குழந்தைகளின் புத்திசாலித்தனம் எவரிடமிருந்து அதிகமாக மரபாகக் கிடைக்கிறது என்ற கேள்வி நீண்ட காலமாக அறிவியல் உலகில் ஆர்வத்தை ஏற்படுத்தி வருகிறது. இதுகுறித்து மேற்கொள்ளப்பட்ட பல்வேறு ஆய்வுகள், மரபணுக்களும் சுற்றுச்சூழல் காரணிகளும் இணைந்தே ஒருவரின் அறிவுத்திறனை தீர்மானிக்கின்றன என்பதை சுட்டிக்காட்டுகின்றன.
ஒருவரின் புத்திசாலித்தனத்தை அல்லது அறிவுத்திறனை (IQ) தீர்மானிப்பதில் மரபணுக்களுக்கு 50 சதவீதம் முதல் 80 சதவீதம் வரை பங்கு இருப்பதாக ஆய்வுகள் தெரிவிக்கின்றன. மேலும், குழந்தைப் பருவத்தை விட ஒருவர் வளர்ந்து பெரியவராகும் போது மரபணுக்களின் தாக்கம் புத்திசாலித்தனத்தில் அதிகமாக வெளிப்படுவதாகவும் கூறப்படுகிறது.
உலகின் முன்னணி தொழிலதிபர்களில் ஒருவரான எலான் மஸ்க் உள்ளிட்ட சிலர், தங்களைப் போன்ற அறிவார்ந்த குழந்தைகள் அதிகம் பிறக்க வேண்டும் என்ற நோக்கில் விந்துதானம் செய்ய ஆர்வம் காட்டி வருவதாக தகவல்கள் வெளியாகியுள்ளன.
இருப்பினும், அறிவார்ந்த தந்தைக்கு அவசியம் அறிவார்ந்த குழந்தைகளே பிறப்பார்கள் என்ற கருத்து முழுமையாக உண்மையல்ல என்று அறிவியல் ஆய்வுகள் தெரிவிக்கின்றன.
1980களில் அமெரிக்காவில், அதிக அறிவுத்திறன் கொண்ட ஆண்களின் விந்தணுக்களைப் பயன்படுத்தி செயல்பட்ட ஒரு விந்து வங்கியின் மூலம் சுமார் 215 குழந்தைகள் பிறந்ததாக கூறப்படுகிறது. ஆனால், அந்தக் குழந்தைகள் அனைவரும் பின்னாளில் உலகப் புகழ்பெற்ற மேதைகளாக உருவாகவில்லை. பெரும்பாலானோர் சாதாரண வாழ்க்கையையே வாழ்ந்ததாக ஆய்வுகள் குறிப்பிடுகின்றன.
இதனிடையே, புத்திசாலித்தனத்தை நிர்ணயிக்கும் மரபணுக்களில் பல ‘எக்ஸ்’ (X) குரோமோசோமில் அமைந்துள்ளன என்று சில ஆய்வுகள் தெரிவிக்கின்றன. பெண்களிடம் இரண்டு X குரோமோசோம்களும் (XX), ஆண்களிடம் ஒரு X குரோமோசோமும் ஒரு Y குரோமோசோமும் (XY) இருப்பதால், குழந்தைகளின் அறிவாற்றலில் தாயின் மரபணுக்கள் அதிக தாக்கம் செலுத்தக்கூடும் என சில ஆராய்ச்சியாளர்கள் கருதுகின்றனர்.
மேலும், எலிகளில் மேற்கொள்ளப்பட்ட சில பரிசோதனைகளில், சிந்தனை, கற்றல் மற்றும் பகுத்தறிதல் திறன்களை கட்டுப்படுத்தும் மூளையின் ‘செரிப்ரல் கார்டெக்ஸ்’ பகுதியில் தாயின் மரபணுக்களின் தாக்கம் அதிகமாக இருந்ததாகவும், தந்தையின் மரபணுக்கள் உணர்ச்சிகள் மற்றும் நடத்தையை கட்டுப்படுத்தும் பகுதிகளில் அதிக பங்கு வகித்ததாகவும் ஆய்வுகள் தெரிவிக்கின்றன.
இருப்பினும், புத்திசாலித்தனம் என்பது ஒரு குறிப்பிட்ட மரபணுவால் மட்டுமே தீர்மானிக்கப்படுவதில்லை. ஆயிரக்கணக்கான மரபணுக்கள் ஒன்றிணைந்து செயல்படுவதன் மூலமே ஒருவரின் ஒட்டுமொத்த அறிவுத்திறன் உருவாகிறது என்று விஞ்ஞானிகள் விளக்குகின்றனர்.
அதேநேரத்தில், மரபணுக்கள் ஒரு அடித்தளத்தை மட்டுமே அமைக்கின்றன. அந்த அறிவாற்றலை முழுமையாக வெளிக்கொண்டு வருவதில் வெளிப்புற சூழ்நிலைகளும் முக்கிய பங்கு வகிக்கின்றன.
குறிப்பாக, ஆரம்பகால மூளை வளர்ச்சிக்குத் தேவையான சத்தான உணவு, பெற்றோரின் அன்பு மற்றும் வழிகாட்டுதல், தரமான கல்விச் சூழல், சமூக மற்றும் அறிவுசார் தூண்டுதல்கள் போன்றவை குழந்தையின் அறிவுத்திறன் வளர்ச்சியில் குறிப்பிடத்தக்க தாக்கத்தை ஏற்படுத்துகின்றன.
எனவே, ஒரு குழந்தையின் புத்திசாலித்தனத்திற்கான சாத்தியக்கூறுகளை மரபணுக்கள் வழங்கினாலும், அந்த திறனை முழுமையாக வளர்த்தெடுப்பது அவர்கள் வளரும் சூழல் மற்றும் வாழ்க்கை அனுபவங்களே என்பதை அறிவியல் ஆய்வுகள் வலியுறுத்துகின்றன.