திமுக பொதுச்செயலாளருமான துரைமுருகன், பாமக தருமபுரி சட்டமன்ற உறுப்பினர் சௌமியா அன்புமணி குறித்து தெரிவித்த கருத்து, தமிழக அரசியல் வட்டாரத்தில் பேசுபொருளாகியுள்ளது.
சமீபத்தில் செய்தியாளர்களைச் சந்தித்த துரைமுருகனிடம், தமிழக அரசியல் மாற்றங்கள் மற்றும் எதிர்க்கட்சிகளின் கூட்டணி நிலைப்பாடுகள் குறித்து கேள்விகள் எழுப்பப்பட்டன. அப்போது, பாட்டாளி மக்கள் கட்சி எதிர்காலத்தில் தமிழக வெற்றிக் கழகத்துடன் கூட்டணி அமைக்க வாய்ப்புள்ளதாகக் கூறிய அவர், சௌமியா அன்புமணி குறித்து தனது பாணியில் நகைச்சுவையாகவும் நக்கலாகவும் கருத்து தெரிவித்தார்.
செய்தியாளர்கள், விஜய்யின் தமிழக வெற்றிக் கழகத்தின் பிரச்சாரக் கூட்டங்களில் பாமக கொடிகள் பறந்தது குறித்து துரைமுருகனிடம் கேள்வி எழுப்பினர். பாமக தனது அரசியல் நிலைப்பாட்டை அதிகாரப்பூர்வமாக அறிவிக்காத நிலையில், தவெக பிரச்சாரத்தில் பாமக கொடிகள் இடம்பெறுவது ஏன் என்றும், பாமக அந்த அணியில் இணைய வாய்ப்புள்ளதா என்றும் அவர்கள் கேள்வி எழுப்பினர்.
அதற்குப் பதிலளித்த துரைமுருகன், “இருக்கலாம்… நாளைக்கு அவங்க அணியிலே கூட பாட்டாளி மக்கள் கட்சி சேரலாம். அங்கே இருக்கிற அந்த அம்மா சௌமியா… சௌமியா அமைச்சராகக்கூட ஆகலாம். யார் கண்டாங்க? இதெல்லாம் நடக்கும் சார்” என்று கூறிவிட்டு நகர்ந்தார்.
துரைமுருகனின் இந்தக் கருத்து, வரும் சட்டமன்றத் தேர்தலில் திமுக கூட்டணிக்கு எதிராக தவெக மற்றும் பாமக ஆகிய கட்சிகள் இணைந்து களம் காண வாய்ப்புள்ளதா என்ற விவாதத்தை அரசியல் அரங்கில் ஏற்படுத்தியுள்ளது. குறிப்பாக, சௌமியா அன்புமணியை நேரடியாகக் குறிப்பிட்டு அவர் பேசியிருப்பது அரசியல் வட்டாரத்தில் கவனம் பெற்றுள்ளது.
தருமபுரி தொகுதியின் பாமக சட்டமன்ற உறுப்பினராக சௌமியா அன்புமணி செயல்பட்டு வரும் நிலையில், தற்போதைய அரசியல் சூழலில் அவர் பாமகவின் முக்கிய முகமாக உருவெடுத்துள்ளதாக அரசியல் விமர்சகர்கள் கருதுகின்றனர்.
இதனிடையே, கடந்த சில நாட்களாக சமூக வலைத்தளங்களில், “இடைத்தேர்தலுக்குப் பிறகு தவெக அமைச்சரவையில் சௌமியா அன்புமணி இணையப்போகிறார்” என்ற தகவல் வதந்தியாகப் பரவி வந்தது. இந்தப் பின்னணியிலேயே துரைமுருகன், செய்தியாளர்களின் கேள்விக்கு பதிலளிக்கும்போது, அந்தப் பேச்சை வைத்து நக்கலாகக் கருத்து தெரிவித்ததாக கூறப்படுகிறது.
துரைமுருகனின் இந்தப் பேச்சுக்கு ஓரிரு நாட்களுக்கு முன்பு, செஞ்சி கோட்டை ஆஞ்சநேயர் கோயிலுக்கு வழிபடச் சென்ற சௌமியா அன்புமணி செய்தியாளர்களைச் சந்தித்திருந்தார். அப்போது தவெக–பாமக கூட்டணி மற்றும் தனக்கு அமைச்சர் பதவி வழங்கப்படலாம் என்ற பேச்சு குறித்து அவரிடம் கேள்வி எழுப்பப்பட்டது.
அதற்கு பதிலளித்த சௌமியா அன்புமணி, “இது முற்றிலும் வெறும் வதந்தி. இதுபோன்ற அடிப்படை ஆதாரமற்ற செய்திகளை மக்கள் யாரும் கவனிக்கத் தேவையில்லை” என்று திட்டவட்டமாக மறுப்பு தெரிவித்திருந்தார்.
இந்நிலையில், விஜய்யின் தவெக பிரச்சாரக் கூட்டங்களில் பாமக கொடிகள் பறந்த விவகாரம் மீண்டும் அரசியல் விவாதத்தை ஏற்படுத்தியுள்ளது. பாமக அதிகாரப்பூர்வமாக தவெகவை ஆதரிப்பதாக அறிவிக்காத நிலையில், அந்தக் கொடிகள் எவ்வாறு இடம்பெற்றன என்ற கேள்வியும் எழுந்துள்ளது.
இதுகுறித்து பாமக தரப்பில், கூட்டணி தொடர்பாக எந்த முடிவும் இதுவரை எடுக்கப்படவில்லை என்றாலும், களத்தில் இருக்கும் தொண்டர்கள் தங்களுக்குள் வெளிப்படுத்தும் ஆதரவின் வெளிப்பாடாகவே அந்தக் கொடிகள் இடம்பெற்றிருக்கலாம் என கூறப்படுவதாக தகவல் வெளியாகியுள்ளது.
விஜய்யின் அரசியல் நகர்வுகளும், தேர்தல் வியூகங்களும் இன்னும் முழுமையாக வெளிப்படாத நிலையில், தவெக அணியில் பாமக இணையலாம் என்றும், சௌமியா அன்புமணி அமைச்சராகலாம் என்றும் துரைமுருகன் கூறியிருப்பது, விஜய்யின் எதிர்கால அரசியல் கூட்டணி மற்றும் அதிகாரப் பகிர்வு திட்டங்களை மறைமுகமாகக் கிண்டல் செய்யும் வகையில் அமைந்துள்ளதாக அரசியல் வட்டாரத்தில் பேசப்படுகிறது.