நெல்லை மாவட்டம் நாங்குநேரி மற்றும் அதன் சுற்றுவட்டாரப் பகுதிகளில் இயங்கி வரும் கல்குவாரிகளால் பொதுமக்களுக்கும், சுற்றுச்சூழலுக்கும், கூந்தன்குளம் பறவைகள் சரணாலயத்திற்கும் பாதிப்பு ஏற்படுவதாகக் குற்றச்சாட்டு எழுந்துள்ளது. குறிப்பாக, கூந்தன்குளம் மற்றும் அதனைச் சுற்றியுள்ள பாப்பன்குளம் உள்ளிட்ட கிராமப் பகுதிகளில் அதிக தீவிரம் கொண்ட வெடிபொருட்களைப் பயன்படுத்தி பாறைகள் தகர்க்கப்படுவதாகக் கூறப்படுகிறது.
கல்குவாரிகளில் பாறைகளைத் தகர்க்கும் போது ஏற்படும் பயங்கர வெடிச்சத்தம் சுமார் 7 கிலோமீட்டர் தூரம் வரை கேட்பதாகவும், இதனால் கூந்தன்குளம் பறவைகள் சரணாலயத்திற்கு வரும் வெளிநாட்டுப் பறவைகள் கடும் மிரட்சியடைந்து அச்சமடைவதாகவும் பொதுமக்கள் தெரிவிக்கின்றனர்.
பாறைகளைத் தகர்க்கும்போது ஏற்படும் அதீத அதிர்வுகளால், சரணாலயத்திற்கு வரும் அரிய வகை வெளிநாட்டுப் பறவைகளின் இனப்பெருக்கச் சுழற்சி பாதிக்கப்பட்டு, அவை இந்தப் பகுதியை விட்டே இடம்பெயரும் அபாயம் உள்ளதாகச் சூழலியலாளர்களும் கவலை தெரிவிக்கின்றனர்.
இதனிடையே, கல்குவாரிகளில் இருந்து வெளியேறும் பாறைத் தூசிகள் காற்றில் கலந்து, பறவைகளின் வாழ்விடமாக விளங்கும் கூந்தன்குளம் மற்றும் காடன்குளம் நீர்நிலைகளை அசுத்தப்படுத்துவதாகவும் குற்றச்சாட்டு எழுந்துள்ளது. இதனால் நீர்நிலைகளின் இயற்கைச் சூழலும், அப்பகுதியின் சுற்றுச்சூழலும் பாதிக்கப்படுவதாகக் கூறப்படுகிறது.
இப்பகுதியில் இயங்கி வரும் கல்குவாரிகளுக்கு எதிராக பொதுமக்களும் சமூக ஆர்வலர்களும் கடுமையான எதிர்ப்பை வெளிப்படுத்தி வருகின்றனர். “இயற்கையை அழிக்காதே..! கல்குவாரியை மூடு..!” என்ற முழக்கங்களுடன் நெல்லையில் மக்கள் தொடர்ந்து போராட்டங்களில் ஈடுபட்டு வருகின்றனர்.
இப்பகுதியில் உள்ள குவாரிகள் அரசு விதிகளை மீறி, நிலத்தடி நீர்மட்டம் மற்றும் விவசாய நிலங்களைப் பாதிக்கும் வகையில் செயல்படுவதாக ‘அறப்போர் இயக்கம்’ உள்ளிட்ட அமைப்புகளின் கள ஆய்வறிக்கைகளும் சுட்டிக்காட்டுகின்றன. மேலும், குவாரிகளில் பாறைகளை வெடிவைத்து தகர்ப்பதால் ஏற்படும் நில அதிர்வுகளால் அருகில் உள்ள வீடுகளில் விரிசல்கள் ஏற்படுவதாகவும் பொதுமக்கள் குற்றம் சாட்டுகின்றனர்.
விவசாய நிலங்களுக்கு அருகாமையில் செயல்பட்டு வரும் இந்தக் குவாரிகளை நிரந்தரமாக மூட வேண்டும் என வலியுறுத்தி, நாங்குநேரி மற்றும் அதன் சுற்றுவட்டாரப் பகுதி மக்கள் கருப்புக்கொடி ஏந்தியும், மாவட்ட ஆட்சியரிடம் மனு அளித்தும் தங்களது எதிர்ப்பைத் தீவிரப்படுத்தி வருகின்றனர்.
நெல்லையின் நாங்குநேரி மற்றும் அதன் சுற்றுவட்டாரப் பகுதிகளில் இயங்கி வரும் சட்டவிரோத கல்குவாரிகளுக்கு எதிராக சமீபத்தில் பொதுமக்கள் தங்களது வீடுகளில் கருப்புக் கொடிகளை ஏந்தி தொடர் எதிர்ப்பைப் பதிவு செய்தனர். விவசாய நிலங்கள் அழிவதைத் தடுக்கவும், தங்களது வாழ்வாதாரத்தைக் காக்கவும் உடனடியாக இந்தக் குவாரிகளை மூட வேண்டும் என அவர்கள் வலியுறுத்தி வருகின்றனர்.
இதனிடையே, அறப்போர் இயக்கம் சார்பில் அமைக்கப்பட்ட நிபுணர் குழு, திருநெல்வேலி மற்றும் அதன் சுற்றுவட்டார மாவட்டங்களில் உள்ள கல்குவாரிகளால் ஏற்படும் சமூக, சுற்றுச்சூழல் மற்றும் வாழ்வாதாரப் பாதிப்புகள் குறித்து விரிவான கள ஆய்வை மேற்கொண்டது. இந்த ஆய்வறிக்கை தமிழக அரசுக்கு முறைப்படி அனுப்பி வைக்கப்பட்டுள்ளது. சட்டவிரோதமாக கனிம வளங்கள் கொள்ளையடிக்கப்படுவதைத் தடுக்க உடனடியாகக் கடுமையான நடவடிக்கை எடுக்க வேண்டும் என அந்த அமைப்பினர் வலியுறுத்தியுள்ளனர்.
மேலும், கூந்தன்குளம் பறவைகள் சரணாலயத்தைச் சுற்றி சுற்றுச்சூழல் உணர்திறன் மண்டலம் எனப்படும் ‘Eco-Sensitive Zone’ விதிமுறைகள் முறையாகப் பின்பற்றப்படவில்லை என்ற குற்றச்சாட்டும் எழுந்துள்ளது. விதிமுறைகளின்படி, குறிப்பிட்ட தொலைவிற்குள் எந்தவிதமான வெடி விபத்துகளோ அல்லது குவாரிப் பணிகளோ நடைபெறக்கூடாது எனக் கூறப்படும் நிலையில், இப்பகுதியில் பாறைகளைத் தகர்க்கும் பணிகள் தொடர்ந்து நடைபெறுவதாக பொதுமக்கள் குற்றம் சாட்டுகின்றனர்.
குவாரிகளில் பாறைகளைத் தகர்க்கும்போது ஏற்படும் அதீத அதிர்வுகளால் கூந்தன்குளம் பறவைகள் சரணாலயத்திற்கு வரும் அரிய வகை வெளிநாட்டுப் பறவைகள் தங்களது இனப்பெருக்கச் சுழற்சியை இழந்து, இந்த இடத்தை விட்டே இடம்பெயரும் அபாயம் உள்ளதாகச் சூழலியலாளர்கள் கவலை தெரிவிக்கின்றனர்.
இந்த விவகாரத்தில் நெல்லை மாவட்ட ஆட்சியர் ஆனந்த் மோகன் நேரடியாகக் கவனம் செலுத்தி விசாரணை நடத்த உத்தரவிட்டுள்ளதாகவும் தகவல் வெளியாகியுள்ளது.
பொதுவாக, மனிதர்களின் வாழ்வாதாரப் பாதிப்புகளை மையமாகக் கொண்டே போராட்டங்கள் நடைபெறும். ஆனால், இந்தப் போராட்டத்தின் முக்கிய அம்சமாக, இப்பகுதி மக்கள் தங்களது வாழ்வாதாரப் பிரச்சினைகளுடன் சேர்த்து வெளிநாட்டுப் பறவைகளின் பாதுகாப்பிற்காகவும் குரல் கொடுத்து வருகின்றனர்.
கூந்தன்குளத்திற்கு ஆண்டுதோறும் ஆஸ்திரேலியா, சைபீரியா உள்ளிட்ட நாடுகளிலிருந்து ஆயிரக்கணக்கான அரிய வகை பறவைகள் வந்து செல்கின்றன. இப்பகுதி மக்கள் தலைமுறை தலைமுறையாக இந்தப் பறவைகளைத் தங்களது வீட்டுப் பிள்ளைகளைப் போலப் பாதுகாத்து வருவதாகக் கூறப்படுகிறது. எனவே, பறவைகளுக்கு அச்சுறுத்தலை ஏற்படுத்தும் வகையில் புதிய குவாரிகளுக்கு அனுமதி வழங்கக் கூடாது என்பதில் கிராம மக்கள் உறுதியாக உள்ளனர்.
இதன் தொடர்ச்சியாக, பாப்பன்குளம் மற்றும் சுற்றுவட்டார கிராமங்களைச் சேர்ந்த மக்கள் ஒன்றுதிரண்டு, தங்களது வீடுகள், விவசாய நிலங்கள் மற்றும் பொது இடங்களில் ஒரே நேரத்தில் நூற்றுக்கணக்கான கருப்புக் கொடிகளை ஏந்தி தங்களது எதிர்ப்பை வித்தியாசமான முறையில் வெளிப்படுத்தினர்.
மாசுபாட்டால் கண்முன்னே அழிந்து வரும் விவசாய நிலங்களையும், இயற்கை வளங்களையும் பாதுகாக்க வேண்டும் என்ற கோரிக்கையுடன் உள்ளூர் மக்கள் முன்னெடுத்து வரும் இந்த அறப்போராட்டம் தற்போது ஒட்டுமொத்த தமிழகத்தின் கவனத்தையும் ஈர்த்துள்ளது.