பொருளதாரம் நாசமாய் போச்சு… ஜனநாயகம் கேள்விக்குறியாச்சி… பாஜகவால் இந்தியாவுக்கு காத்திருக்கும் பேராபத்து – அபாய சங்கு ஊதும் காங்கிரஸ்…! 

பணமதிப்பிழப்பு நடவடிக்கையால் நாட்டின் பொருளாதாரத்தையும், வாக்குத் திருட்டு மூலம் ஜனநாயகத்தையும் ஒன்றிய பாஜக அரசு முற்றிலும் சீரழித்துவிட்டதாகக் காங்கிரஸ் கடுமையாக விமர்சித்துள்ளது.

2016ஆம் ஆண்டு நவம்பர் 8ஆம் தேதி கொண்டுவரப்பட்ட பணமதிப்பிழப்பு நடவடிக்கையின் 10ஆம் ஆண்டு நிறைவையொட்டி, மத்திய அரசைக் காங்கிரஸ் பொதுச்செயலாளர் ஜெய்ராம் ரமேஷ் கடுமையாகச் சாடியுள்ளார். 500 மற்றும் 1,000 ரூபாய் நோட்டுகளைத் தடை செய்த நடவடிக்கை மிகப்பெரிய பேரழிவு என்றும், அது நாட்டின் பொருளாதாரத்தை நிலைகுலையச் செய்துவிட்டதாகவும் அவர் தனது சமூக வலைதளப் பதிவில் குறிப்பிட்டுள்ளார்.

கருப்புப் பணத்தை ஒழிப்பது, கள்ள நோட்டுகளைக் கட்டுப்படுத்துவது உள்ளிட்ட அரசின் இலக்குகள் எதையும் பணமதிப்பிழப்பு நடவடிக்கை எட்டவில்லை என்று காங்கிரஸ் தொடர்ந்து கூறிவந்த நிலையில், தற்போது அது நிரூபிக்கப்பட்டுள்ளதாகவும் ஜெய்ராம் ரமேஷ் தெரிவித்துள்ளார்.

ரிசர்வ் வங்கியின் தரவுகளின்படி, பணமதிப்பிழப்பின்போது தடை செய்யப்பட்ட ரூபாய் நோட்டுகளில் 99.3 சதவீதம் மீண்டும் வங்கி அமைப்புக்கே திரும்பியதை அவர் சுட்டிக்காட்டியுள்ளார். இதன் மூலம் பெருமளவிலான கருப்புப் பணம் அழிக்கப்படும் என்ற அரசின் ஆரம்பகால எதிர்பார்ப்பு நிறைவேறவில்லை என்றும் குறிப்பிட்டுள்ளார்.

பணமதிப்பிழப்பு நடவடிக்கையால் சிறு, குறு தொழில் நிறுவனங்கள் கடுமையாகப் பாதிக்கப்பட்டதாகவும், தினக்கூலித் தொழிலாளர்கள் மற்றும் விவசாயிகளும் பாதிப்புகளைச் சந்தித்ததாகவும் ஜெய்ராம் ரமேஷ் குற்றம்சாட்டியுள்ளார். இதனால் நாட்டின் பொருளாதார வளர்ச்சி பின்னடைவைச் சந்தித்ததாகவும் அவர் புள்ளிவிவரங்களுடன் சுட்டிக்காட்டியுள்ளார்.

பொருளாதாரத்தைப் பாதித்ததுடன் மட்டுமின்றி, எஸ்.ஐ.ஆர். (SIR) எனப்படும் வாக்காளர் பட்டியல் சிறப்புத் தீவிரத் திருத்த நடவடிக்கை மூலம் ஜனநாயகத்தையும் பாஜக அரசு நசுக்க முயற்சிப்பதாக அவர் விமர்சித்துள்ளார். தேர்தல் மற்றும் அரசியல் அமைப்புகளைத் தனது கட்டுப்பாட்டுக்குள் கொண்டுவர மத்திய அரசு முயற்சிப்பதாகவும் குற்றம்சாட்டியுள்ளார்.

மேலும், தேர்தல் ஆணையம், சிபிஐ, அமலாக்கத்துறை உள்ளிட்ட தன்னாட்சி பெற்ற அமைப்புகளை மத்திய அரசு தனது கட்டுப்பாட்டில் வைத்துக்கொண்டு எதிர்க்கட்சிகளை ஒடுக்குவதாகவும் ஜெய்ராம் ரமேஷ் தெரிவித்துள்ளார். எஸ்.ஐ.ஆர். நடவடிக்கை மூலம் நாட்டின் ஒட்டுமொத்த அரசியல் மற்றும் தேர்தல் கட்டமைப்பையும் சீர்குலைக்க முயற்சிப்பதாகவும் அவர் விமர்சித்துள்ளார்.