நடிகர் தனுஷ் நடிப்பில் உருவாகி வரும் ‘தனுஷ் 55’ (D55) திரைப்படத்தின் ஃபர்ஸ்ட் லுக் போஸ்டர் மற்றும் அதிகாரப்பூர்வ தலைப்பு, வருகிற ஜூலை 28, 2026 அன்று அவரது பிறந்தநாளை முன்னிட்டு வெளியாகும் என தகவல்கள் தெரிவிக்கின்றன.
ரசிகர்களுக்கு கூடுதல் விருந்தாக, அன்றைய தினமே படத்தின் சிறிய கிளிம்ப்ஸ் அல்லது முன்னோட்டக் காட்சியையும் வெளியிட படக்குழு திட்டமிட்டுள்ளதாக கூறப்படுகிறது.
‘அமரன்’ திரைப்படத்தின் மாபெரும் வெற்றிக்குப் பிறகு, இயக்குநர் ராஜ்குமார் பெரியசாமி இந்தப் படத்தை இயக்கி வருகிறார். தனுஷின் சொந்த தயாரிப்பு நிறுவனமான வண்டர்பார் ஃபிலிம்ஸ் (Wunderbar Films) படத்தை தயாரிக்கிறது.
‘கச்சி சேரா’ பாடல் மூலம் பிரபலமான இளம் இசையமைப்பாளர் சாய் அபயங்கர் இந்தப் படத்திற்கு இசையமைத்து வருகிறார். ஏற்கனவே இரண்டு பாடல்களின் பணிகளை அவர் நிறைவு செய்துள்ளதாக தகவல்கள் வெளியாகியுள்ளன.
இந்தப் படத்தில், வித்தியாசமான ஃபங்க் சிகை அலங்காரத்துடன் உளவாளி கதாபாத்திரத்தில் தனுஷ் நடித்து வருகிறார்.
மேலும், மலையாள திரையுலகின் முன்னணி நடிகர் மம்மூட்டி, நெகட்டிவ் ஷேட் கொண்ட சக்திவாய்ந்த காவல்துறை அதிகாரி வேடத்தில் நடித்துவருகிறார். அவருக்கான படப்பிடிப்பு அண்மையில் முழுமையாக நிறைவடைந்ததாக கூறப்படுகிறது.
நடிகைகள் சாய் பல்லவி மற்றும் ஸ்ரீலீலா ஆகியோர் முக்கிய கதாபாத்திரங்களில் நடித்து வருகின்றனர். இதில் சாய் பல்லவி முதல்முறையாக காவல்துறை அதிகாரி வேடத்தில் நடிப்பதாக தகவல்கள் தெரிவிக்கின்றன.
சென்னையைச் சுற்றியுள்ள பகுதிகளில் விறுவிறுப்பாக நடைபெற்று வரும் படப்பிடிப்பு, ஜூலை 2026-க்குள் முழுமையாக நிறைவடையும் என எதிர்பார்க்கப்படுகிறது. மேலும், இந்தப் படத்தை 2026 ஆம் ஆண்டு தீபாவளி பண்டிகையை முன்னிட்டு அக்டோபர் மாதத்தில் திரையரங்குகளில் வெளியிட படக்குழு திட்டமிட்டுள்ளதாக தகவல்கள் வெளியாகியுள்ளன.