தமிழ் திரையுலகின் நட்சத்திர தம்பதிகளான சூர்யா மற்றும் ஜோதிகா தங்களது 20 ஆண்டு கால திருமண வாழ்க்கையை கொண்டாடும் வகையில், மீண்டும் ஒருமுறை தங்களது திருமண உறுதிமொழியை (Vow Renewal) புதுப்பித்துக் கொண்டுள்ளனர். சமூக வலைத்தளங்களில் வைரலாகி வரும் இவர்களின் இந்த 20-வது ஆண்டு திருமண நாள் கொண்டாட்டம் ரசிகர்களின் கவனத்தை வெகுவாக ஈர்த்துள்ளது.
கடந்த 2006-ஆம் ஆண்டு இந்து முறைப்படி திருமணம் செய்து கொண்ட சூர்யா – ஜோதிகா தம்பதியினர், தற்போது 20 ஆண்டுகள் நிறைவடைந்ததை ஒட்டி, வெளிநாட்டில் உள்ள ஒரு தேவாலயத்தில் கிறிஸ்தவ முறைப்படி தங்களது திருமண உறுதிமொழிகளைப் புதுப்பித்துக் கொண்டுள்ளனர்.
இந்த நெகிழ்ச்சியான தருணத்திற்காக ஜோதிகா வெள்ளை நிற திருமண கவுன் அணிந்திருந்தார். சூர்யா, கருப்பு நிற பேண்ட்டுடன் வெள்ளை நிற சூட் ஜாக்கெட் அணிந்து மிடுக்காகக் காட்சியளித்தார். இவர்களது மகன் தேவ் மற்றும் மகள் தியா ஆகியோரின் முன்னிலையில் இந்த நிகழ்ச்சி சிறப்பாக நடைபெற்றது.
இன்ஸ்டாகிராமில் பகிரப்பட்ட வீடியோவில், ஜோதிகா தனது மகன் தேவுடன் மணமேடை நோக்கி நடந்து வர, தியா சூர்யாவின் அருகில் நின்றுகொண்டிருந்தார். இந்த மிக நெருக்கமான குடும்ப நிகழ்வில் சூர்யாவின் தம்பியும் நடிகருமான கார்த்தி மற்றும் மிக நெருங்கிய நண்பர்கள் மட்டுமே கலந்து கொண்டதாக தெரிவிக்கப்பட்டுள்ளது.
இது குறித்து இன்ஸ்டாகிராமில் வீடியோவைப் பகிர்ந்து பதிவிட்ட ஜோதிகா, “இது எங்களின் 20 ஆண்டு கால காதல் மற்றும் போரைக் கொண்டாடும் (Love & War) ஒரு திருமண உறுதிமொழி புதுப்பித்தல் ஆகும். இது ஒரு குறைபாடற்ற திருமணத்தின் கொண்டாட்டம் அல்ல. மாறாக, இது ஒருவருக்கொருவர் நாம் மாறிய விதம், விட்டுக்கொடுத்தல் மற்றும் சுயநலமற்ற காதலின் கொண்டாட்டம்” என்று உருக்கமாகக் குறிப்பிட்டுள்ளார்.
ஜோதிகா தனது அதிகாரப்பூர்வ இன்ஸ்டாகிராம் பக்கத்தில் சூர்யாவுக்காகப் பகிர்ந்த நீண்ட உருக்கமான பதிவில், தங்களது திருமண வாழ்க்கை குறித்த பல முக்கியமான வாக்குறுதிகளையும் குறிப்பிட்டுள்ளார்.
“வாழ்க்கையின் நேர்மறையான பக்கங்களை மட்டுமே பார்க்க விரும்புவதால், எப்போதும் மகிழ்ச்சியான மனிதராக இருக்க உறுதியளிக்கிறேன்” என்று ஜோதிகா தெரிவித்துள்ளார். மேலும், “நான் சமைப்பதாலோ அல்லது சுத்தம் செய்வதாலோ அல்ல; மாறாக, என் முகத்தில் இருக்கும் புன்னகை, என் குழந்தைகள் தங்களது அப்பா – அம்மா வாழ்ந்த அழகான கதையை மீண்டும் வாழத் தூண்டும் வகையில் ஒரு சிறந்த தாயாக இருப்பேன்” என்றும் அவர் குறிப்பிட்டுள்ளார்.
அதேபோல், “என் சூர்யாவுக்கு நான் எப்போதும் ஒரு குறைபாடற்ற மனைவியாகவே இருக்க விரும்புகிறேன். சண்டையிட்டு, பின்னர் சமாதானமாகி, அதன் மூலம் ஒவ்வொரு முறையும் உன்னிடம் இன்னும் நெருக்கமாவேன்” என்றும் ஜோதிகா தனது பதிவில் உருக்கமாகக் கூறியுள்ளார்.
சூர்யாவை தனது சமமானவர், ரகசியங்களைப் பகிர்ந்துகொள்பவர் மற்றும் சிறந்த நண்பர் என வர்ணித்துள்ள ஜோதிகா, தங்களுக்குள் இருக்கும் நட்பை எல்லாவற்றையும் விட மேலாக மதிப்பதாகவும் தெரிவித்துள்ளார்.
சூர்யா மற்றும் ஜோதிகா இருவரும் முதன்முதலில் 1999-ஆம் ஆண்டு வெளியான ‘பூவெல்லாம் கேட்டுப்பார்’ திரைப்படத்தின் படப்பிடிப்பில்தான் சந்தித்தனர். அப்போது சூர்யா தமிழ் சினிமாவில் வளர்ந்து வரும் நடிகராகவும், ஜோதிகா திரையுலகில் புதியவராகவும் இருந்தார். சூர்யாதான் ஜோதிகாவுக்குத் தமிழ் மொழியைக் கற்றுக்கொள்ள உதவியதாகவும் கூறப்படுகிறது.
சுவாரசியமாக, இவர்கள் இருவரும் நிஜ வாழ்க்கையில் கணவன் – மனைவியாக மாறுவதற்கு வெறும் 3 நாட்களுக்கு முன்புதான், அதாவது செப்டம்பர் 8, 2006 அன்று, இருவரும் திரையில் தம்பதியராக நடித்த பிளாக்பஸ்டர் திரைப்படமான ‘சில்லுனு ஒரு காதல்’ வெளியானது.
ஆரம்பத்தில் இவர்களது காதலுக்கு சூர்யாவின் தந்தையும், பழம்பெரும் நடிகருமான சிவகுமார் சம்மதிக்கவில்லை என்று கூறப்படுகிறது. ஆனால், சூர்யா ஜோதிகாவைத் தவிர வேறு யாரையும் திருமணம் செய்து கொள்ள மாட்டேன் என்பதில் உறுதியாக இருந்ததாகவும், அதன் பின்னர் குடும்பத்தினரின் சம்மதத்தைப் பெற்றதாகவும் கூறப்படுகிறது.
2006-ல் திருமணத்திற்குப் பிறகு ஜோதிகா குடும்பத்திற்காகத் திரைத்துறையில் இருந்து தற்காலிகமாக விலகினார். பின்னர், 2015-ஆம் ஆண்டு ‘36 வயதினிலே’ திரைப்படம் மூலம் மீண்டும் திரையுலகில் கம்பேக் கொடுத்தார். தற்போது இந்தத் தம்பதியினர் தங்களது ‘2D என்டர்டெயின்மென்ட்’ நிறுவனம் மூலம் இணைந்து திரைப்படங்களைத் தயாரித்தும் வருகின்றனர்.
இந்த 20-வது ஆண்டு திருமண நாள் கொண்டாட்ட வீடியோவில், இவர்களது குழந்தைகளான தியா மற்றும் தேவ் மணமகன் – மணமகள் தோழர்களாக (Bridesmaid & Groomsman) மாறியிருந்தனர். ஜோதிகா வெள்ளை நிற திருமண கவுன் அணிந்து தேவதை போல மணமேடை நோக்கி நடந்து வந்தபோது, அதைப் பார்த்த சூர்யா உணர்ச்சிவசப்பட்டு, அவரது கண்களில் இருந்து கண்ணீர் வழிந்தது. இந்த எமோஷனல் தருணம் வீடியோவில் பதிவாகி, ரசிகர்களை நெகிழ வைத்துள்ளது.
ஜோதிகா தனது பதிவில், “நான் எப்போதும் ஆரோக்கியமாக இருக்க சபதம் செய்கிறேன்; ஏனென்றால் நாம் உருவாக்கும் ஒரே உண்மையான சொத்து அதுதான். ஆடம்பரமான செங்கல் வீடுகளில் கூட கசிவுகள், கறையான்கள் மற்றும் பழுதுபார்ப்புகள் இருக்கும். ஆனால் உடல்நலம்தான் முக்கியம்” என்று குறிப்பிட்டுள்ளார். இதன் மூலம் தங்களது ஃபிட்னஸ் ரகசியத்தையும் அவர் வெளிப்படுத்தியுள்ளார்.
இந்த திருமண நாளுக்கு சில வாரங்களுக்கு முன்பு, ஒரு ஆடியோ வெளியீட்டு விழாவில் பேசிய சூர்யா, காதலைப் பற்றி உருக்கமாகப் பேசியிருந்தார். “திருமணத்திற்குப் பிறகும் காதல் தொடர வேண்டும். வாழ்க்கையில் முன்னுரிமைகளும் சூழ்நிலைகளும் மாறினாலும், துணையின் மீது நாம் வைக்கும் மரியாதை குறையக் கூடாது” என்று அவர் கூறியிருந்தார். சூர்யாவின் இந்தக் கருத்து தற்போது அவர் மற்றும் ஜோதிகா புதுப்பித்துக் கொண்ட திருமண உறுதிமொழியுடன் பலராலும் ஒப்பிட்டுப் பேசப்படுகிறது.
சூர்யா – ஜோதிகா தம்பதியினர் தங்களது காதல் பயணத்தை 1999-ஆம் ஆண்டு ‘பூவெல்லாம் கேட்டுப்பார்’ திரைப்படத்தில் தொடங்கி, பின்னர் செப்டம்பர் 11, 2006 அன்று அதிகாரப்பூர்வமாகத் திருமணம் செய்து கொண்டனர். தற்போது தங்களது 20 ஆண்டுகால காதல் மற்றும் குடும்பப் பயணத்தை 1999 முதல் 2026 வரை நிறைவு செய்துள்ளதைக் குறிக்கும் வகையில், இந்த விழாவுக்கு “தி சீக்வெல்” (The Sequel) என்று பெயரிட்டுள்ளனர்.
தங்களது 20 ஆண்டுகால தம்பதியர் வாழ்க்கையைக் கொண்டாடும் விதமாக, இந்த ஜோடி சமீபத்தில் பிரபல The Hollywood Reporter India இதழின் அட்டைப் பக்கத்திற்காக ஒரு பிரத்யேகமான மற்றும் ஸ்டைலான ஃபிட்னஸ் போட்டோஷூட்டையும் செய்திருந்தனர் என்பது குறிப்பிடத்தக்கது.
இவ்வாறு, 20 ஆண்டுகால காதல், திருமண வாழ்க்கை, குடும்பப் பயணம் மற்றும் ஒருவருக்கொருவர் அளிக்கும் அன்பையும் நட்பையும் கொண்டாடும் வகையில், சூர்யா – ஜோதிகா தம்பதியினர் தங்களது திருமண உறுதிமொழியை மீண்டும் புதுப்பித்துக் கொண்டுள்ளனர். இவர்களின் இந்த நெகிழ்ச்சியான தருணங்கள் தற்போது சமூக வலைத்தளங்களில் வைரலாகி வருகின்றன.