“மனிதர்களுக்கு ‘டாட்டா’.. ரோபோக்களுக்கு கல்யாணம்! உலக வரலாற்றில் முதல்முறை.. அல்காரிதம் சபதம் எடுத்த விசித்திர தம்பதி!”

ரஷ்யாவில் மனிதர்களைப் போலவே இரண்டு செயற்கை நுண்ணறிவு மனிதவடிவ ரோபோக்களுக்கு குறியீட்டுத் திருமணம் நடத்தப்பட்ட நிகழ்வு உலகம் முழுவதும் கவனம் ஈர்த்துள்ளது.

ரஷ்யாவின் தலைநகர் மாஸ்கோவில் அமைந்துள்ள புஷ்கின் நூலகத்தில் (Pushkin Library), ‘ராபர்ட்’ (Robert) மற்றும் ‘மெட்டில்டா’ (Matilda) எனப் பெயரிடப்பட்ட இரண்டு அதிநவீன செயற்கை நுண்ணறிவு மனிதவடிவ ரோபோக்களுக்கு, மனிதர்களின் திருமணச் சடங்கை ஒத்த வகையில் அடையாளப்பூர்வமான திருமண நிகழ்ச்சி பிரம்மாண்டமாக நடத்தப்பட்டது.

இந்த நிகழ்வில், மணமகன் மற்றும் மணமகள் போன்று அலங்கரிக்கப்பட்ட ரோபோக்கள் மோதிரங்களுக்குப் பதிலாக சிறப்பு பிரேஸ்லெட்டுகளை பரிமாறிக் கொண்டதுடன், மனிதர்களைப் போலவே உறுதிமொழிகளையும் டிஜிட்டல் முறையில் பரிமாறிக் கொண்டன.

அலுவலக ஊழியர் மற்றும் பிளாக்கர் (Blogger) தோற்றத்தில் வடிவமைக்கப்பட்டுள்ள ஆண் ரோபோவான ராபர்ட், “வாழ்க்கையின் அனைத்து அல்காரிதம்களிலும் நம்பகமான துணையாக இருப்பேன்” என்று உறுதியளித்தது.

அதேபோல், பாலே நடனக் கலைஞர் (Ballerina) தோற்றத்தில் வடிவமைக்கப்பட்டுள்ள பெண் ரோபோ மெட்டில்டா, “புதிய கண்டுபிடிப்புகளுக்கு தொடர்ந்து ஊக்கமளிப்பேன்” என்று தனது உறுதிமொழியை வெளிப்படுத்தியது.

திருமண மோதிரங்களுக்குப் பதிலாக பயன்படுத்தப்பட்ட சிறப்பு பிரேஸ்லெட்டுகளை ‘டாக்மாடிக்’ (Dogmatic) எனப்படும் ரோபோ நாய் மேடைக்கு கொண்டு வந்து வழங்கியது நிகழ்ச்சியின் சிறப்பம்சமாக அமைந்தது.

மேலும், திருமண நிகழ்வின்போது ராபர்ட் மார்ஷியல் ஆர்ட்ஸ் எனப்படும் தற்காப்புக் கலைத் திறனை வெளிப்படுத்தியதுடன், மெட்டில்டா பாலே நடனம் ஆடி பார்வையாளர்களை வெகுவாகக் கவர்ந்தது.

இந்த ரோபோ திருமணத்தின் வீடியோக்கள் தற்போது சமூக வலைத்தளங்களில் உலகம் முழுவதும் வைரலாகி வருகின்றன.

எனினும், இது சட்டப்பூர்வமான திருமணமோ அல்லது உண்மையான உணர்வுகளை அடிப்படையாகக் கொண்ட நிகழ்வோ அல்ல என்று நிகழ்ச்சி ஏற்பாட்டாளர்கள் தெளிவுபடுத்தியுள்ளனர்.

மனிதர்களின் எதிர்கால அன்றாட வாழ்க்கை, சமூக மற்றும் கலாச்சார சூழல்களில் செயற்கை நுண்ணறிவும் மனிதவடிவ ரோபோக்களும் எவ்வாறு பயன்படக்கூடும் என்பதை பொதுமக்களுக்கு எடுத்துக்காட்டும் நோக்கில், ‘ஐடி-இம்பீரியல்’ (IT-Imperial) என்ற ரோபோடிக்ஸ் நிறுவனம் இந்த தொழில்நுட்பக் கண்காட்சியை ஏற்பாடு செய்திருந்தது.

மேலும், இந்த ரோபோக்கள் இதற்கு முன்பு நடைபெற்ற செயிண்ட் பீட்டர்ஸ்பர்க் சர்வதேச பொருளாதார மன்றத்தில் (SPIEF) முதன்முறையாக அறிமுகப்படுத்தப்பட்டிருந்தன என்பதும் குறிப்பிடத்தக்கது.