உலகிலேயே அதிகம் விற்பனையான மொபைல் போன் என்ற சாதனையில், ஆப்பிளின் ஐபோனை விட நோக்கியா மாடல்கள் தொடர்ந்து முன்னிலையில் உள்ளன. ஆப்பிள் நிறுவனத்தின் வரலாற்றில் அதிகம் விற்பனையான மாடல்களாக iPhone 6 மற்றும் iPhone 6 Plus உள்ளன.
இவை இணைந்து சுமார் 224 மில்லியன், அதாவது 22.4 கோடி யூனிட்டுகள் விற்பனையாகியுள்ளன. ஆனால், ஒட்டுமொத்த மொபைல் போன் வரலாற்றில் Nokia 1110 சுமார் 250 மில்லியன், அதாவது 25 கோடி யூனிட்டுகளுடன் முதலிடத்திலும், Nokia 1100 சுமார் 248 மில்லியன் யூனிட்டுகளுடன் இரண்டாவது இடத்திலும் உள்ளன.
இதற்கிடையே, ஆப்பிளின் iPhone 18 Pro மாடலில் Variable Aperture எனப்படும் மாறும் துளை கொண்ட கேமரா தொழில்நுட்பம் இடம்பெற உள்ளதாகக் கூறப்படுவது தொழில்நுட்ப உலகில் கவனம் பெற்றுள்ளது. இந்த தொழில்நுட்பத்தை ஆப்பிள் புதிய சாதனையாக முன்னிறுத்தினாலும், இதுபோன்ற கேமரா தொழில்நுட்பம் பல ஆண்டுகளுக்கு முன்பே பிற நிறுவனங்களின் போன்களில் பயன்படுத்தப்பட்டதை நெட்டிசன்கள் சுட்டிக்காட்டி வருகின்றனர்.
உண்மையில், மொபைல் போனில் Variable Aperture தொழில்நுட்பத்தை முதன்முதலில் பயன்படுத்தியது Motorola நிறுவனம். 2008ஆம் ஆண்டு வெளியான Motorola Motozine ZN5 மாடலில் இந்த தொழில்நுட்பம் அறிமுகமானது. அதற்குப் பிறகு 2009ஆம் ஆண்டு Nokia N86 8MP மாடலில் Variable Aperture பயன்படுத்தப்பட்டது.
அதில் f/2.4, f/3.2 மற்றும் f/4.8 என மூன்று விதமான Aperture அமைப்புகள் வழங்கப்பட்டிருந்தன. கேமராவுக்குள் செல்லும் ஒளியின் அளவைக் கட்டுப்படுத்தி, வெவ்வேறு வெளிச்சச் சூழல்களில் சிறந்த புகைப்படங்களை எடுக்க இந்த தொழில்நுட்பம் உதவுகிறது.
நோக்கியாவுக்குப் பிறகு 2017ஆம் ஆண்டு Samsung W2018 மாடலிலும், 2018ஆம் ஆண்டு Samsung Galaxy S9 மாடலிலும் இதே தொழில்நுட்பம் பயன்படுத்தப்பட்டது. பின்னர் Xiaomi 14 Ultra போன்ற மாடல்களிலும் Variable Aperture கேமராக்கள் இடம்பெற்றன.
இதனால், “நோக்கியா பல ஆண்டுகளுக்கு முன்பே செய்த தொழில்நுட்பத்தை ஆப்பிள் தற்போது புதிதாக அறிமுகப்படுத்துகிறது” என சமூக வலைத்தளங்களில் ஆண்ட்ராய்டு ரசிகர்கள் மீம்ஸ்கள் மற்றும் வீடியோக்கள் மூலம் விமர்சித்து வருகின்றனர்.
இதுபோன்ற தொழில்நுட்ப வரலாறு டச் ஸ்கிரீன் விஷயத்திலும் நோக்கியாவுக்கு இருப்பதாகக் கூறப்படுகிறது. ஆப்பிள் 2007ஆம் ஆண்டு முதல் ஐபோனை அறிமுகப்படுத்தி டச் ஸ்கிரீன் ஸ்மார்ட்போன் சந்தையில் பெரிய மாற்றத்தை ஏற்படுத்தியது.
ஆனால், அதற்கு மூன்று ஆண்டுகளுக்கு முன்பே, 2004ஆம் ஆண்டு நோக்கியா தனது ஆராய்ச்சி ஆய்வகத்தில் இணைய வசதியுடன் கூடிய முழுமையான டச் ஸ்கிரீன் போன் தொடர்பான திட்டத்தை உருவாக்கியிருந்ததாகத் தகவல்கள் கூறுகின்றன.
ஆனால், அதிக செலவு மற்றும் மக்கள் மத்தியில் பெரிய வரவேற்பு கிடைக்காது என்ற அச்சத்தால் அந்தத் திட்டம் கைவிடப்பட்டது. பின்னர் ஆப்பிளின் ஐபோன் வெற்றியடைந்தது. நோக்கியாவின் அந்த முடிவு அதன் வரலாற்றில் முக்கியமான தவறாகக் குறிப்பிடப்படுகிறது.
iPhone 18 Pro-வின் Variable Aperture அமைப்பு f/1.48 முதல் f/4.0 வரை மாறக்கூடியதாக இருக்கும் எனக் கூறப்படுகிறது. இதனால், இயற்பியல் ரீதியாக லென்ஸின் துளையை மாற்றும் வசதி கிடைப்பதால், ஆப்பிளின் சொந்த Camera App-லேயே கூடுதல் Pro Manual Controls வழங்கப்படலாம் என எதிர்பார்க்கப்படுகிறது. இதற்கு முன்பு ISO, Shutter Speed போன்ற மேம்பட்ட அமைப்புகளை முழுமையாகக் கட்டுப்படுத்த மூன்றாம் தரப்பு கேமரா செயலிகளைப் பயன்படுத்த வேண்டிய நிலை இருந்தது.
இந்த Variable Aperture அமைப்பில் பல நுண்ணிய நகரும் பாகங்கள் இடம்பெறுவதால், அதன் நீடித்த தன்மை மற்றும் பழுதுபார்ப்பு தொடர்பிலும் கேள்விகள் எழுந்துள்ளன. முந்தைய Samsung Galaxy S9 போன்ற போன்களில் லென்ஸ் பிளேடுகள் சிக்கி கேமரா செயலிழந்ததாகப் புகார்கள் இருந்தன.
iPhone 18 Pro-வில் ஆப்பிள் இதை எவ்வாறு கையாளும் என்பது கவனிக்கப்படுகிறது. Teardown ஆய்வுகளில், புதிய ஐபோனின் மெக்கானிக்கல் Aperture பிளேடுகள் மிகவும் நுண்ணியதாக வடிவமைக்கப்பட்டிருப்பதாகவும், பழுது ஏற்பட்டால் அவற்றைச் சரிசெய்வது மிகவும் கடினமாக இருக்கலாம் என்றும் கூறப்படுகிறது.
சுவாரஸ்யமாக, Nokia N86 வெளியான 2009ஆம் ஆண்டே மொபைல் சந்தையில் ஆப்பிள் நோக்கியாவுக்கு மிகப்பெரிய போட்டியை உருவாக்கியது. 2009ஆம் ஆண்டின் மூன்றாம் காலாண்டில், உலகிலேயே அதிக லாபம் ஈட்டிய மொபைல் நிறுவனமாக இருந்த நோக்கியாவை ஆப்பிள் முதன்முறையாக முந்தியதாகக் கூறப்படுகிறது.
அப்போது நோக்கியா போன்களின் சராசரி விலை சுமார் 90 அமெரிக்க டாலராக இருந்த நிலையில், ஐபோன்களின் சராசரி விலை சுமார் 600 டாலராக இருந்தது. அதிக விலை கொண்ட ஐபோன்கள் மூலம் ஆப்பிள் அதிக லாபத்தை ஈட்டியது.
பின்னர் ஆப்பிள் மற்றும் ஆண்ட்ராய்டின் வேகமான வளர்ச்சிக்கு ஈடுகொடுக்க முடியாமல் நோக்கியா ஸ்மார்ட்போன் சந்தையில் பின்னடைவைச் சந்தித்தது. 2011ஆம் ஆண்டு அப்போதைய CEO ஸ்டீபன் எலோப், நிறுவனத்தின் நிலையை “Burning Platform” என, அதாவது “எரிந்து கொண்டிருக்கும் எண்ணெய்க் கிணற்றின் தளம்” போன்ற ஆபத்தான சூழ்நிலையாக விவரித்து ஊழியர்களுக்கு கடிதம் எழுதியிருந்தார்.
எனினும், நோக்கியா முற்றிலும் மறைந்துவிடவில்லை. மொபைல் போன் தயாரிப்பு சந்தையில் இருந்து விலகிய பின்னரும், உலகளாவிய தொலைத்தொடர்பு துறையில் 5G நெட்வொர்க் உள்கட்டமைப்பு மற்றும் Fiber Optics உள்ளிட்ட தொழில்நுட்பங்களில் முக்கிய பங்காற்றி வருகிறது.
இதனால், iPhone 18 Pro-வின் புதிய கேமரா தொழில்நுட்பம் குறித்த விவாதம், ஆப்பிளின் புதிய அம்சத்தைத் தாண்டி, Motorola, Nokia, Samsung மற்றும் Xiaomi போன்ற நிறுவனங்கள் பல ஆண்டுகளுக்கு முன்பே மேற்கொண்ட தொழில்நுட்ப முயற்சிகளையும் மீண்டும் நினைவுபடுத்தியுள்ளது.