பிறப்பு மற்றும் இறப்பு நிகழ்வுகளைப் பதிவு செய்வதில் முக்கிய மாற்றங்களை ஏற்படுத்தும் பிறப்பு மற்றும் இறப்பு பதிவு (திருத்தம்) சட்டம், 2026, நாடு முழுவதும் அக்டோபர் 1, 2026 முதல் அமலுக்கு வந்துள்ளது. இந்தப் புதிய திருத்தத்தின் முக்கிய நோக்கம், பிறப்பு மற்றும் இறப்பு நிகழ்வுகளை உரிய காலத்திற்குள் பதிவு செய்வதை ஊக்குவிப்பதும், தாமதமான பதிவுகளின் உண்மைத்தன்மையைத் தீவிரமாகச் சரிபார்ப்பதும் ஆகும்.
பிறப்பு அல்லது இறப்பு நிகழ்ந்த 21 நாட்களுக்குள் வழக்கமான நடைமுறையில் பதிவு செய்து சான்றிதழைப் பெறலாம். தாமதம் ஏற்பட்டால், தாமதத்தின் காலத்தைப் பொறுத்து வெவ்வேறு அனுமதி மற்றும் சரிபார்ப்பு நடைமுறைகள் அமலுக்கு வருகின்றன.
30 நாட்களுக்குப் பிறகு, ஒரு வருடத்திற்குள் பிறப்பு அல்லது இறப்பைப் பதிவு செய்ய வேண்டுமானால், உரிய தாமதக் கட்டணத்துடன், சம்பந்தப்பட்ட அதிகாரியின் எழுத்துப்பூர்வ அனுமதியும் தேவையான சுய சான்றொப்பமிட்ட ஆவணங்களும் சமர்ப்பிக்க வேண்டும். இந்தப் பிரிவில், 2023 திருத்தச் சட்டம் District Registrar அல்லது விதிப்படி நியமிக்கப்பட்ட அதிகாரியின் அனுமதியை வழங்குகிறது.
ஒரு ஆண்டுக்கு மேல், இரண்டு ஆண்டுகளுக்குள் பதிவு செய்யப்படாத பிறப்பு அல்லது இறப்பு நிகழ்வுகளைப் பதிவு செய்ய, சம்பந்தப்பட்ட மாவட்ட ஆட்சியர் (District Magistrate), வருவாய் கோட்டாட்சியர் (Sub-Divisional Magistrate) அல்லது மாவட்ட ஆட்சியரால் அங்கீகரிக்கப்பட்ட Executive Magistrate உத்தரவு பெற வேண்டும். சம்பவத்தின் உண்மைத்தன்மையைச் சரிபார்த்த பிறகும், உரிய கட்டணம் செலுத்திய பிறகுமே பதிவு செய்ய அனுமதி வழங்கப்படும்.
அதேபோல், இரண்டு ஆண்டுகளுக்கும் மேல் பிறப்பு அல்லது இறப்பு பதிவு செய்யப்படாமல் இருந்தால், இனி மாவட்ட நிர்வாகத்தின் அனுமதி மட்டும் போதாது. சம்பந்தப்பட்ட பகுதியில் அதிகாரம் பெற்றுள்ள முதல் வகுப்பு நீதித்துறை நடுவர் (Judicial Magistrate of the First Class) நீதிமன்றத்தின் உத்தரவைப் பெறுவது கட்டாயமாக்கப்பட்டுள்ளது. நீதிமன்றமும் சம்பவத்தின் உண்மைத்தன்மையைச் சரிபார்த்த பிறகே பதிவு செய்ய உத்தரவிடும்.
இதனால், பிறப்பு மற்றும் இறப்பு நிகழ்வுகளை உரிய காலத்திற்குள் பதிவு செய்யாமல் தாமதப்படுத்துபவர்கள், காலதாமதம் அதிகரிக்க அதிகரிக்க கூடுதல் ஆவணங்கள், சரிபார்ப்புகள் மற்றும் சட்ட நடைமுறைகளை எதிர்கொள்ள வேண்டிய நிலை ஏற்படும்.
பிறப்புச் சான்றிதழுக்கு அதிக முக்கியத்துவம்
2023ஆம் ஆண்டு கொண்டுவரப்பட்ட திருத்தத்தின் அடிப்படையில், 2023 அக்டோபர் 1 அல்லது அதற்குப் பிறகு பிறந்தவர்களுக்கு, பிறப்புச் சான்றிதழ் அவர்களின் பிறந்த தேதி மற்றும் பிறந்த இடத்தை நிரூபிக்கும் முக்கிய ஒற்றை ஆவணமாகப் பயன்படுத்தும் வகையில் சட்டம் மாற்றப்பட்டுள்ளது.
கல்வி நிறுவனங்களில் சேர்க்கை பெறுதல், ஓட்டுநர் உரிமம் பெறுதல், வாக்காளர் பட்டியலைத் தயாரித்தல், திருமணப் பதிவு, மத்திய அல்லது மாநில அரசு மற்றும் உள்ளாட்சி அமைப்புகளில் வேலைவாய்ப்பு, பாஸ்போர்ட் பெறுதல், ஆதார் எண் வழங்குதல் உள்ளிட்ட பல்வேறு தேவைகளில் பிறப்புச் சான்றிதழ் பயன்படுத்தப்படுவதற்கான சட்டப்பூர்வ ஏற்பாடு செய்யப்பட்டுள்ளது.
தேசிய தரவுத்தளத்துடன் இணைப்பு
நாட்டில் பதிவு செய்யப்படும் பிறப்பு மற்றும் இறப்பு விவரங்களைக் கொண்டு தேசிய அளவிலான தரவுத்தளம் உருவாக்கப்பட்டுள்ளது. மாநில அளவிலும் ஒருங்கிணைந்த தரவுத்தளங்கள் உருவாக்கப்பட்டு வருகின்றன.
இந்தத் தரவுகளை, சட்ட விதிகளுக்கு உட்பட்டு, மக்கள் தொகைப் பதிவேடு, வாக்காளர் பட்டியல், ஆதார், ரேஷன் அட்டை, பாஸ்போர்ட், ஓட்டுநர் உரிமம், சொத்துப் பதிவு உள்ளிட்ட பிற அரசுத் தரவுத்தளங்களுடன் இணைப்பதற்கான சட்ட ஏற்பாடுகள் 2023 திருத்தத்தில் செய்யப்பட்டுள்ளன.
இதன் மூலம் அரசின் பல்வேறு சேவைகளில் பிறப்பு மற்றும் இறப்பு தொடர்பான தகவல்களைத் துல்லியமாகப் பயன்படுத்தவும், போலியான அல்லது முரண்பாடான பதிவுகளைக் கண்டறியவும் உதவும் வகையில் தரவுகள் ஒருங்கிணைக்கப்படுகின்றன.
மேலும், பிறப்பு மற்றும் இறப்புச் சான்றிதழ்களை மின்னணு முறையில் வழங்குவதற்கும், டிஜிட்டல் பதிவு முறையை விரிவுபடுத்துவதற்கும் சட்டத்தில் ஏற்பாடுகள் செய்யப்பட்டுள்ளன.
ஆதார் விவரங்களுக்கும் முக்கியத்துவம்
பிறப்பைப் பதிவு செய்யும்போது, பெற்றோர் மற்றும் தகவல் அளிப்பவரின் ஆதார் எண், கிடைக்கப்பெற்றால், சேகரிக்கப்படும் வகையில் 2023 திருத்தச் சட்டத்தில் ஏற்பாடு செய்யப்பட்டுள்ளது. அதேபோல், பிறப்பு மற்றும் இறப்பு பதிவுகளைத் துல்லியமாகப் பராமரிக்க டிஜிட்டல் தரவுகள் பயன்படுத்தப்படுகின்றன.
இதே திருத்தத்தில் தத்தெடுக்கப்பட்ட குழந்தைகள், ஆதரவற்ற அல்லது கைவிடப்பட்ட குழந்தைகள், சரணடைந்த குழந்தைகள், வாடகைத் தாய் மூலம் பிறந்த குழந்தைகள், ஒற்றைப் பெற்றோருக்குப் பிறந்த குழந்தைகள் மற்றும் திருமணம் செய்யாத தாய்மார்களின் குழந்தைகள் ஆகியோரின் பிறப்பைப் பதிவு செய்வதற்கான நடைமுறைகளும் ஒழுங்குபடுத்தப்பட்டுள்ளன.
மருத்துவமனைகளுக்கும் முக்கிய பொறுப்பு
மருத்துவமனையில் ஒருவர் உயிரிழந்தால், இறப்புக்கான மருத்துவக் காரணச் சான்றிதழை (Medical Certificate of Cause of Death) சம்பந்தப்பட்ட மருத்துவ நிறுவனம் பதிவாளரிடம் வழங்க வேண்டும். அதன் நகல் இறந்தவரின் நெருங்கிய உறவினருக்கும் வழங்கப்பட வேண்டும் என்ற ஏற்பாடும் சட்டத்தில் இடம்பெற்றுள்ளது. இதன் மூலம் நாட்டின் இறப்பு மற்றும் சுகாதாரத் தரவுகளைத் துல்லியமாகப் பராமரிக்க முடியும்.
முறையான பதிவின் அவசியம்
பிறப்பு மற்றும் இறப்பு பதிவுகள் மக்கள் தொகைத் தரவுகள், அரசு நலத்திட்டங்கள், வாக்காளர் பட்டியல், அடையாள ஆவணங்கள் உள்ளிட்ட பல்வேறு நிர்வாகப் பணிகளுக்கு முக்கியமானதாக இருப்பதால், அவற்றைத் துல்லியமாகவும் உரிய காலத்திலும் பதிவு செய்வதற்கு அரசு முக்கியத்துவம் அளித்து வருகிறது.
இந்த நிலையில், பிறப்பு அல்லது இறப்பு நிகழ்வுகளைப் பதிவு செய்வதைத் தேவையில்லாமல் தாமதப்படுத்தினால், குறிப்பாக ஒரு ஆண்டைக் கடந்த பிறகு கூடுதல் நிர்வாக அனுமதியும், இரண்டு ஆண்டுகளைக் கடந்தால் நீதிமன்ற உத்தரவும் தேவைப்படும் என்பதால், பொதுமக்கள் உரிய காலத்திற்குள் பதிவு செய்வது முக்கியமாகிறது.
எனவே, குழந்தை பிறந்தாலோ அல்லது குடும்பத்தில் ஒருவர் உயிரிழந்தாலோ, அந்த நிகழ்வை உரிய காலக்கெடுவுக்குள் பதிவு செய்து சான்றிதழைப் பெற்றுக்கொள்வது, எதிர்காலத்தில் ஏற்படக்கூடிய ஆவணச் சிக்கல்கள் மற்றும் கூடுதல் சட்ட நடைமுறைகளைத் தவிர்க்க உதவும்.