“வாழ்க்கையில் யாருக்குத்தான் துரோகம் நடக்காமல் இருக்கிறது? அது எல்லோருடைய வாழ்க்கையிலும் ஒரு கட்டத்தில் நடக்கக்கூடிய ஒன்றுதான்” என்று இசையமைப்பாளர் டி. இமான் பொதுமேடையில் வெளிப்படையாகப் பேசியுள்ளார்.
முகேன் ராவ் மற்றும் தான்யா நடிப்பில் உருவாகியுள்ள ‘நிறம்’ திரைப்படத்தின் பாடல் மற்றும் டிரெய்லர் வெளியீட்டு விழா அண்மையில் சென்னையில் நடைபெற்றது. இதில் கலந்து கொண்ட டி. இமான், நிகழ்ச்சி முடிவில் செய்தியாளர்களைச் சந்தித்து பல்வேறு கேள்விகளுக்கு பதிலளித்தார்.
அப்போது, கடந்த சில ஆண்டுகளாக அவரது தனிப்பட்ட வாழ்க்கையில் நடந்ததாகக் கூறப்படும் “துரோகம்” குறித்து தொடர்ந்து பேசப்பட்டு வரும் சர்ச்சைகள் தொடர்பாக செய்தியாளர்கள் கேள்வி எழுப்பினர். அதற்கு மிகவும் நிதானமாகவும் முதிர்ச்சியாகவும் பதிலளித்த டி. இமான், “துரோகம் என்பது ஒரு குறிப்பிட்ட நபருக்கு மட்டும் நடக்கும் விஷயம் அல்ல. வாழ்க்கையில் ஒரு கட்டத்தில் அது எல்லோருக்கும் நடக்கக்கூடிய ஒன்றுதான்” என்று தெரிவித்தார்.
மேலும், ‘நிறம்’ திரைப்படத்தில் இடம்பெற்றுள்ள துரோகம் சார்ந்த பாடல் குறித்து பேசிய அவர், பாடலாசிரியர் பா. விஜய் எழுதியுள்ள வரிகள் ஒவ்வொருவரின் வாழ்க்கையுடனும் பொருந்தும் வகையில் இருப்பதாகக் கூறினார். அந்தப் பாடலின் வரிகள் தனக்கு மட்டுமல்லாமல், படத்தின் இயக்குநர் பலராம்கிருஷ்ணா, தயாரிப்பாளர் கே. பிந்துமாதவி மற்றும் ஒட்டுமொத்த படக்குழுவினருக்கும் அவரவர் வாழ்க்கையில் நடந்த அனுபவங்களை நினைவூட்டியதாகவும், இந்தப் பாடலைக் கேட்கும் ஒவ்வொருவரும் தங்கள் வாழ்க்கையில் நடந்த ஏமாற்றம் அல்லது துரோகத்துடன் இதை தொடர்புபடுத்திப் பார்க்க முடியும் என்றும் அவர் தெரிவித்தார்.
அதே நிகழ்வில், அண்மைக்காலமாக தமிழ் திரைப்படங்களுக்கு தேசிய விருதுகள் வழங்கப்படுவது தொடர்பாக எழுந்துள்ள சர்ச்சைகள் குறித்தும் டி. இமானிடம் கேள்வி எழுப்பப்பட்டது. அதற்கு பதிலளித்த அவர், “நம் மாநிலத்தைச் சேர்ந்த கலைஞர்களுக்கு தேசிய அளவில் அங்கீகாரம் கிடைக்கும்போது, அதை ஒட்டுமொத்த தமிழர்களின் பெருமையாகப் பார்க்க வேண்டும். தேசிய விருது தகுதியானதா, தகுதியற்றதா என்ற விவாதங்கள் எப்போதும் இருந்து கொண்டே இருக்கும்.
ஆனால் அதையெல்லாம் தாண்டி, தமிழ்நாட்டைச் சேர்ந்த ஒருவருக்கு தேசிய விருது கிடைத்திருக்கிறது என்பதை நினைத்து நாம் மகிழ்ச்சி அடைய வேண்டும்” என்று தனது கருத்தைப் பதிவு செய்தார்.
டி. இமான் தற்போது “துரோகம்” குறித்து பொதுவாகப் பேசியிருந்தாலும், சமூக வலைத்தளங்களில் பலர் அவரது இந்தப் பேச்சை மீண்டும் நடிகர் சிவகார்த்திகேயனுடன் தொடர்புபடுத்தி விவாதித்து வருகின்றனர். காரணம், கடந்த 2023-ஆம் ஆண்டு அக்டோபரில் அளித்த ஒரு பேட்டியில், “சிவகார்த்திகேயன் எனக்கு மிகப்பெரிய துரோகம் செய்துவிட்டார்.
இந்த ஜென்மத்தில் அவருடன் இனி இணைந்து பணியாற்ற மாட்டேன்” என்று டி. இமான் வெளிப்படையாகக் கூறியிருந்தார். அந்தப் பேச்சு அப்போது தமிழ் திரையுலகில் பெரும் பரபரப்பை ஏற்படுத்தியது.
இருப்பினும், சிவகார்த்திகேயன் தனக்கு என்ன துரோகம் செய்தார் என்பது குறித்து டி. இமான் இதுவரை எந்தத் தெளிவான விளக்கத்தையும் பொதுவெளியில் வெளியிடவில்லை. அந்தப் பழைய பேட்டியிலேயே, “என்னுடைய குழந்தைகளின் எதிர்காலம் மற்றும் நலனை கருத்தில் கொண்டுதான் நான் அமைதியாக இருக்கிறேன். என்னைப் பற்றி யார் தவறாகப் பேசினாலும் அதைப் பற்றி கவலைப்படவில்லை” என்றும் அவர் கூறியிருந்தார்.
இமான் முன்வைத்த அந்தக் குற்றச்சாட்டைத் தொடர்ந்து, அது அவரது விவாகரத்துடன் தொடர்புடையது என்ற வதந்திகள் சமூக வலைத்தளங்களில் பரவின.
இதற்கு அவரது முன்னாள் மனைவி மோனிகா ரிச்சர்ட் உடனடியாக பதிலளித்தார். இமான் கூறிய குற்றச்சாட்டுகளை அவர் மறுத்ததுடன், நடிகர் சிவகார்த்திகேயனுக்கு ஆதரவாக தனது சமூக வலைத்தளப் பக்கத்தில் பதிவு வெளியிட்டு, இமானின் கருத்துகளை விமர்சித்திருந்தார்.
தற்போது ‘நிறம்’ திரைப்பட விழாவில் டி. இமான் பேசிய இந்தக் கருத்தும் மீண்டும் பழைய சர்ச்சையை சமூக வலைத்தளங்களில் பேசுபொருளாக்கியுள்ளது. அவர் எந்த ஒருவரின் பெயரையும் குறிப்பிடாமல் பொதுவாகப் பேசியிருந்தாலும், நெட்டிசன்கள் அவரது பேச்சை சிவகார்த்திகேயன் தொடர்பான பழைய விவகாரத்துடன் இணைத்து பல்வேறு கருத்துகளை பதிவிட்டு வருகின்றனர்.
இதனிடையே, ‘நிறம்’ திரைப்படத்தில் இடம்பெற்றுள்ள துரோகம் சார்ந்த பாடலும், அதில் இடம்பெற்றுள்ள பா. விஜயின் வரிகளும் ரசிகர்களிடையே நல்ல வரவேற்பைப் பெற்று வருகின்றன. டி. இமான் பகிர்ந்துள்ள கருத்துகளும் தற்போது சமூக வலைத்தளங்களில் வைரலாகப் பரவி, மீண்டும் அவரது பழைய சர்ச்சையை நினைவூட்டும் வகையில் பரவலாக விவாதிக்கப்பட்டு வருகின்றன.