது ஈரானின் உச்சத் தலைவராக இருந்த அயதுல்லா அலி கமேனி கொல்லப்பட்டதாகத் தெரிவிக்கப்பட்டது. அதே தாக்குதலில் அவரது மகன் மொஜ்தபா கமேனியும் கடுமையாகக் காயமடைந்ததாகவும், அவரது முகத்தில் பலத்த காயங்கள் ஏற்பட்டதாகவும் பல்வேறு புலனாய்வுத் தகவல்கள் கூறுகின்றன.
அதன்பின்னர், மொஜ்தபா கமேனி பொதுவெளியில் நேரடியாகத் தோன்றாமல் இருந்து வருவதாகவும், கடந்த ஐந்து மாதங்களாக அவரது பெயரில் வெளியாகும் தகவல்கள் பெரும்பாலும் ஈரான் அரசாங்க ஊடகங்கள் மூலம் எழுத்துப்பூர்வ அறிக்கைகளாக மட்டுமே வெளியிடப்பட்டு வருவதாகவும் கூறப்படுகிறது.
அவரது பாதுகாப்பைக் கருத்தில் கொண்டு, அவர் இருக்கும் இடம் மிகவும் ரகசியமாக வைக்கப்பட்டுள்ளதாகவும் தகவல்கள் தெரிவிக்கின்றன. அமெரிக்கா அல்லது இஸ்ரேல் ராணுவம் அவரது இருப்பிடத்தைக் கண்டறிந்து மீண்டும் தாக்குதல் நடத்திவிடக் கூடாது என்பதற்காக, அவர் அதிபர் மசூத் பெசெஷ்கியன் மற்றும் அமைச்சர்களுடன் நேரடியாகத் தொடர்புகொள்வதைத் தவிர்த்து வருவதாகவும், இடைத்தரகர்களின் வலையமைப்பு மூலம் எழுத்துப்பூர்வமான உத்தரவுகளை மட்டுமே அனுப்பி வருவதாகவும் சில ஊடகங்கள் கூறுகின்றன.
இதன் காரணமாகவே, நாட்டின் அதிபருக்குக் கூட உச்சத் தலைவரை உடனடியாகத் தொடர்புகொள்வது கடினமாக இருப்பதாகக் கூறப்படுகிறது. சமீபத்திய நேர்காணல் ஒன்றில் ஈரான் அதிபர் மசூத் பெசெஷ்கியனும், “தற்போதைய சூழ்நிலையில் உச்சத் தலைவருடன் தொடர்புகொள்வது மிகவும் கடினமாக உள்ளது” எனத் தெரிவித்ததாக செய்திகள் வெளியாகியுள்ளன.
எனினும், உச்சத் தலைவருக்கும் தனக்கும் இடையே எந்தவிதமான அரசியல் மோதலும் இல்லை என்று பெசெஷ்கியன் மறுத்துள்ளார். நாட்டின் பாதுகாப்பு மற்றும் ஒற்றுமைக்கு உச்சத் தலைவரின் இருப்பு மிகப்பெரிய பலமாக இருப்பதாகவும் அவர் தெரிவித்துள்ளார்.
இதேவேளை, ஈரானின் உள்நாட்டு எதிர்ப்பு ஊடகமான ‘ஈரான்வயர்’ மற்றும் இஸ்ரேலின் ‘ஜெருசலேம் போஸ்ட்’ உள்ளிட்ட ஊடகங்கள், ஈரானிய அதிகார அமைப்பின் உயர்மட்டத்தில் மொஜ்தபா கமேனியின் உடல்நிலை குறித்து கவலைக்கிடமான தகவல்கள் பரவி வருவதாக செய்தி வெளியிட்டுள்ளன.
ஈரான் அரசுக்கு நெருக்கமானதாகக் கூறப்படும் ஒரு வட்டாரத்தைச் சேர்ந்த ஒருவர், “அவர் எந்த நேரத்திலும் உயிரிழக்கக்கூடும். விரைவில் அவரது மரணச் செய்தி வெளியானாலும் நாங்கள் ஆச்சரியப்பட மாட்டோம்” என்று தெரிவித்ததாகவும் சில ஊடகங்கள் குறிப்பிட்டுள்ளன.
மேலும், ஈரானின் மூத்த மதகுரு முகமது பாகர் கர்ராசி வெளியிட்டதாகக் கூறப்படும் தகவலின்படி, ரகசியமாக இருந்துவரும் மொஜ்தபா கமேனி, அதிபர் மசூத் பெசெஷ்கியனுக்கு கடுமையான எச்சரிக்கை விடுத்ததாகவும் செய்திகள் வெளியாகியுள்ளன.
அமெரிக்காவுடனான தற்போதைய போர் பதற்றத்தை கையாள்வதில் அதிபர் பெசெஷ்கியன் ஒப்பீட்டளவில் அமைதியான மற்றும் நடைமுறை அணுகுமுறையை கடைப்பிடிக்க முயன்றதாகவும், இதனால் அதிருப்தியடைந்த மொஜ்தபா கமேனி, “மீண்டும் நீங்கள் ராஜினாமா செய்ய முயன்றால், அதை உடனடியாக ஏற்றுக்கொள்வேன்” என எச்சரித்ததாகவும் கூறப்படுகிறது.
எனினும், இந்தக் குற்றச்சாட்டுகள் மற்றும் அரசியல் பிளவு குறித்த தகவல்களை அதிபர் பெசெஷ்கியன் தொலைக்காட்சி வாயிலாக அதிகாரப்பூர்வமாக மறுத்துள்ளார்.
இதற்கிடையில், அமெரிக்கா மற்றும் இஸ்ரேலுடனான நேரடி ராணுவ மோதல்கள், கடுமையான பொருளாதாரத் தடைகள் மற்றும் கடல்வழி முற்றுகை உள்ளிட்ட நெருக்கடிகளால் ஈரான் ஏற்கனவே கடுமையான சூழலை எதிர்கொண்டு வருகிறது. இந்தப் போர்ச் சூழலில், நாட்டின் உச்சத் தலைவரின் உடல்நிலை குறித்த தகவல்கள் ஈரானிய பாதுகாப்புப் படையினர் மற்றும் பொதுமக்கள் மத்தியில் மேலும் குழப்பத்தையும் பதற்றத்தையும் ஏற்படுத்தியுள்ளதாகக் கூறப்படுகிறது.
மொஜ்தபா கமேனி தற்போது நாட்டின் போர் நடவடிக்கைகளை நேரடியாக வழிநடத்த முடியாத நிலையில் இருப்பதாகவும், தொலைதூரத்தில் இருந்து இடைத்தரகர்கள் மூலம் உத்தரவுகளை வழங்கும் நிலைக்கு தள்ளப்பட்டுள்ளதாகவும் சில சர்வதேச அரசியல் ஆய்வாளர்கள் கருதுகின்றனர். இதனால், அவர் “இருட்டில் ஒலிக்கும் ஒரு குரல்” போன்ற நிலையில் மட்டுமே செயல்பட்டு வருவதாகவும் அவர்கள் மதிப்பிட்டுள்ளனர்.
இந்நிலையில், மொஜ்தபா கமேனியின் உடல்நிலை மிகவும் கவலைக்கிடமாக இருப்பதாகவும், அவர் நீண்ட நாட்களாக சிகிச்சை பெற்று வருவதாகவும், எப்போது வேண்டுமானாலும் அவரது உடல்நிலை மேலும் மோசமடையக்கூடும் என்றும் இஸ்ரேல் ஊடகங்கள் செய்தி வெளியிட்டுள்ளன.
அவரது உடல்நிலை குறித்த அதிகாரப்பூர்வ உறுதிப்படுத்தப்பட்ட தகவல் இதுவரை வெளியாகாத நிலையில், இஸ்ரேல் ஊடகங்களின் இந்தத் தகவல்கள் மேற்காசியப் பிராந்தியத்தில் புதிய பதற்றத்தை ஏற்படுத்தியுள்ளன.
ஈரானின் முன்னாள் உச்சத் தலைவர் அயதுல்லா அலி கமேனி உயிரிழந்த நிலையில், அவரது உடல் சமீபத்தில் அடக்கம் செய்யப்பட்டதாகக் கூறப்படும் சூழலில், தற்போது அவரது மகனும் தற்போதைய உச்சத் தலைவருமான மொஜ்தபா கமேனியின் உடல்நிலை குறித்த இந்த அதிர்ச்சித் தகவல்கள் வெளியாகியிருப்பது குறிப்பிடத்தக்கது.
எனினும், மொஜ்தபா கமேனியின் உடல்நிலை குறித்த இஸ்ரேல் ஊடகங்களின் தகவல்களை ஈரான் அரசுத் தரப்பு அதிகாரப்பூர்வமாக உறுதிப்படுத்தவில்லை என்பதும் கவனிக்கத்தக்கது.