‘கருப்பு’ திரைப்படம் வெளியாவதற்கு முன்பு சுமார் ரூ.100 கோடி நிதி நெருக்கடியை எதிர்கொண்டதாகவும், அந்தக் கடனை தானே முன்வந்து ஏற்றுக்கொண்டு படத்தை வெற்றிகரமாக வெளியிட்டதாகவும் நடிகர் சூர்யா முதல்முறையாக மனம் திறந்து பேசியுள்ளார். தனது மனைவி நடிகை ஜோதிகாவுடன் இணைந்து அளித்த பிரத்யேக பேட்டியில், இந்த அதிர்ச்சிகரமான பின்னணி தகவல்களை அவர் பகிர்ந்துள்ளார்.
இயக்குநர் ஆர்.ஜே. பாலாஜி இயக்கத்தில், சூர்யா மற்றும் த்ரிஷா நடிப்பில் உருவான ‘கருப்பு’ திரைப்படம் 2026 மே 14ஆம் தேதி வெளியாக திட்டமிடப்பட்டது. ஆனால், தயாரிப்பு நிறுவனமான ட்ரீம் வாரியர் பிக்சர்ஸ், விநியோகஸ்தர்களுக்கு வழங்க வேண்டிய முந்தைய நிலுவைத் தொகைகள் மற்றும் பிற நிதிப் பொறுப்புகள் காரணமாக சுமார் ரூ.95 கோடி முதல் ரூ.100 கோடி வரை கடுமையான நிதி நெருக்கடியை எதிர்கொண்டது.
இந்த நிதிச் சிக்கலால், திரைப்படத்தை டிஜிட்டல் முறையில் திரையிடுவதற்குத் தேவையான ‘கே.டி.எம். (Key Delivery Message – KDM)’ சாவி வழங்கப்படாமல் நிறுத்தப்பட்டது. இதன் காரணமாக, ரிலீஸ் நாளன்று காலை நடைபெற இருந்த காட்சிகள் ரத்து செய்யப்பட்டன.
இதுகுறித்து பேசிய சூர்யா, “படம் திட்டமிட்டபடி திரையரங்குகளுக்கு வர வேண்டும் என்றால், கடைசி நிமிடத்தில் மிகப் பெரிய தொகையை கடனாகப் பெற வேண்டிய சூழல் ஏற்பட்டது. அவ்வளவு பெரிய தொகையை எனது தனிப்பட்ட வசதியையும், பொருளாதார எல்லைகளையும் தாண்டி கடனாக வாங்குவது எளிதான முடிவு அல்ல. ஒருவேளை படம் தோல்வியடைந்திருந்தால், அதன் விளைவுகளை என் குடும்பமே சந்திக்க வேண்டியிருக்கும். இருப்பினும், என் மீது முழு நம்பிக்கை வைத்த ஜோதிகா, அந்த முடிவுக்கு முழுமையாக ஆதரவளித்தார்” என்று நெகிழ்ச்சியுடன் தெரிவித்தார்.
மேலும், “படம் நஷ்டமடைந்தால் மொத்தக் கடனும் என் தலையில்தான் விழும் என்பது தெரிந்திருந்தும், தமிழ் சினிமாவின் மீதும், ‘கருப்பு’ திரைப்படத்தின் கதையின் மீதும் இருந்த நம்பிக்கையால்தான் இந்த மிகப் பெரிய ரிஸ்க்கை எடுத்தேன்” என்றும் அவர் கூறினார்.
சூர்யாவின் இந்தத் துணிச்சலான முடிவு இறுதியில் வெற்றியாக மாறியது. மே 15ஆம் தேதி, ஒருநாள் தாமதமாக வெளியான ‘கருப்பு’ திரைப்படம் ரசிகர்களிடையே மிகப்பெரிய வரவேற்பைப் பெற்றது. உலகளவில் ரூ.350 கோடிக்கும் அதிகமான வசூலைக் குவித்து, சூர்யாவின் திரைப்பயணத்திலேயே மிகப்பெரிய பாக்ஸ் ஆபிஸ் சாதனையைப் படைத்தது. இதன் மூலம், அவர் வாங்கியிருந்த கடன்களையும் திருப்பிச் செலுத்த முடிந்ததாகக் கூறப்படுகிறது.
இந்த நிதி நெருக்கடிக்கான காரணத்தையும் சூர்யா விளக்கியுள்ளார். தயாரிப்பு நிறுவனம், ஓ.டி.டி. (OTT) உரிமைகள் மூலம் ரூ.75 முதல் ரூ.80 கோடி வரை வருவாய் கிடைக்கும் என்று எதிர்பார்த்திருந்தது. ஆனால், எதிர்பாராத விதமாக ரூ.30 கோடி மட்டுமே ஒப்பந்தமாகியதால், சுமார் ரூ.50 கோடி வருவாய் பற்றாக்குறை ஏற்பட்டது. அதனுடன் ஏற்கெனவே இருந்த நிலுவைத் தொகைகளும் சேர்ந்து, திரைப்படம் வெளியாகும் முன்பே ரூ.100 கோடி அளவிலான நிதி நெருக்கடியை உருவாக்கியதாக அவர் தெரிவித்துள்ளார்.
இந்த முடிவில் ஜோதிகாவின் பங்கு குறித்தும் சூர்யா மனம் திறந்தார். “இந்த ரிஸ்க்கை எடுக்க ஜோதிகாதான் எனக்கு மிகப்பெரிய தைரியம் கொடுத்தார்” என்று அவர் கூறியபோது, உடனே குறுக்கிட்ட ஜோதிகா, “இதற்கான முழுப் பெருமையும் சூர்யாவுக்கே சேரும். இது அவர் எடுத்த துணிச்சலான முடிவு” என்று தெரிவித்தார்.
அதற்கு பதிலளித்த சூர்யா, “நான் எடுக்கும் எந்த முடிவும் நேரடியாகவோ, மறைமுகமாகவோ என் குடும்பத்தை பாதிக்கும். எனவே, இது என்னுடைய முடிவு மட்டுமல்ல; நாங்கள் இருவரும் சேர்ந்து எடுத்த முடிவாகும்” என்று கூறினார்.
இதனைத் தொடர்ந்து பேசிய ஜோதிகா, “குழந்தைகளை வளர்ப்பது முதல் வாழ்க்கையின் மிகப் பெரிய சவால்கள் வரை, நாங்கள் எப்போதும் ஒரே அணியாக, ஒரே பக்கத்தில் நின்றுதான் முடிவுகளை எடுப்போம்” என்று தெரிவித்தார்.
சூர்யாவின் இந்தப் போராட்டத்தில், திரையுலகினரும் அவருக்கு உறுதுணையாக இருந்துள்ளனர். கடைசி நேரத்தில் நிதியுதவி வழங்கிய ஃபைனான்சியர்கள், “தற்போதைக்கு மொத்தத் தொகையை திருப்பிச் செலுத்த வேண்டிய அவசியமில்லை. 25 முதல் 30 சதவீதம் வரை மட்டும் செலுத்திவிட்டு படத்தை வெளியிடுங்கள்” என்று சலுகை வழங்கியதாகவும், இதனால் திரைப்படம் வெளியாவதற்கான பாதை எளிதானதாக அமைந்ததாகவும் அவர் கூறினார்.
மேலும், தியேட்டர் உரிமையாளர்கள் மற்றும் விநியோகஸ்தர்களும் சூர்யாவின் முயற்சிக்கு ஆதரவளித்து, மே 15ஆம் தேதி திரைப்படத்திற்கு சிறப்பு காட்சிகளை ஒதுக்கியதாகவும் தகவல்கள் வெளியாகியுள்ளன.
இந்த இமாலய வெற்றியின் மூலம், இந்திய அளவில் ரூ.100 கோடி நிகர வசூலைத் தாண்டிய சூர்யாவின் முதல் திரைப்படம் என்ற வரலாற்றுச் சாதனையையும் ‘கருப்பு’ திரைப்படம் படைத்துள்ளது. ஆரம்பத்தில் 2025 தீபாவளிக்கு வெளியாக திட்டமிடப்பட்ட இந்தப் படம், நிதி நெருக்கடி மற்றும் சில மறுபடப்பிடிப்பு (Reshoot) காரணங்களால் தள்ளிப்போய், இறுதியில் 2026ஆம் ஆண்டின் மிகப்பெரிய தமிழ்த் திரைப்படங்களில் ஒன்றாக உருவெடுத்துள்ளது.
இந்த வெற்றியைத் தொடர்ந்து, சூர்யாவின் அடுத்த படமான ‘சூர்யா 49’ திரைப்படத்திற்காக அவரது சம்பளம் ரூ.100 கோடியாக உயர வாய்ப்புள்ளதாக கோலிவுட் வட்டாரங்களில் தகவல்கள் வெளியாகி வருகின்றன.
பேட்டியின் இறுதியில், நடிகை ஜோதிகாவின் நடிப்புத் திறமை குறித்தும் சூர்யா மனம் திறந்து பாராட்டினார்.
“நான் ஒரு காட்சியில் நடிக்கும்போது பல்வேறு உணர்வுகளை நினைவுகூர்ந்து, பல அடுக்குகளில் (Layers) என் நடிப்பை வெளிப்படுத்துவேன். ஆனால், ஜோதிகா கேமரா ஆன் ஆன அடுத்த நொடியே இயல்பான கண்ணீருடன் உணர்ச்சிகளை வெளிப்படுத்திவிடுவார். அது எனக்கே ஆச்சரியமாக இருக்கும். குறிப்பாக, தமிழ் அல்லது இந்தி அல்லாத மொழிகளில்கூட அவர் மிக இயல்பாக உணர்ச்சிகளை வெளிப்படுத்துவது எனக்கு முடியாத ஒன்று” என்று சூர்யா பெருமிதத்துடன் தெரிவித்துள்ளார்.