பழனி அருள்மிகு தண்டாயுதபாணி சுவாமி கோவிலுக்கு சொந்தமான ரூ.100 கோடி மதிப்புள்ள நிலம், வெறும் ரூ.2 கோடிக்கு போலி ஆவணங்கள் மூலம் சட்டவிரோதமாகப் பத்திரப்பதிவு செய்யப்பட்டதாகக் கூறப்படும் விவகாரம் தமிழகம் முழுவதும் பெரும் அதிர்ச்சியை ஏற்படுத்தியுள்ளது. இந்த மெகா நில மோசடி தொடர்பாக சிபிசிஐடி போலீசார் தீவிர விசாரணை மேற்கொண்டு, முக்கிய ஆவணங்களைப் பறிமுதல் செய்துள்ளனர்.
பழனி கோவில் அடிவாரத்தில் பக்தர்களின் வாகன நிறுத்தமாக பயன்படுத்தப்பட்டு வந்த சுமார் 1.40 ஏக்கர் நிலம், கடந்த ஜூலை 2026 தொடக்கத்தில் தனிநபர்களுக்கு வெறும் ரூ.2 கோடிக்கு சட்டவிரோதமாகப் பத்திரப்பதிவு செய்யப்பட்டதாக குற்றச்சாட்டு எழுந்துள்ளது.
இந்த விவகாரம் தொடர்பாக சிபிசிஐடி அதிகாரிகள், பழனி சார்பதிவாளர் அலுவலகம், நிலத்தை விற்றதாகக் கூறப்படும் நபர், நிலத்தை வாங்கியவர்கள் மற்றும் சாட்சி கையெழுத்திட்டவர்களின் வீடுகளில் அதிகாலை 4 மணி முதல் அதிரடி சோதனை நடத்தினர். இந்த சோதனையில், மோசடி தொடர்புடைய 50-க்கும் மேற்பட்ட முக்கிய கிரையப் பத்திரங்கள் மற்றும் ஆவணங்கள் பறிமுதல் செய்யப்பட்டுள்ளன.
இந்த மோசடி வெளிச்சத்துக்கு வந்ததைத் தொடர்ந்து, சென்னை உயர்நீதிமன்றத்தின் மதுரை கிளை, சட்டவிரோதமாக மேற்கொள்ளப்பட்ட பத்திரப்பதிவை செல்லாது என அறிவித்து அதிரடி உத்தரவு பிறப்பித்தது. மேலும், இந்த முறைகேட்டில் தொடர்புடையதாகக் கூறப்படும் பழனி இணைப் பதிவாளர்-2 ஜஸ்டின் மணிகண்டன் மற்றும் மாவட்டப் பதிவாளர் சசிகலா ஆகியோர் உடனடியாக பணியிடை நீக்கம் செய்யப்பட்டுள்ளனர்.
விசாரணையில், இந்த 1.40 ஏக்கர் நிலம் 1888ஆம் ஆண்டிலேயே ஒரு அறக்கட்டளை உயிலின் மூலம் மடத்திற்கு அர்ப்பணிக்கப்பட்டது என்பதும், அந்த நிலத்தை தனிப்பட்ட சொத்தாக விற்கவோ, கைமாற்றவோ கூடாது என்ற சட்ட மற்றும் நீதிமன்றக் கட்டுப்பாடுகள் இருந்தபோதிலும் பத்திரப்பதிவு செய்யப்பட்டதாகவும் தெரியவந்துள்ளது.
விழுப்புரம் மாவட்டத்தைச் சேர்ந்த முருகன் தாஸ் என்பவர், தனக்கு எந்த உரிமையும் இல்லாத நிலத்திற்கு போலி அறக்கட்டளைத் தலைவர் என்ற அடிப்படையில் உரிமை கோரி, உடுமலைப்பேட்டையைச் சேர்ந்த வெள்ளத்துரை மற்றும் பழனியைச் சேர்ந்த சேதுபதி ஆகியோருக்கு நிலத்தை விற்றதாக குற்றச்சாட்டு எழுந்துள்ளது.
இந்த விவகாரம் குறித்து முன்னாள் பதிவுத்துறை அமைச்சர் மூர்த்தி, பதிவுத்துறையின் உயரதிகாரிகளுக்குத் தெரியாமல் இவ்வளவு பெரிய நில மோசடி நடைபெற வாய்ப்பே இல்லை என்று குற்றம்சாட்டியுள்ளார். மேலும், இந்த மெகா ஊழலின் பின்னணியில் அரசியல் பிரமுகர்கள் அல்லது இடைத்தரகர்கள் யாரேனும் உள்ளனரா என்ற கேள்வியையும் எதிர்க்கட்சிகள் எழுப்பி வருகின்றன.
இதற்கிடையில், விடுமுறையில் இருந்த பழனி சார்பதிவாளருக்குப் பதிலாக, சுமார் 70 கிலோமீட்டர் தொலைவில் உள்ள கொடைக்கானலில் இருந்து சார்பதிவாளர் ஜஸ்டின் மணிகண்டன் வரவழைக்கப்பட்டதாக கூறப்படுகிறது. ஏற்கனவே நில மோசடி தொடர்பான புகார்கள் மற்றும் வழக்குகள் நிலுவையில் இருப்பதாகக் கூறப்படும் அதிகாரியே ஏன் இந்தப் பணிக்காக தேர்வு செய்யப்பட்டார் என்ற கேள்வியும் எழுந்துள்ளது.
மேலும், சர்ச்சைக்குரிய கோப்பை முன்பு நிறுத்தி வைத்ததாக முன்னாள் சார்பதிவாளர் பாலசுந்தர் தெரிவித்த நிலையில், அனைத்து ஆவணங்களும் ஏற்கனவே தயார் நிலையில் இருந்ததாக ஜஸ்டின் மணிகண்டன் நீதிமன்றத்தில் விளக்கம் அளித்துள்ளார். இந்த முரண்பட்ட தகவல்கள் விசாரணைக்கு புதிய பரிமாணத்தை ஏற்படுத்தியுள்ளன.
கோவில் பெயரில் பட்டா உள்ள நிலம் எவ்வாறு தனிநபர்களுக்குப் பத்திரப்பதிவு செய்யப்பட்டது, இதில் அதிகாரிகள் அல்லது இடைத்தரகர்கள் கூட்டுச் சதியில் ஈடுபட்டனரா, கையூட்டு பரிமாற்றம் நடைபெற்றதா, இந்த மோசடிக்குப் பின்னால் செயல்பட்ட நெட்வொர்க் யார் என்பன உள்ளிட்ட அனைத்து கோணங்களிலும் சிபிசிஐடி விசாரணை நடத்த வேண்டும் என்ற கோரிக்கை வலுத்துள்ளது.
அதேபோல், கோவில் சொத்துகளைப் பாதுகாக்க வேண்டிய அறநிலையத் துறை மற்றும் பத்திரப்பதிவுத் துறை தங்களது பொறுப்பை முறையாக நிறைவேற்றியதா என்பதையும் விசாரிக்க வேண்டும் என பக்தர்கள் வலியுறுத்துகின்றனர்.
கோவில் சொத்துக்கள் முழுமையாக மீட்கப்பட்டு, இதுபோன்ற மோசடிகள் இனி நடைபெறாத வகையில் கடுமையான பாதுகாப்பு மற்றும் கண்காணிப்பு நடவடிக்கைகள் மேற்கொள்ளப்பட வேண்டும் என்பதே பக்தர்கள் மற்றும் பொதுமக்களின் முக்கிய கோரிக்கையாக உள்ளது.