செயற்கை நுண்ணறிவு (Artificial Intelligence – AI) தொழில்நுட்பம் இன்று மனித கற்பனைக்கே எட்டாத பல பணிகளை மிக எளிதாக செய்து முடித்து வருகிறது. ஆனால், இந்த வசதியின் பின்னால் பூமிக்கு ஒரு பெரிய ஆபத்து காத்திருக்கிறது என எச்சரிக்கை எழுந்துள்ளது.
ஏஐ கருவிகள் இயங்குவதற்காக பயன்படுத்தப்படும் பிரம்மாண்டமான தரவு மையங்கள் (Data Centres), எதிர்காலத்தில் உலகளாவிய குடிநீர் மற்றும் மின்சார பற்றாக்குறைக்கு முக்கிய காரணமாக அமையலாம் என்று ஐக்கிய நாடுகள் சபை எச்சரிக்கை விடுத்துள்ளது.
ஐ.நா. பல்கலைக்கழகத்தின் சமீபத்திய அறிக்கையின்படி, 2030 ஆம் ஆண்டிற்குள் இந்த ஏஐ தரவு மையங்கள் பயன்படுத்தும் நீரின் அளவு, சுமார் 130 கோடி மக்களின் ஒரு ஆண்டுக் குடிநீர் தேவைக்கு சமமாக இருக்கும் என்று கூறப்பட்டுள்ளது.
இந்த தரவு மையங்களில் உள்ள சர்வர்களை குளிர்விக்க மட்டும் சுமார் 9.3 டிரில்லியன் லிட்டர் தண்ணீர் தேவைப்படுவதாகவும் அறிக்கையில் தெரிவிக்கப்பட்டுள்ளது. ஏற்கனவே நீர் பற்றாக்குறையால் பாதிக்கப்பட்ட பல நாடுகளுக்கு இது பெரும் அச்சுறுத்தலாக மாறியுள்ளது.
தண்ணீரைத் தாண்டி மின்சார பயன்பாட்டிலும் ஏஐ தொழில்நுட்பம் மிகப்பெரிய அளவில் வளர்ச்சி கண்டுள்ளது. 2030 ஆம் ஆண்டிற்குள் உலகளாவிய தரவு மையங்கள் சுமார் 945 டெராவாட்-மணி நேர மின்சாரத்தை நுகரும் என்று எதிர்பார்க்கப்படுகிறது. இது பாகிஸ்தான், பங்களாதேஷ் மற்றும் நைஜீரியா ஆகிய மூன்று நாடுகளின் ஒட்டுமொத்த ஆண்டு மின்சார பயன்பாட்டை விட அதிகமாகும்.
மேலும், 2025 ஆம் ஆண்டிலேயே இந்த தரவு மையங்களின் மின்சார பயன்பாடு, ஒரு நாட்டின் மொத்த பயன்பாட்டுடன் ஒப்பிடப்பட்டால் உலகளவில் 11வது இடத்தில் இருப்பதாகவும் குறிப்பிடப்பட்டுள்ளது.
மின்சாரம் மற்றும் தண்ணீர் பயன்பாட்டைத் தவிர, இந்த தரவு மையங்கள் சுற்றியுள்ள பகுதிகளில் வெப்பநிலையையும் அதிகரிக்கின்றன. அவை இயங்கத் தொடங்கிய பிறகு, அந்த பகுதிகளில் சராசரியாக 2°C முதல் சில இடங்களில் 9°C வரை வெப்பநிலை உயர்வதாக ஆய்வுகள் தெரிவிக்கின்றன. இதனால் சுமார் 34 கோடி மக்களின் அன்றாட வாழ்க்கை மேலும் வெப்பமடைகிறது.
இதன் விளைவாக, அமெரிக்காவில் நடத்தப்பட்ட ஒரு ஆய்வில் 71% மக்கள் தங்கள் குடியிருப்பு பகுதிகளில் ஏஐ தரவு மையங்கள் அமைக்கப்படுவதற்கு கடுமையான எதிர்ப்பை தெரிவித்துள்ளனர். அதேசமயம், பலர் ஏஐ மையங்களை விட அணுமின் நிலையங்கள் தங்கள் பகுதிக்கு அருகில் அமைவதையே பாதுகாப்பானதாகக் கருதுகின்றனர் என்பது ஆச்சரியமான தகவலாகும்.
தொழில்நுட்ப வளர்ச்சி மனித இன முன்னேற்றத்திற்கு அவசியமானதாக இருந்தாலும், அது இயற்கை வளங்களைப் பாதிக்காமல் இருக்க வேண்டியது அவசியம். 130 கோடி மக்களின் தண்ணீர் தேவையும், பூமியின் வெப்பநிலையும் ஆபத்தில் சிக்கக்கூடாது என்ற கேள்வி தற்போது உலகளவில் எழுந்துள்ளது.
எனவே, ஏஐ நிறுவனங்கள் தங்களது குளிரூட்டும் முறை மற்றும் ஆற்றல் மேலாண்மை முறைகளில் உடனடி மாற்றங்களை மேற்கொள்ளாவிட்டால், எதிர்கால தலைமுறை டிஜிட்டல் வசதிகளைப் பெற்றிருந்தாலும், குடிநீரும் வாழ்வதற்கான சூழலும் இல்லாத அபாயத்தை எதிர்கொள்ள வேண்டிய நிலை உருவாகலாம் என நிபுணர்கள் எச்சரிக்கின்றனர்.