தமிழகத்தில் தமிழக வெற்றிக் கழகத் (தவெக) தலைவர் சி. ஜோசப் விஜய் தலைமையில் புதிய அரசு அமைந்துள்ள நிலையில், சென்னை திருவல்லிக்கேணியில் செய்தியாளர்களைச் சந்தித்த மார்க்சிஸ்ட் கம்யூனிஸ்ட் கட்சியின் (சிபிஎம்) மாநிலச் செயலாளர் பெ. சண்முகம், முதல்வர் விஜய் மற்றும் தவெக அரசின் செயல்பாடுகள் குறித்து பல்வேறு விமர்சனங்களை முன்வைத்தார்.
முதல்வர் விஜய் தன்னிடம் இருப்பதாகக் கூறிய 3 துறைகளின் ஊழல் கோப்புகள் குறித்து கேள்வி எழுப்பிய பெ. சண்முகம், கடந்த காலப் பிரச்சினைகளைப் பேசுவதற்குப் பதிலாக, அந்தக் கோப்புகளை ஏன் இன்னும் வெளியிடவில்லை என்றும், அவை எங்கே உள்ளன என்றும் கேட்டார்.
ஊழல் தொடர்பாக சட்டரீதியான நடவடிக்கை எடுக்காமல் பழைய வரலாறுகளைப் பேசுவது மக்களின் கவனத்தைத் திசைதிருப்பும் முயற்சி என்றும் குற்றம்சாட்டினார். ஊழலில் ஈடுபட்டவர்கள் யாராக இருந்தாலும், அவர்கள் மீது சட்டப்படி நடவடிக்கை எடுக்க வேண்டும் என்பதே சிபிஎம்மின் நிலைப்பாடு எனத் தெரிவித்தார்.
சென்னை பட்டினப்பாக்கம்–சீனிவாசபுரம் பகுதியில் சுமார் 1,200 கோடி ரூபாய் மதிப்பீட்டில் புதிய தலைமைச் செயலகம் அமைக்கும் திட்டத்துக்கு சிபிஎம் கடும் எதிர்ப்பு தெரிவித்துள்ளது. மீனவர்களின் வாழ்வாதாரம் பாதிக்கப்படுவதுடன், போக்குவரத்து நெரிசலும் ஏற்படும் என்பதால் எதிர்ப்பு தெரிவிப்பதாக பெ. சண்முகம் கூறினார்.
“முதல்வருக்குத் தெரியாமல் அரசாணை எவ்வாறு வெளியாகும்?” என்று கேள்வி எழுப்பிய அவர், அரசாணை எண் 564, சீனிவாசபுரத்தில் தலைமைச் செயலகம் அமைப்பது தொடர்பான அரசின் முடிவை வெளிப்படுத்துவதாகக் குறிப்பிட்டார். முதல்வருக்குத் தெரியாமல் அரசாணை வெளியிடப்பட்டிருந்தால், அதற்குக் காரணமான அதிகாரிகள் மீது நடவடிக்கை எடுக்க வேண்டும் என்றும், இல்லையெனில் முதல்வரின் ஒப்புதலுடன்தான் அரசாணை வெளியிடப்பட்டதா என்பதை அரசு தெளிவுபடுத்த வேண்டும் என்றும் வலியுறுத்தினார்.
தலைமைச் செயலகம் அமைப்பதற்கான இடத்தை மாற்ற வேண்டும் என்பதே சிபிஎம்மின் நியாயமான கோரிக்கை என்றும், இது தவெக அரசுக்கு எதிரான போராட்டம் அல்ல என்றும் பெ. சண்முகம் விளக்கினார். சென்னையில் மாற்று இடங்கள் உள்ள நிலையில், மீனவர் குடியிருப்புகளை அகற்றி அவர்களின் வாழ்வாதாரத்தைப் பாதிக்கும் வகையில் தலைமைச் செயலகம் அமைப்பது தவறானது என்றும் கூறினார்.
முதல்வர் இன்னும் இறுதி முடிவு எடுக்கவில்லை என தவெக நிர்வாகி ஆதவ் அர்ஜுனா தெரிவித்ததாகக் கூறப்படும் கருத்தையும் அவர் விமர்சித்தார். முதல்வர் இறுதி முடிவு எடுக்காத நிலையில் அரசாணை எவ்வாறு வெளியானது? என்றும், முதல்வருக்கோ சம்பந்தப்பட்ட துறை அமைச்சருக்கோ தெரியாமல் அரசாணை வெளியிட முடியுமா என்றும் கேள்வி எழுப்பினார். மாற்று இடம் குறித்த கோரிக்கையை ஏற்க மறுப்பதற்காகவே ஆதவ் அர்ஜுனா இதுபோன்ற கருத்தைத் தெரிவித்திருப்பதாகத் தாம் கருதுவதாகவும் கூறினார்.
இடைத்தேர்தல் வேட்பாளர்களுக்கு கூடுதல் காவல் பாதுகாப்பு வழங்கப்படுவது குறித்துப் பேசிய பெ. சண்முகம், வேட்பாளர்களுக்கு அச்சுறுத்தல் இருப்பதாகக் காவல்துறைக்கு தகவல் கிடைத்துள்ளதா என்பது தமக்குத் தெரியாது என்றார். உண்மையான அச்சுறுத்தல் காரணமாக பாதுகாப்பு வழங்கப்பட்டிருந்தால், அதுகுறித்து காவல்துறையிடம்தான் விளக்கம் கேட்க வேண்டும் என்றும் தெரிவித்தார்.
பல இடங்களில் தவெக வேட்பாளர்கள் பொதுமக்களால் விரட்டியடிக்கப்படுவதாக செய்திகள் வெளியாகி வருவதாக அவர் கூறினார். ஏற்கெனவே அதிமுக சார்பில் வெற்றி பெற்றவர்கள், தற்போது தவெக சார்பில் அதே பதவிக்குப் போட்டியிடுவதால், “எதற்காக ராஜினாமா செய்தார்கள்? மீண்டும் ஏன் அதே பதவியை அடைய விரும்புகிறார்கள்?” என்ற கேள்வியுடன் பொதுமக்கள் எதிர்ப்புத் தெரிவிப்பதாகக் குறிப்பிட்டார். 20 நாட்களிலேயே ராஜினாமா செய்துவிட்டு மீண்டும் அதே பதவிக்குப் போட்டியிடுவது ஏன் என்ற கேள்வியும் மக்களிடம் எழுந்துள்ளதாகத் தெரிவித்தார்.
திமுக ஆட்சிக் காலத்தில் சிபிஎம் பெரிய அளவில் போராட்டங்களை நடத்தவில்லை என்ற குற்றச்சாட்டை மறுத்த பெ. சண்முகம், அனைத்து ஆட்சிக் காலங்களிலும் மக்கள் பிரச்சினைகளுக்காகத் தங்கள் கட்சி போராடி வருவதாகக் கூறினார். அனகாபுத்தூரில் வீடுகள் இடிக்கப்பட்டது, சேப்பாக்கம்–திருவல்லிக்கேணி பகுதியில் குடிசைகள் அகற்றப்பட்டது, கே.பி. பார்க் மக்களின் பிரச்சினை உள்ளிட்ட பல்வேறு விவகாரங்களில் போராட்டங்கள் நடத்தப்பட்டதாகத் தெரிவித்தார். அப்போதைய மாநிலச் செயலாளர் கே. பாலகிருஷ்ணன் நேரடியாகக் களத்துக்குச் சென்று போராடியதுடன், பிரச்சினைகளைச் சட்டமன்றத்திலும் எழுப்பியதாகக் கூறினார்.
சாம்சங் தொழிலாளர்களின் போராட்டம் உலக அளவில் தாக்கத்தை ஏற்படுத்திய முக்கியமான போராட்டம் என்றும், திமுக ஆட்சிக் காலத்திலும் சிபிஎம் பல்லாயிரக்கணக்கான போராட்டங்களை நடத்தியுள்ளதாகவும் பெ. சண்முகம் தெரிவித்தார். தாங்கள் முன்வைக்கும் கோரிக்கை நியாயமானதா என்பதைப் பற்றியே விவாதிக்க வேண்டும் என்றும், “அப்போது ஏன் போராடவில்லை?” எனக் கேட்பது பிரச்சினையைத் திசைதிருப்பும் முயற்சி என்றும் கூறினார்.
திமுக ஆட்சிக் காலத்தில் 8 மணி நேர வேலை நேரத்தை மாற்றியமைக்கும் வகையில் புதிய சட்டம் கொண்டுவரப்பட்டபோதும், அதற்கு முதலில் எதிர்ப்பு தெரிவித்தது சிபிஎம் சட்டமன்ற உறுப்பினர்கள்தான் என அவர் தெரிவித்தார். தோழமைக் கட்சிகளுடன் இணைந்து வெளிநடப்பு செய்ததுடன், அனைத்து தொழிற்சங்கங்களையும் ஒருங்கிணைத்து மாநிலம் தழுவிய போராட்டம் நடத்தப்பட்டதாகவும், அதன் பின்னரே அப்போதைய முதலமைச்சர் மு.க.ஸ்டாலின் அந்தச் சட்டத்தைத் திரும்பப் பெற்றதாகவும் கூறினார்.
தவெக அரசு மேலும் ஜனநாயகபூர்வமான அணுகுமுறையைக் கடைப்பிடிக்க வேண்டும் என்று பெ. சண்முகம் வலியுறுத்தினார். கலந்துரையாடல், ஒருமித்த கருத்து உருவாக்கம் மற்றும் ஜனநாயக விவாதங்களுக்கு வாய்ப்பளித்தல் ஆகியவை நல்ல அரசின் பண்புகள் என்றார். அரசு தன்னிச்சையாக முடிவுகளையும் அறிவிப்புகளையும் வெளியிடுவதாகவும், கூட்டணிக் கட்சிகளை உதாசீனப்படுத்தும் போக்கு தொடர்வதாகவும் அதிருப்தி தெரிவித்தார்.
தவெக அரசுக்கு சிபிஎம் வெளியில் இருந்து ஆதரவு அளித்து வரும் நிலையில், மக்கள் நலனுக்கு எதிரான முடிவுகள் எடுக்கப்பட்டால் ஆதரவை மறுபரிசீலனை செய்ய நேரிடும் என்றும் பெ. சண்முகம் எச்சரித்தார். மக்களுக்கு சாதகமான திட்டங்கள் மற்றும் சட்டங்களை வரவேற்போம் என்றும், மக்களுக்கு எதிரான நடவடிக்கைகளை உறுதியாக எதிர்ப்போம் என்றும் கூறினார். “ஆதரவு, எதிர்ப்பு, இடித்துரைத்தல், எடுத்துரைத்தல் ஆகிய அனைத்தும் தொடர்ந்து நடைபெறும்” என்றும் அவர் தெரிவித்தார்.