காதல் என்பது கவிதை என்பார்கள். ஆனால் அதே காதல் சந்தேகத் தீயில் வெந்து வெறியாக மாறும்போது, அது கத்தியாகிறது… ரத்தம் குடிக்கிறது… இரண்டு உயிர்களை ஒரே இரவில் பலி வாங்குகிறது. ஓசூர் அடுத்த ஜி.மங்கலத்தில் அக்டோபர் 26-ம் தேதி அரங்கேறியிருப்பது அப்படியொரு பதைபதைக்கும் துயரச் சம்பவம்!
கல்லூரி வளாகத்தில் மலர்ந்த காதல்!
திருப்பத்தூர் மாவட்டம், ஜோலார்பேட்டை சின்னவேப்பம்பட்டைச் சேர்ந்த பிரதீப் (25). பொன்னேரியைச் சேர்ந்த திவிஜா ஸ்ரீ (20). இருவரும் கல்லூரியில் ஒன்றாகப் படித்தவர்கள். புத்தகங்களுக்கு இடையே பூத்த காதல், வகுப்பறைகளைத் தாண்டி வளர்ந்தது.
படிப்பு முடிந்ததும், வேலை தேடி இருவரும் கிருஷ்ணகிரி மாவட்டம் ஓசூருக்கு இடம்பெயர்ந்தனர். வெவ்வேறு தனியார் நிறுவனங்களில் வேலை. பிரதீப், ஜி.மங்கலத்தில் உள்ள தனியார் நிறுவனத்தில் பணி. நிறுவனம் கொடுத்த தனி அறையில் தங்கியிருந்தான். ஓசூரிலும் தொடர்ந்தது அவர்களின் சந்திப்புகள். ஆனால், அந்தக் காதலுக்குள் எப்போது சந்தேகம் நுழைந்தது என்பதுதான் இப்போது போலீஸாரின் மில்லியன் டாலர் கேள்வி!
அக்டோபர் 26: அந்தக் கறுப்பு நாள்!
சம்பவத்தன்று பிரதீப், திவிஜா ஸ்ரீயை தனது ஜி.மங்கலம் அறைக்கு வரவழைத்திருக்கிறான். மூடிய அறைக்குள் இருவருக்கும் இடையே பேச்சு வளர்ந்து, வாக்குவாதமாக வெடித்திருக்கிறது. குரல் உயர்ந்திருக்கிறது.
ஒருகட்டத்தில் ஆத்திரத்தின் உச்சிக்குப் போன பிரதீப், அங்கிருந்த கத்தியை எடுத்திருக்கிறான். “ப்ளீஸ் வேண்டாம்… விட்டுடுங்க பிரதீப்..” என திவிஜா ஸ்ரீ அலறி, கதறியிருக்கிறார். அந்தக் கதறல் அவன் காதுகளை எட்டவில்லை. கண்மூடித்தனமாக சரமாரியாகக் குத்தியிருக்கிறான். ரத்த வெள்ளத்தில் சரிந்த திவிஜா ஸ்ரீ, துடிதுடித்து அந்த அறையிலேயே பரிதாபமாக உயிரிழந்தார்.
நண்பர்களுக்குப் பறந்த புகைப்படம் – உறைந்துபோன வாட்ஸ்அப் குழுக்கள்!
கொலை செய்த பதற்றத்திலும், பிரதீப் செய்த அடுத்த காரியம்தான் போலீஸாரையே அதிரவைத்தது. அறையில் கிடந்த திவிஜா ஸ்ரீயின் சடலத்தைப் புகைப்படம் எடுத்து, தனது நண்பர்களுக்கு அனுப்பியதாகச் சொல்லப்படுகிறது. அந்தப் புகைப்படம் வாட்ஸ்அப்பில் பரவ, திருப்பத்தூர் – ஓசூர் பரபரப்பில் மூழ்கியது.
ஓசூர் – பாகலூர் சாலையில் திகில் கிளைமாக்ஸ்!
காதலியைக் கொன்றுவிட்டு அறையிலிருந்து வெளியேறிய பிரதீப், நேராக ஓசூர் – பாகலூர் சாலைக்கு ஓடியிருக்கிறான். அங்கு வேகமாக வந்த லாரியின் முன் திடீரெனப் பாய்ந்திருக்கிறான். தூக்கி வீசப்பட்டு ரத்த வெள்ளத்தில் துடித்தவனை, அக்கம்பக்கத்தினர் மீட்டு 108 ஆம்புலன்ஸ் மூலம் ஓசூர் அரசு மருத்துவமனைக்கு அனுப்பினர்.
உயிருக்குப் போராடிய பிரதீப்புக்கு தீவிர சிகிச்சை அளிக்கப்பட்டது. ஆனால், சிகிச்சை பலனின்றி பரிதாபமாக உயிரிழந்தான். சாகும் தறுவாயில், தான் காதலியைக் கொலை செய்ததை ஒப்புக்கொண்டு வாக்குமூலம் கொடுத்ததாகவும் தகவல் வெளியாகியுள்ளது.
முடிச்சுகளை அவிழ்க்கும் பாகலூர் போலீஸ்!
தகவலறிந்து விரைந்த பாகலூர் போலீஸார், இருவரின் உடல்களையும் கைப்பற்றி பிரேதப் பரிசோதனைக்கு அனுப்பினர். வழக்குப்பதிவு செய்துள்ள போலீஸார், இது வெறும் காதல் தகராறா… அல்லது பின்னணியில் வேறு ஏதேனும் அழுத்தமா…? பிரதீப்பின் செல்போன் உரையாடல்கள், நண்பர்கள் வட்டம் என அனைத்துக் கோணங்களிலும் விசாரணையைத் தீவிரப்படுத்தியுள்ளனர்.
ஒரு கத்திக்குத்து… இரண்டு குடும்பங்களின் கனவுகளையும் சிதைத்துவிட்டது. கல்லூரிக் காதலுடன் ஓசூரில் வாழ்க்கையைத் தொடங்கலாம் என வந்த இரண்டு இளம் உயிர்கள், இப்படி ரத்தச் சரித்திரமாக முடிந்திருப்பது ஜோலார்பேட்டையிலும், ஓசூரிலும் பெரும் சோக அலையை ஏற்படுத்தியுள்ளது.