”நான் ஆட்சிக்கு வந்தால் பெரியார் சிலை சட்டப்படி அகற்றம்: அண்ணாமலை அதிரடி சபதம்”

தமிழகத்தில் கோயில்களுக்கு வரும் பக்தர்களிடம் செல்போன்களைப் பெற்று, டோக்கன் வழங்கும் நடைமுறையை அரசு கொண்டுவரக் கூடாது எனப் பேசிய இயக்கத் தலைவர், இதனால் இந்து பக்தர்களின் வருகை குறையக்கூடும் என்று தெரிவித்தார்.

சினிமா தியேட்டர், திருமண மண்டபம் உள்ளிட்ட இடங்களில் செல்போன்களால் இடையூறு ஏற்பட்டாலும், அனைவரிடமும் செல்போன்களைப் பறிமுதல் செய்வதில்லை. அதேபோல் கோயில்களிலும் அனைவரிடமும் செல்போன்களைப் பெறுவது நியாயமல்ல என்றார். மக்கள் கோயிலுக்குள் செல்ல செல்போனை ஒப்படைத்து, டோக்கன் பெற்று, மீண்டும் வரிசையில் நின்று வாங்க வேண்டிய அவசியம் இல்லை என்றும் கூறினார்.

இந்து மக்களின் பிரச்சினைகளுக்காக மட்டுமல்லாமல், அனைத்து சமுதாய மக்களுக்காகவும் தங்கள் இயக்கம் குரல் கொடுக்கும் என அவர் தெரிவித்தார். கோயில்களில் முதியவர்கள், பெண்கள் உள்ளிட்டோரிடம் படிப்படியாக செல்போன்களை எடுத்துச் செல்லக் கட்டுப்பாடுகள் விதிக்கப்படுவதாகக் கூறிய அவர், இதுபோன்ற முடிவுகளை எடுக்க அரசுக்கு யார் அதிகாரம் வழங்கியது எனக் கேள்வி எழுப்பினார்.

சட்டமன்றத்தில் அனைத்து மதங்களும் சமமாகக் கருதப்பட வேண்டும் என்றும், பகவத்கீதை, பைபிள், குர்ஆன் ஆகிய அனைத்துக்கும் சம உரிமை உண்டு என்றும் கூறினார். ஆனால் மக்கள் பிரச்சினைகளை விவாதிப்பதற்குப் பதிலாக, சட்டமன்ற உறுப்பினர்கள் தங்கள் மத அடையாளங்களை வெளிப்படுத்துவதில் போட்டியிடுவதாக விமர்சித்தார்.

தமிழக மக்கள் தங்கள் இயக்கம் மற்றவற்றிலிருந்து மாறுபட்டு செயல்படுகிறதா, மக்களின் அடிப்படைப் பிரச்சினைகளைப் பேசுகிறதா என்பதை உன்னிப்பாகக் கவனித்து வருவதாக அவர் கூறினார். தங்கள் தலைமையின் கீழ் தமிழ்நாட்டை ஒரு டிரில்லியன் டாலர் பொருளாதார மாநிலமாக மாற்றவும், தொழில்துறை புரட்சியை ஏற்படுத்தவும், இளைஞர்களுக்கு வேலைவாய்ப்புகளை உருவாக்கவும், விவசாயிகளுக்கு நீர் கொண்டு வரவும் முடியும் எனத் தெரிவித்தார்.

ஒவ்வொரு செயல்பாடும் மக்களிடம் நம்பிக்கையையும் மரியாதையையும் ஏற்படுத்த வேண்டும் என்றார். இயக்கத்தில் சுமார் 20 லட்சம் பேர் இருப்பது தங்களுக்கான பரிசோதனைக் குறியீடு என்றும், எண்ணிக்கை தினந்தோறும் மாறுபடலாம் என்றும் குறிப்பிட்டார்.

செப்டம்பர் 17ஆம் தேதி பிரதமர் நரேந்திர மோடியின் பிறந்தநாளுக்கும், தந்தை பெரியாரின் பிறந்தநாளுக்கும் வாழ்த்து தெரிவித்தார். அரசின் தவறுகளைத் தொடர்ந்து கேள்வி கேட்போம் என்றும், மும்மொழிக் கொள்கை, நீட் தேர்வு உள்ளிட்ட விவகாரங்களில் ஏற்கெனவே கேள்விகள் எழுப்பியுள்ளதாகவும் கூறினார்.

அதேநேரத்தில், குடும்பப் பின்னணி இல்லாமல் நாட்டுக்காக உழைக்கும் பிரதமர் மோடியைத் தாம் மதிப்பதாகத் தெரிவித்தார். 2020 செப்டம்பர் 17ஆம் தேதி பாஜகவில் தொண்டராக இணைந்தபோது, அக்கட்சியின் தலைவராக இருந்த எல்.முருகன் பெரியாருக்கு வாழ்த்து தெரிவித்ததை ஆதரித்து முகநூலில் பதிவு செய்ததாகவும் கூறினார்.

தங்கள் அரசியல் இயக்கத்தில் 99 சதவீதம் கடவுள் நம்பிக்கை கொண்டவர்களும், ஒரு சதவீதம் கடவுள் நம்பிக்கை இல்லாதவர்களும் இருக்கலாம் என்றார். பெரியாரின் பெண்கள் விடுதலை, சாதி மற்றும் உழைப்பு குறித்த கருத்துகளை ஏற்றுக்கொள்வதாகவும், கடவுள் மறுப்பு மற்றும் பிராமண எதிர்ப்பு நிலைப்பாடுகளை ஏற்கவில்லை என்றும் தெரிவித்தார். பெரியாரின் இந்தி எதிர்ப்பு, 1965 போராட்டம் தொடர்பான கருத்துகள், 1961ஆம் ஆண்டு காமராஜர் மற்றும் திமுகவுக்கு ஆதரவாக அவர் தெரிவித்ததாகக் கூறப்படும் நிலைப்பாடுகள் முரண்பாடுகளைக் காட்டுவதாகவும் குறிப்பிட்டார்.

ஸ்ரீரங்கம் கோயில் அருகே உள்ள பெரியார் சிலை தொடர்பாக, 1969 ஜூலை 20ஆம் தேதி திராவிடர் கழகம் தீர்மானம் நிறைவேற்றியதாகவும், நகராட்சி தலைவர் வெங்கடேஸ்வர தீட்சிதர் ஒப்புதல் அளித்ததாகவும் அவர் கூறினார். 1971ஆம் ஆண்டு நகராட்சி தடையில்லாச் சான்றிதழ் வழங்கி, 12க்கு 12 என மொத்தம் 144 சதுர அடி நிலம் ஒதுக்கியதாகவும், 1972 மார்ச் 3ஆம் தேதி மாவட்ட ஆட்சியர் ஒப்புதல் அளித்ததாகவும் தெரிவித்தார்.

பின்னர் மாநில அரசு மற்றும் வருவாய் வாரியத்தின் அனுமதியுடன், திராவிடர் கழகம் பணம் செலுத்தி நிலத்தைப் பெற்றதாகக் கூறினார். 1975ஆம் ஆண்டு உத்தரவு கிடைத்தபோதிலும், அந்தக் கல் 2006 டிசம்பர் 16ஆம் தேதிதான் நிறுவப்பட்டதாகவும் குறிப்பிட்டார்.

தங்கள் ஆட்சி வந்தால் சட்டப்படியான நடைமுறைகளைப் பின்பற்றி அந்தக் கல்லை அகற்றி, கடவுள் நம்பிக்கை இல்லாதவர்கள் பார்வையிடும் வகையில் மரியாதையான பொது இடத்தில் வைப்போம் என்றார். தனிப்பட்ட வெறுப்புகளை வீட்டில் வைத்துக்கொண்டு, அரசியல் இயக்கத்தில் அனைத்து மக்களையும் அரவணைக்க வேண்டும் என்றும் வலியுறுத்தினார். அண்ணாதுரையின் சில கருத்துகளை ஏற்றுக்கொள்வதாகவும், அரசியல் என்பது வாக்காளர்களை ஏமாற்றுவதற்காக அல்ல; மாற்றத்தை ஏற்படுத்துவதற்காகவே என்றும் தெரிவித்தார்.

பெரிய கட்சிகளில் பதவிகளை விட்டுவிட்டு தங்கள் இயக்கத்தில் இணைந்தவர்கள் பலர் இருப்பதாகவும், எந்தப் பொறுப்பும் இல்லாமல் களப்பணியில் ஈடுபடுவோரைத் தாம் அறிந்திருப்பதாகவும் கூறினார். சாலைகள், குப்பைகள் மற்றும் சுற்றுப்புறங்களைச் சுத்தம் செய்தல், பனை மற்றும் மரக்கன்றுகள் நடுதல், போதைப்பொருள் எதிர்ப்பு விழிப்புணர்வு உள்ளிட்ட பணிகளை இயக்கம் மேற்கொண்டு வருவதாகத் தெரிவித்தார். அடுத்த மாதம் முழுவதும் பெண்களுக்கு ஆதரவு மற்றும் விழிப்புணர்வு நிகழ்ச்சிகள் நடத்தப்படும் என்றார்.

20 லட்சம் பேர் நம்பிக்கையுடனும் மாற்றத்திற்காகவும் இணைந்துள்ளதாகக் கூறிய அவர், இயக்கம் மிக விரைவில் அரசியல் இயக்கமாக மாறும் எனத் தெரிவித்தார். தொண்டர்கள் பக்குவமடையவும், தலைவர்கள் உருவாகவும், 234 தொகுதிகளிலும் இயக்கத்தை விரிவுபடுத்தவும் அதிக காலம் தேவைப்படும் என முதலில் நினைத்திருந்தாலும், தற்போது எதிர்பார்த்ததைவிட வேகமாக வளர்ந்து வருவதாகக் கூறினார். மக்கள் மற்றும் சமூகப் பிரச்சினைகளுக்காகப் பேசும் இந்த இயக்கத்தில் அவற்றைக் கையாளும் தலைவர்கள் உருவாகியுள்ளார்களா என்பதே அடுத்த சவால் என்றும் அவர் தெரிவித்தார்.