பிறப்பு மற்றும் இறப்பு சான்றிதழ்களை வழங்கும் நடைமுறையில் மத்திய அரசு முக்கியமான மாற்றங்களை முன்வைத்துள்ளது. இதற்காக 2026-ஆம் ஆண்டிற்கான ‘பிறப்பு மற்றும் இறப்பு பதிவுச் சட்டத் திருத்த மசோதா’ (Registration of Births and Deaths Amendment Bill, 2026) மக்களவையில் தாக்கல் செய்யப்பட்டுள்ளது.
இந்த புதிய திருத்தத்தின் மூலம், பிறப்பு அல்லது இறப்பு நிகழ்வுகளை உரிய காலத்திற்குள் பதிவு செய்யாதவர்களுக்கு இனி சான்றிதழ் பெறுவது மிகவும் கடினமான நடைமுறையாக மாற உள்ளது. குறிப்பாக, பல மாதங்கள் அல்லது பல ஆண்டுகள் கழித்து பதிவு செய்ய முயற்சிப்பவர்களுக்கு கடுமையான சரிபார்ப்பு மற்றும் சட்டரீதியான அனுமதிகள் கட்டாயமாக்கப்பட உள்ளன.
தற்போது நடைமுறையில் உள்ள விதிகளின்படி, குறிப்பிட்ட கால தாமதத்திற்குப் பிறகும் நிர்வாக அதிகாரிகளின் அனுமதியுடன் பிறப்பு அல்லது இறப்பு பதிவுகளைச் செய்ய முடிந்தது. ஆனால், புதிய திருத்த மசோதா அமலுக்கு வந்தால், தாமதப் பதிவுகளுக்கான விதிமுறைகள் மேலும் கடுமையாக்கப்படும்.
புதிய விதிமுறைகளின்படி, பிறப்பு அல்லது இறப்பு நிகழ்வை உரிய காலத்திற்குள் பதிவு செய்யாமல், ஒரு ஆண்டுக்கு மேல் மற்றும் இரண்டு ஆண்டுகளுக்குள் பதிவு செய்ய விரும்பினால், சம்பந்தப்பட்ட மாவட்ட நீதிபதி (District Magistrate), துணைப் பிரிவு நீதிபதி (Sub-Divisional Magistrate) அல்லது நிர்வாக நடுவர் (Executive Magistrate) ஆகியோரின் முறையான அனுமதி உத்தரவைப் பெற வேண்டும்.
அதே நேரத்தில், இரண்டு ஆண்டுகளுக்கும் மேலாக பதிவு செய்யாமல் தாமதித்தால், நிர்வாக அதிகாரிகளின் அனுமதி மட்டும் போதுமானதாக இருக்காது. அந்தச் சூழலில், முதல் வகுப்பு நீதித்துறை நடுவர் (First-Class Judicial Magistrate) வழங்கும் நீதிமன்ற உத்தரவு இருந்தால் மட்டுமே பிறப்பு அல்லது இறப்பு பதிவு செய்ய அனுமதி வழங்கப்படும்.
மேலும், நீதிமன்றம் உத்தரவு வழங்குவதற்கு முன்பு, சம்பந்தப்பட்ட பிறப்பு அல்லது இறப்பு உண்மையில் நடைபெற்றதா என்பதை அதிகாரிகள் விரிவான மற்றும் தீவிரமான நேரடி சரிபார்ப்பு (Verification) மூலம் உறுதி செய்வார்கள். அதன் பின்னரே பதிவு செய்ய அனுமதி வழங்கப்படும்.
இதனுடன், தாமதமாக பதிவு செய்பவர்களிடம் கூடுதல் தாமதக் கட்டணமும் (Late Fee) வசூலிக்கப்படும் என்று மசோதாவில் குறிப்பிடப்பட்டுள்ளது.
இந்த புதிய நடைமுறையின் முக்கிய நோக்கம், போலியான பிறப்பு மற்றும் இறப்பு சான்றிதழ்கள் தயாரிக்கப்படுவதை முற்றிலுமாகத் தடுப்பதும், அரசின் டிஜிட்டல் பதிவுகளின் நம்பகத்தன்மையை மேலும் வலுப்படுத்துவதுமாகும்.
இன்றைய சூழலில், பிறப்பு மற்றும் இறப்பு சான்றிதழ்கள் என்பது வெறும் பதிவேடுகள் அல்ல. ஆதார் அட்டை, கடவுச்சீட்டு (Passport), பள்ளி மற்றும் கல்லூரி சேர்க்கை, சொத்துரிமை, வாரிசுச் சான்று, அரசு நலத்திட்டங்கள் உள்ளிட்ட பல்வேறு சட்ட மற்றும் நிர்வாக தேவைகளுக்கான அடிப்படை ஆவணமாக அவை பயன்பட்டு வருகின்றன. இதனால், இவ்வாவணங்களின் நம்பகத்தன்மையை உறுதி செய்யவே இந்தக் கடுமையான விதிமுறைகள் கொண்டு வரப்படுவதாக மத்திய அரசு தெரிவித்துள்ளது.
எனவே, குடும்பத்தில் பிறப்பு அல்லது இறப்பு நிகழ்ந்த உடனேயே, சட்டத்தில் குறிப்பிடப்பட்டுள்ள 21 நாட்களுக்குள் சம்பந்தப்பட்ட உள்ளாட்சி அமைப்புகளில் பதிவு செய்து சான்றிதழைப் பெற்றுக்கொள்வது மிகவும் அவசியம். அவ்வாறு செய்யாதபட்சத்தில், பின்னர் தேவையற்ற அலுவலக நடைமுறைகள், கூடுதல் சரிபார்ப்புகள், அபராதம் மற்றும் நீதிமன்ற உத்தரவு போன்ற சிக்கல்களை எதிர்கொள்ள வேண்டிய நிலை ஏற்படலாம்.
இந்த திருத்த மசோதாவை மத்திய உள்துறை இணை அமைச்சர் நித்யானந்த் ராய் மக்களவையில் தாக்கல் செய்தார். இரண்டு ஆண்டுகளுக்கும் மேலாக தாமதமாகும் பிறப்பு மற்றும் இறப்பு பதிவுகளை நீதித்துறையின் கண்காணிப்பிற்குள் கொண்டு வருவதும், போலிச் சான்றிதழ்களைத் தடுக்க வலுவான சட்டப் பாதுகாப்பை ஏற்படுத்துவதும் இந்த மசோதாவின் முக்கிய நோக்கங்களாகும்.
மத்திய அரசு தற்போது கொண்டு வந்துள்ள இந்தத் திருத்தம், 54 ஆண்டுகள் பழமையான ‘பிறப்பு மற்றும் இறப்பு பதிவுச் சட்டம், 1969’-இன் பிரிவு 13(3)-இல் மாற்றங்களை மேற்கொள்கிறது. ஏற்கனவே 2023-ஆம் ஆண்டு இந்தச் சட்டத்தில் சில முக்கிய திருத்தங்கள் செய்யப்பட்டிருந்தாலும், தாமதப் பதிவுகளை மேலும் ஒழுங்குபடுத்தும் நோக்கில் தற்போது புதிய சட்டத் திருத்தம் கொண்டு வரப்பட்டுள்ளது.
இதுவரை, ஒரு ஆண்டுக்கும் மேல் தாமதமாகும் பிறப்பு அல்லது இறப்பு பதிவுகளுக்கு மாவட்ட ஆட்சியர் (District Magistrate), வருவாய் கோட்டாட்சியர் (Sub-Divisional Magistrate) அல்லது நிர்வாக நடுவர்களின் அனுமதி பெற்றால் பதிவு செய்ய முடிந்தது. ஆனால், புதிய சட்டத்தின் கீழ் இரண்டு ஆண்டுகளுக்கும் மேலான தாமதப் பதிவுகளுக்கான இறுதி அதிகாரம் நிர்வாகத் துறையிடமிருந்து நீதித்துறைக்கு மாற்றப்படுகிறது. அதன்படி, முதல் வகுப்பு நீதித்துறை நடுவர் உத்தரவிட்டால் மட்டுமே பதிவு செய்ய முடியும்.
இந்த மசோதா மக்களவையில் தாக்கல் செய்யப்பட்டபோது, நீட் தேர்வு மற்றும் வினாத்தாள் கசிவு தடுப்புச் சட்டம் தொடர்பான விவாதங்கள் காரணமாக எதிர்க்கட்சிகள் அமளியில் ஈடுபட்டனர். பிரதமர் நரேந்திர மோடி மற்றும் மத்திய உள்துறை அமைச்சர் அமித் ஷா அவையில் இருக்க வேண்டும் என்று வலியுறுத்தி எதிர்க்கட்சி உறுப்பினர்கள் கோஷங்களை எழுப்பிய சூழலிலேயே இந்த மசோதா தாக்கல் செய்யப்பட்டது.
மேலும், புதிய மசோதாவில் ‘நிர்வாக நடுவர்’ (Executive Magistrate) என்ற சொல்லுக்கான சட்ட விளக்கமும் புதுப்பிக்கப்பட்டுள்ளது. இந்திய குற்றவியல் நடைமுறைச் சட்டம் (CrPC, 1973) நீக்கப்பட்டு, தற்போது அமலில் உள்ள பாரதிய நகரிக் சுரக்ஷா சன்ஹிதா (BNSS), 2023-ன் விதிகளுக்கு ஏற்ப சட்ட வரையறை மாற்றப்பட்டுள்ளது.
அதேபோல், இந்த புதிய நடைமுறைகளை அமல்படுத்துவதற்காக இந்தியத் தொகுப்பு நிதியிலிருந்து (Consolidated Fund of India) கூடுதல் நிதி ஒதுக்கப்படாது என்றும், இதற்காக தனியாக அரசுக்கு கூடுதல் நிதிச் சுமை ஏற்படாது என்றும் மசோதாவின் நிதி குறிப்பாணையில் தெரிவிக்கப்பட்டுள்ளது.
இந்த சட்டத்திருத்தம் நாடாளுமன்றத்தின் இரு அவைகளிலும் நிறைவேற்றப்பட்டு, குடியரசுத் தலைவரின் ஒப்புதல் பெற்ற பிறகே நடைமுறைக்கு வரும் என்பது குறிப்பிடத்தக்கது.