”எம்.எல்.ஏ-க்களுக்கு முதல்வர் விஜய் வச்ச ‘செக்’.. அரசு போட்ட திடீர் ரூல்ஸ்!”

தமிழகத்தில் அமைச்சர்கள் மற்றும் சட்டமன்ற உறுப்பினர்களுக்கு (எம்.எல்.ஏ.க்கள்) அரசு செலவில் கார்கள் வாங்குவதற்கான புதிய விதிமுறைகளை வகுத்து, தமிழக அரசு அதிகாரப்பூர்வ அரசாணையை வெளியிட்டுள்ளது. இதற்காகச் சுமார் ரூ.40 கோடி நிதி ஒதுக்கீடு செய்யப்பட்டுள்ளது. அமைச்சர்கள் மற்றும் முக்கியப் பொறுப்புகளில் உள்ளவர்களுக்கு கார் வாங்க ரூ.26 லட்சமும், பிற எம்.எல்.ஏ.க்களுக்கு ரூ.15 லட்சமும் உச்சவரம்பாக நிர்ணயிக்கப்பட்டுள்ளது.

முதல்வர் விஜய், சட்டப்பேரவையில் 110 விதியின் கீழ் வெளியிட்ட அறிவிப்பைத் தொடர்ந்து, இந்தத் திட்டத்தை நடைமுறைப்படுத்தும் வகையில், 1955-ஆம் ஆண்டு தமிழ்நாடு சட்டமன்ற உறுப்பினர்களின் பயணப்படி விதிகளில் திருத்தம் மேற்கொள்ளப்பட்டுள்ளது. இதையடுத்து, தமிழ்நாடு அரசு அரசிதழில் (Tamil Nadu Government Gazette) புதிய விதிமுறைகள் வெளியிடப்பட்டுள்ளன.

புதிய அரசாணையின்படி, அமைச்சர்கள், சபாநாயகர், துணை சபாநாயகர், எதிர்க்கட்சித் தலைவர் மற்றும் அரசுத் தலைமைக் கொறடா ஆகியோருக்கு அரசு செலவில் கார் வாங்க ரூ.26 லட்சம் வரை அனுமதி வழங்கப்பட்டுள்ளது. பிற சட்டமன்ற உறுப்பினர்களுக்குத் தொகுதிப் பணிகளை மேற்கொள்வதற்காக வழங்கப்படும் கார்களுக்கு ரூ.15 லட்சம் வரை உச்சவரம்பு நிர்ணயிக்கப்பட்டுள்ளது.

இந்தத் தொகைக்குள் காரின் ஷோரூம் விலை, வாகன வரிகள், பதிவுக் கட்டணம் மற்றும் மோட்டார் வாகனக் காப்பீட்டுக் கட்டணம் உள்ளிட்ட செலவுகள் அடங்கும். மேலும், எதிர்காலத்தில் வாகனங்களின் விலை உயர்வைக் கருத்தில் கொண்டு, கார் கொள்முதலுக்கான உச்சவரம்புத் தொகையை ஆண்டுதோறும் 5 சதவீதம் உயர்த்தும் வகையிலும் விதிகளில் திருத்தம் செய்யப்பட்டுள்ளது.

அமைச்சர்கள் மற்றும் முக்கியப் பொறுப்புகளில் உள்ளவர்களுக்கான கார்கள் அரசின் பொதுத்துறை மூலமாகவும், சபாநாயகர், துணை சபாநாயகர், எதிர்க்கட்சித் தலைவர் மற்றும் அரசுத் தலைமைக் கொறடா ஆகியோருக்கான கார்கள் சட்டப்பேரவைச் செயலகம் மூலமாகவும் கொள்முதல் செய்யப்படும். பிற எம்.எல்.ஏ.க்களுக்கான கார்கள் சம்பந்தப்பட்ட மாவட்ட ஆட்சியர்கள் மூலம் வாங்கப்படும். அனைத்து வாகனங்களும் மத்திய அரசின் அரசு மின்-சந்தைத் தளமான ஜெம் (Government e-Marketplace – GeM) போர்ட்டல் வாயிலாகக் கொள்முதல் செய்யப்படும்.

மேலும், வாங்கப்படும் அனைத்து வாகனங்களும் பாரத் ஸ்டேஜ்-6 (BS-VI) சுற்றுச்சூழல் மாசுக் கட்டுப்பாட்டுத் தரநிலைகளுக்கு இணங்கியதாக இருக்க வேண்டும். பழைய மாசுக் கட்டுப்பாட்டுத் தரநிலைகளைக் கொண்ட வாகனங்களை வாங்குவதற்கு அனுமதி இல்லை எனத் தெரிவிக்கப்பட்டுள்ளது.

அமைச்சர்கள் மற்றும் முக்கியப் பொறுப்புகளில் உள்ளவர்களுக்கு வழங்கப்படும் கார்களின் எரிபொருள், பராமரிப்பு, பழுதுபார்ப்பு மற்றும் ஓட்டுநர் ஊதியம் உள்ளிட்ட செலவுகளை அரசே ஏற்கும். ஆனால், பிற எம்.எல்.ஏ.க்களுக்கு வழங்கப்படும் கார்களின் பராமரிப்பு, பழுதுபார்ப்பு, எரிபொருள் மற்றும் ஓட்டுநர் செலவுகளை அவர்களே ஏற்க வேண்டும். இதற்கான செலவுகள், அவர்களுக்கு வழங்கப்படும் மாதாந்திர வாகனப் படியிலிருந்து மேற்கொள்ளப்பட வேண்டும் என அரசாணையில் குறிப்பிடப்பட்டுள்ளது.

அமைச்சர்கள் மற்றும் எம்.எல்.ஏ.க்களின் பதவிக்காலம் முடிவடைந்தாலோ, ராஜினாமா செய்தாலோ, தகுதிநீக்கம் செய்யப்பட்டாலோ அல்லது இறப்பு உள்ளிட்ட காரணங்களால் பதவி காலியானாலோ, அரசு வழங்கிய காரைத் திரும்ப ஒப்படைக்க வேண்டும்.

அமைச்சர்கள் தங்களது கார்களை அரசின் பொதுத்துறையிடம் ஒப்படைக்க வேண்டும். சபாநாயகர், துணை சபாநாயகர், எதிர்க்கட்சித் தலைவர் மற்றும் அரசுத் தலைமைக் கொறடா ஆகியோர் தங்களுக்கான கார்களைச் சட்டப்பேரவைச் செயலகச் செயலரிடம் ஒப்படைக்க வேண்டும். பிற எம்.எல்.ஏ.க்கள் தங்களது கார்களைச் சம்பந்தப்பட்ட மாவட்ட ஆட்சியரிடம் ஒப்படைப்பதுடன், இதுகுறித்த தகவலைச் சட்டப்பேரவைச் செயலகத்திற்கும் தெரிவிக்க வேண்டும்.

முதல்வர் விஜய் கடந்த ஆகஸ்ட் மாதம் சட்டப்பேரவையில் இந்தத் திட்டம் தொடர்பாக அறிவிப்பு வெளியிட்டபோது, எம்.எல்.ஏ.க்கள் தங்களது தொகுதிப் பணிகளைச் சிறப்பாக மேற்கொள்வதற்காக மாதந்தோறும் ரூ.75,000 வாகனப் படியாக வழங்கப்படும் என்றும், தனிச் செயலாளரை (Personal Assistant) நியமித்துக்கொள்ள கூடுதலாக ரூ.25,000 வழங்கப்படும் என்றும் தெரிவித்திருந்தார். இதன்படி, வாகனப்படி மற்றும் தனிச் செயலாளர் நியமனத்திற்கான படி என மொத்தம் மாதம் ரூ.1 லட்சம் வரை வழங்கப்படும் என அறிவிக்கப்பட்டிருந்தது.

மாநிலத்தின் நிதிநிலையைக் கருத்தில் கொண்டு, அரசு வழங்கும் கார்கள் தங்களுக்குத் தேவையில்லை என எதிர்க்கட்சித் தலைவர் உதயநிதி ஸ்டாலின் உள்ளிட்ட திமுக எம்.எல்.ஏ.க்களும், இடதுசாரிக் கட்சிகளைச் சேர்ந்த சட்டமன்ற உறுப்பினர்களும் ஏற்கெனவே அறிவித்துள்ளனர். இதனால், அரசின் புதிய கார் வழங்கும் திட்டம் அரசியல் வட்டாரங்களிலும் பொதுமக்கள் மத்தியிலும் விவாதத்தை ஏற்படுத்தியுள்ளது.

அமைச்சர்கள் மற்றும் முக்கியப் பொறுப்புகளில் உள்ளவர்கள் பொதுவாக டொயோட்டா இன்னோவா (Toyota Innova) போன்ற பெரிய ரகக் கார்களை அரசு வாகனங்களாகப் பயன்படுத்தி வருகின்றனர். ஆனால், பிற எம்.எல்.ஏ.க்களுக்கு ரூ.15 லட்சம் மட்டுமே கொள்முதல் உச்சவரம்பாக நிர்ணயிக்கப்பட்டுள்ளதால், அந்தத் தொகைக்குள் இன்னோவா போன்ற வாகனங்களை வாங்குவது சிரமமாக இருக்கலாம். இதனால், நடுத்தர ரகக் கார்களையே தேர்வு செய்ய வேண்டிய நிலை ஏற்படலாம் எனக் கூறப்படுகிறது. இந்த விலை வரம்பு காரணமாகச் சில எம்.எல்.ஏ.க்கள் அதிருப்தியில் இருப்பதாகவும் தகவல்கள் தெரிவிக்கின்றன.

முதல்வர் விஜய் இந்தத் திட்டத்தை அறிவித்ததைத் தொடர்ந்து, அமைச்சர்கள் மற்றும் எம்.எல்.ஏ.க்களுக்கு எந்தெந்த மாடல் கார்களை வழங்கலாம் என்பதை முடிவு செய்வதற்காக, பல முன்னணி நிறுவனங்களின் பல்வேறு வகையான கார்கள் சென்னை தலைமைச் செயலகத்திற்கு வரவழைக்கப்பட்டு, அதிகாரிகளால் நேரடியாக ஆய்வு செய்யப்பட்டதாகவும் தெரிவிக்கப்பட்டுள்ளது.

தமிழக சட்டமன்றத்தில் உள்ள பல எம்.எல்.ஏ.க்கள் பொருளாதார வசதி படைத்தவர்களாகவும், கோடீஸ்வரர்களாகவும் இருக்கும் நிலையில், அவர்களுக்கு மக்கள் வரிப்பணத்தில் கார் வழங்குவது அவசியமா என்ற கேள்வி சமூக வலைத்தளங்களில் எழுந்துள்ளது.

அதேநேரத்தில், முதல்முறையாகத் தேர்தலில் வெற்றி பெற்று சட்டமன்றத்திற்குள் நுழையும், பொருளாதாரத்தில் பின்தங்கிய பின்னணியைக் கொண்ட எம்.எல்.ஏ.க்கள் தங்களது தொகுதி மக்களை நேரில் சந்திக்கவும், அரசுத் திட்டங்களின் செயல்பாடுகளைக் கண்காணிக்கவும், தொகுதி மேம்பாட்டுப் பணிகளை மேற்கொள்ளவும் இந்த வாகன உதவி பயனுள்ளதாக இருக்கும் என அரசுத் தரப்பில் விளக்கம் அளிக்கப்படுகிறது.

அரசின் புதிய அரசாணை மூலம், அமைச்சர்கள் மற்றும் சட்டமன்ற உறுப்பினர்களுக்கான கார் கொள்முதல் உச்சவரம்பு, வாகனப் பராமரிப்புச் செலவுகள், கொள்முதல் நடைமுறை மற்றும் பதவிக்காலம் முடிவடைந்ததும் வாகனங்களை ஒப்படைப்பதற்கான விதிமுறைகள் ஆகியவை முறைப்படுத்தப்பட்டுள்ளன.