சமீபத்தில் சமூக வலைத்தளங்களில் வைரலாகி வரும் டெலிவரி ஊழியர் மற்றும் உணவக உரிமையாளர் இடையேயான வாக்குவாத வீடியோ பல்வேறு தரப்பினரிடையே விவாதத்தை ஏற்படுத்தியுள்ளது. இந்த நிலையில், டெலிவரி ஊழியர் ஒருவர் வெளியிட்டுள்ள வீடியோ சமூக வலைத்தளங்களில் கவனம் பெற்றுள்ளது.
அந்த வீடியோவில் பேசிய அவர், சம்பவத்தில் யார் சரி, யார் தவறு என்பதை விவாதிக்க விரும்பவில்லை என்றும், டெலிவரி ஊழியர்கள் இதுபோன்ற சூழ்நிலைகளில் எவ்வாறு நடந்து கொள்ள வேண்டும் என்பதையே வலியுறுத்த விரும்புவதாக தெரிவித்துள்ளார்.
வாடிக்கையாளருடன் வாக்குவாதம் அல்லது மோதல் ஏற்படும் சூழ்நிலை உருவானால், டெலிவரி ஊழியர்கள் நேரடியாக அதில் ஈடுபடாமல் உடனடியாக அந்த இடத்தை விட்டு விலக வேண்டும் என்றும், சம்பவத்தை நிறுவனத்தின் கால் சென்டரிடம் தெரிவித்து, தேவையெனில் அந்த ஆர்டரை ரத்து செய்து விடுவது நல்லது என்றும் அவர் ஆலோசனை வழங்கியுள்ளார்.
டெலிவரி நிறுவனங்கள் டெலிவரி அடையாள அட்டையை (ID) முடக்கிவிடும் என்ற அச்சத்தில் யாரும் தேவையற்ற அவமானங்களை சகித்துக்கொள்ள வேண்டிய அவசியமில்லை என்றும் அவர் தெரிவித்துள்ளார். பல்வேறு டெலிவரி நிறுவனங்களில் ஒரே மாதிரியான பணிச்சூழல்தான் நிலவுகிறது என்றும், தினமும் சுமார் 12 மணி நேரம் கடுமையாக உழைத்தும், பெட்ரோல் செலவுகளை கழித்த பிறகு மிகக் குறைந்த வருமானமே கிடைக்கிறது என்றும் அவர் வேதனை தெரிவித்துள்ளார்.
மேலும், வெயில், மழை, புயல் உள்ளிட்ட எந்தவிதமான காலநிலையிலும் பொதுமக்களுக்கு தேவையான பொருட்களை கொண்டு சேர்க்கும் பணியை டெலிவரி ஊழியர்கள் செய்து வருவதாகவும், கொரோனா பெருந்தொற்று காலத்திலும் உயிர் அச்சமின்றி மக்களுக்கு அத்தியாவசிய பொருட்களை வழங்கியவர்களும் டெலிவரி ஊழியர்களே என்றும் அவர் நினைவூட்டியுள்ளார்.
எனவே, டெலிவரி ஊழியர்களையும் மரியாதையுடன் நடத்த வேண்டும் என்பதே தங்களின் ஒரே கோரிக்கை என்றும் அவர் தெரிவித்துள்ளார்.
டெலிவரி நிறுவனங்கள் ஊழியர்களின் உழைப்புக்கு ஏற்ற ஊதியமும், ஊக்கத்தொகையும் வழங்குவதில்லை என்றும், மிகக் குறைந்த தொகைக்கே பல கிலோமீட்டர் தூரம் பயணித்து பொருட்களை விநியோகிக்க வேண்டிய சூழல் நிலவுகிறது என்றும் அவர் குற்றம்சாட்டியுள்ளார்.
சமீபத்தில் வைரலான வீடியோவில் டெலிவரி ஊழியர் அவமதிக்கப்பட்டதாகக் கூறப்படும் சம்பவம் தனக்கு மிகவும் வேதனை அளித்ததாகவும், இதுபோன்ற சம்பவங்கள் மீண்டும் நடைபெறாமல் இருக்க டெலிவரி ஊழியர்கள் அமைதியாக செயல்பட்டு, பிரச்சினை ஏற்பட்டால் உடனடியாக கால் சென்டரின் உதவியை நாட வேண்டும் என்றும் அவர் வலியுறுத்தியுள்ளார்.
மேலும், டெலிவரி பணியாளர்கள் தொடர்ந்து பல மணி நேரம் இருசக்கர வாகனத்தில் பயணம் செய்து, வெயிலும் மழையும் பொருட்படுத்தாமல் வாடிக்கையாளர்களிடம் உணவு மற்றும் பொருட்களை கொண்டு சேர்க்கின்றனர். அவர்களின் உடல் உழைப்பையும், பணியின் சிரமங்களையும் பொதுமக்கள் புரிந்துகொள்ள வேண்டும் என்றும் அவர் தெரிவித்துள்ளார்.
வாடிக்கையாளர்களும் டெலிவரி ஊழியர்களும் பரஸ்பர மரியாதையுடனும் பொறுமையுடனும் நடந்து கொண்டால் இதுபோன்ற தேவையற்ற மோதல்களை தவிர்க்க முடியும் என்றும், சமூக வலைத்தளங்களில் ஒருவரை ஒருவர் இழிவுபடுத்தும் சம்பவங்கள் குறைய வேண்டும் என்றும் அவர் வேண்டுகோள் விடுத்துள்ளார்.
இந்த வீடியோ தற்போது சமூக வலைத்தளங்களில் பரவலாகப் பகிரப்பட்டு, டெலிவரி ஊழியர்களின் பணிச்சூழல், பாதுகாப்பு, மரியாதை மற்றும் வேலைநிலைகள் குறித்து புதிய விவாதத்தை உருவாக்கியுள்ளது.