விழுப்புரம் மாவட்டம், செஞ்சி அருகே 7 வயது சிறுமி ஹேமாவதி மாயமான வழக்கில், சிபிசிஐடி காவல்துறையினர் விசாரணையைத் தீவிரப்படுத்தியுள்ளனர். சிறுமி காணாமல் போய் 16 நாட்களைக் கடந்தும் இதுவரை அவரைக் கண்டுபிடிக்க முடியாத நிலையில், வழக்கின் தீவிரத்தைக் கருத்தில் கொண்டு கூடுதல் விசாரணை அதிகாரி ஒருவர் நியமிக்கப்பட்டுள்ளார். மேலும், சிறுமி குறித்து நம்பகமான தகவல் அளிப்பவர்களுக்கு 2 லட்சம் ரூபாய் சன்மானம் வழங்கப்படும் என்றும் அறிவிக்கப்பட்டுள்ளது.
விழுப்புரம் மாவட்டம், செஞ்சி அருகேயுள்ள ஆலம்பூண்டி கிராமத்தைச் சேர்ந்த 7 வயது சிறுமி ஹேமாவதி, கடந்த அக்டோபர் 11ஆம் தேதி தனது பிறந்தநாளைக் கொண்டாடியுள்ளார். அன்று இரவு வீட்டில் தூங்கிக்கொண்டிருந்த சிறுமி, மறுநாள் அதிகாலையில் மாயமானதாகக் கூறப்படுகிறது. இதையடுத்து, அவரது குடும்பத்தினர் அளித்த புகாரின் பேரில் காவல்துறையினர் தேடுதல் பணியைத் தொடங்கினர். பின்னர், இந்த வழக்கு சிபிசிஐடி விசாரணைக்கு மாற்றப்பட்டது.
வழக்கின் அடுத்தகட்ட நடவடிக்கையாக, கூடுதல் விசாரணை அதிகாரியை நியமித்துள்ள சிபிசிஐடி காவல்துறையினர், பல்வேறு கோணங்களில் விசாரணை நடத்தி வருகின்றனர். சிறுமியின் தாயார் பவானி மற்றும் பாட்டி உள்ளிட்ட குடும்ப உறுப்பினர்களிடம் ஏற்கெனவே விசாரணை நடத்தப்பட்ட நிலையில், தற்போது சிறுமியின் தந்தை வடிவேலிடமும் விரிவான விசாரணை நடத்தத் திட்டமிட்டுள்ளதாகத் தகவல்கள் தெரிவிக்கின்றன. குடும்பத்தினருக்கு இந்தச் சம்பவத்தில் ஏதேனும் தொடர்பு உள்ளதா என்பது குறித்தும் விசாரிக்கப்பட்டு வருகிறது.
இதற்கிடையே, செஞ்சி பரதன்தாங்கல் பகுதியைச் சேர்ந்த சரித்திரப் பதிவேடு குற்றவாளியான ராஜதுரையிடம் சிபிசிஐடி போலீசார் விசாரணை நடத்தியுள்ளனர். செஞ்சி சுடுகாடு அருகே அவரிடம் விசாரணை மேற்கொண்டதுடன், சிறுமி படித்து வந்த ஆலம்பூண்டி ஊராட்சி ஒன்றியத் தொடக்கப் பள்ளிக்கும் அவரை அழைத்துச் சென்று, சம்பவத்தன்று அங்கிருந்த சூழ்நிலைகள் குறித்து கள விசாரணை நடத்தியதாகக் கூறப்படுகிறது. இந்த வழக்கில் அவருக்குத் தொடர்பு உள்ளதா என்ற கோணத்தில் விசாரணை நடைபெற்று வருகிறது.
மேலும், இந்த வழக்கு தொடர்பாக இரண்டு சந்தேக நபர்களைப் பிடித்துச் சிபிசிஐடி போலீசார் விசாரணை மேற்கொண்டு வருவதாகத் தகவல்கள் வெளியாகியுள்ளன. ஏற்கெனவே விசாரணைக்கு உட்படுத்தப்பட்ட நபர்களுடன், புதிதாகச் சந்தேக வளையத்துக்குள் கொண்டுவரப்பட்டவர்களிடமும் விசாரணை நடத்தப்பட்டு வருகிறது. இருப்பினும், இதுவரை சிறுமி இருக்கும் இடம் குறித்த உறுதியான தகவல் வெளியாகவில்லை.
சிறுமி மாயமான சம்பவம் தொடர்பாகக் கடலூர், திருவண்ணாமலை, காஞ்சிபுரம் உள்ளிட்ட அண்டை மாவட்டங்களைச் சேர்ந்த சிபிசிஐடி குழுக்களும் விசாரணையில் ஈடுபட்டுள்ளதாகக் கூறப்படுகிறது. தேசிய நெடுஞ்சாலைகள் மற்றும் ரயில் நிலையங்களில் உள்ள கண்காணிப்பு கேமராக்களின் பதிவுகள் ஆய்வு செய்யப்பட்டு வருகின்றன. மேலும், சம்பவத்தன்று அந்தப் பகுதியில் பதிவான 600-க்கும் மேற்பட்ட அலைபேசி எண்களின் கோபுரத் தொடர்பிடத் தகவல்களைச் சைபர் குற்றப்பிரிவு போலீசார் ஆய்வு செய்து வருவதாகத் தெரிவிக்கப்படுகிறது.
சிறுமியின் தாயார் பவானியிடம் பலமுறை விசாரணை நடத்தப்பட்டுள்ளது. தற்போது ஆறாவது முறையாகவும் அவரிடம் விசாரணை நடைபெற்று வருவதாகக் கூறப்படுகிறது. சிறுமி மாயமான அன்று நள்ளிரவு முதல் அதிகாலை வரை வீட்டில் நடந்த சம்பவங்கள், குடும்பப் பின்னணி உள்ளிட்ட பல்வேறு அம்சங்கள் குறித்து விசாரணை மேற்கொள்ளப்பட்டு வருகிறது.
விசாரணையின்போது கிடைத்த தகவல்களின் அடிப்படையில், சிறுமி உயிருடன் இருக்கக்கூடும் என்ற நம்பிக்கை விசாரணைக் குழுவினரிடம் இருப்பதாகத் தகவல்கள் தெரிவிக்கின்றன. இதனால், சிறுமி எங்கே இருக்கிறார், யாரேனும் அவரை மறைத்து வைத்துள்ளனரா அல்லது வேறு நபர்களிடம் ஒப்படைத்துள்ளனரா என்பன உள்ளிட்ட கோணங்களிலும் விசாரணை நடைபெறுவதாகக் கூறப்படுகிறது.
இந்த வழக்கில் சிபிசிஐடி காவல் துணைக் கண்காணிப்பாளர் வேல்முருகன், சிறுமியை விரைவில் மீட்போம் என்ற நம்பிக்கையைத் தெரிவித்துள்ளதாகக் கூறப்படுகிறது. கண்காணிப்பு கேமராப் பதிவுகள் மற்றும் சந்தேக நபர்களின் அலைபேசித் தொடர்புத் தகவல்களை அடிப்படையாகக் கொண்டு விசாரணை நடைபெற்று வருவதாகவும், இன்னும் மூன்று நாட்களுக்குள் சிறுமியை எங்கிருந்தாலும் பத்திரமாக மீட்டுவிடுவோம் என அவர் தெரிவித்ததாகவும் தகவல்கள் வெளியாகியுள்ளன.
இதற்கிடையே, சிறுமி மாயமான அதே காலகட்டத்தில் வீட்டிலிருந்த 2.5 சவரன் தங்க நகைகளும், 60 ஆயிரம் ரூபாய் ரொக்கப் பணமும் காணாமல் போயிருப்பதாகத் தகவல் வெளியாகியுள்ளது. இதுகுறித்து சிறுமியின் தந்தை வடிவேல் சிபிசிஐடி காவல்துறையினரிடம் வாக்குமூலம் அளித்துள்ளதாகக் கூறப்படுகிறது. இதனால், சிறுமி மாயமான சம்பவத்துக்கும் நகை மற்றும் பணம் காணாமல் போனதற்கும் தொடர்பு உள்ளதா என்ற கோணத்திலும் போலீசார் விசாரணையைத் தீவிரப்படுத்தியுள்ளனர்.
சிறுமி ஹேமாவதியைப் பற்றிய துல்லியமான தகவல் தெரிந்தவர்கள் உடனடியாகச் சிபிசிஐடி காவல்துறையினரைத் தொடர்புகொள்ளுமாறு கேட்டுக்கொள்ளப்பட்டுள்ளனர். சிறுமி குறித்து நம்பகமான தகவல் அளிப்பவர்களுக்கு 2 லட்சம் ரூபாய் சன்மானம் வழங்கப்படும் என்றும் அறிவிக்கப்பட்டுள்ளது. பல்வேறு கோணங்களில் விசாரணை தொடர்ந்து நடைபெற்று வரும் நிலையில், சிறுமி விரைவில் மீட்கப்படுவாரா என்ற எதிர்பார்ப்பு அப்பகுதி மக்களிடையே அதிகரித்துள்ளது.