தமிழக பள்ளிக்கல்வித்துறை மானியக் கோரிக்கை மற்றும் ஆசிரியர் தகுதித் தேர்வு (TET) விவகாரம் தொடர்பாக, பள்ளிக்கல்வித்துறை அமைச்சர் ராஜ்மோகன் மௌனம் காப்பது ஏன் என திமுக முன்னாள் அமைச்சர் அன்பில் மகேஷ் பொய்யாமொழி சரமாரியாகக் கேள்வி எழுப்பியுள்ளார்.
ஒன்றிய அரசு தமிழகத்திற்கான கல்வி நிதியை வழங்காமல் நிறுத்தி வைத்திருப்பது குறித்து, துறை சார்ந்த அமைச்சரான ராஜ்மோகன் சட்டப்பேரவையிலோ, மக்கள் மன்றத்திலோ பேசாமல் இருப்பது ஏன் என்றும் அவர் கேள்வி எழுப்பியுள்ளார்.
ஒன்றிய அரசு நிதி வழங்காத விவகாரத்தை தமிழக வெற்றிக் கழக அரசு மறைக்க வேண்டிய அவசியம் என்ன என்றும் அன்பில் மகேஷ் கேள்வி எழுப்பியுள்ளார். திசைதிருப்பும் அரசியல் செய்யாமல், தமிழக மக்களுக்கும், ஆசிரியர்களுக்கும், மாணவர்களுக்கும் தவெக அரசு உடனடியாக நேரடியான விளக்கம் அளிக்க வேண்டும் எனவும் அவர் வலியுறுத்தியுள்ளார்.
தற்போது நடைபெற்று வரும் தமிழக சட்டப்பேரவைக் கூட்டத்தொடரில், கல்வித்துறை மானியக் கோரிக்கை மீதான விவாதத்தின்போது ஆளுங்கட்சியான தவெக மற்றும் எதிர்க்கட்சியான திமுக இடையே கடுமையான காரசார விவாதங்கள் நடைபெற்று வருகின்றன. பள்ளிக்கல்வித்துறை பணிகளில் அமைச்சர் ராஜ்மோகன் கூடுதல் அர்ப்பணிப்புடன் செயல்பட வேண்டும் என்றும் அன்பில் மகேஷ் விமர்சித்துள்ளார்.
இதற்கு முன்னதாக, முன்னாள் அமைச்சர் அன்பில் மகேஷ் மீது தற்போதைய அரசு தரப்பில் லஞ்சம் தொடர்பான குற்றச்சாட்டுகள் முன்வைக்கப்பட்டிருந்தன. அதற்குப் பதிலடியாகவும், பள்ளிக்கல்வித்துறையின் நிர்வாகக் குறைபாடுகளைச் சுட்டிக்காட்டும் வகையிலும் அன்பில் மகேஷ் தற்போது பல்வேறு கேள்விகளை எழுப்பியுள்ளதாகக் கூறப்படுகிறது.
ஆசிரியர் தகுதித் தேர்வு (TET) விவகாரம் தொடர்பாக சட்டப்பேரவையில் கொண்டுவரப்பட்ட தீர்மானத்தை விமர்சித்த அன்பில் மகேஷ், “இது வெறும் அரசியல் நாடகமா அல்லது ஆசிரியர்களுக்குக் கிடைக்கும் உண்மையான நம்பிக்கையா?” எனக் கேள்வி எழுப்பியுள்ளார். துறை சார்ந்த புதிய அறிவிப்புகள் மற்றும் தீர்மானங்கள் கொண்டுவரப்படும்போது, அதற்குப் பொறுப்பான அமைச்சர் முழுமையான விளக்கத்தை அளிக்காமல் பின்வாங்குவது ஏன் என்றும் அவர் சாடியுள்ளார்.
தமிழக சட்டப்பேரவையில் ஆகஸ்ட் 25ஆம் தேதி பள்ளிக்கல்வித்துறை அமைச்சர் ராஜ்மோகன் முக்கியத் தீர்மானம் ஒன்றைக் கொண்டு வந்தார். 2010 ஆகஸ்ட் 23ஆம் தேதிக்கு முன்னதாக நியமிக்கப்பட்ட அரசுப் பள்ளி ஆசிரியர்களுக்கு, கட்டாய ஆசிரியர் தகுதித் தேர்வான TET-ல் இருந்து முழுமையான மற்றும் நிரந்தர விலக்கு அளிக்க வேண்டும் என்பதே அந்தத் தீர்மானமாகும்.
உச்ச நீதிமன்ற உத்தரவின்படி, ஆசிரியர்கள் தங்களது பதவியையும், பதவி உயர்வு உள்ளிட்ட பணிச் சலுகைகளையும் தக்கவைத்துக்கொள்ள 2028 ஆகஸ்ட் 31ஆம் தேதிக்குள் TET தேர்ச்சி பெற வேண்டிய நிலை ஏற்பட்டுள்ளது. இதனால் தமிழகத்தில் 3,28,701 ஆசிரியர்கள் பாதிக்கப்படும் அபாயம் உள்ளதாகக் கூறப்படும் நிலையில், ஒன்றிய அரசு உடனடியாகத் தலையிட்டு சட்டத் திருத்தம் கொண்டு வர வேண்டும் என தீர்மானம் கோருகிறது.
இந்த தீர்மானத்தை அன்பில் மகேஷ் “கண்துடைப்பு நாடகம்” என விமர்சித்துள்ளார். TET தேர்வு எழுதாத ஆசிரியர்களின் பட்டியலைச் சேகரித்து அவர்கள் மீது நடவடிக்கை எடுக்கத் தயாராக இருந்த அரசு, மறுநாளே விலக்கு கோரி தீர்மானம் கொண்டு வருகிறது என்றும், இதில் தவெக அரசின் உண்மை முகம் எது என்றும் அவர் கேள்வி எழுப்பியுள்ளார்.
மேலும், உச்ச நீதிமன்றம் விதித்துள்ள காலக்கெடு நெருங்கி வரும் நிலையில், வெறும் சட்டப்பேரவைத் தீர்மானத்துடன் நின்றுவிடாமல், ஒன்றிய அரசை வலியுறுத்தி இதற்கான சட்டப்பூர்வ அரசாணையைப் பெற அமைச்சர் ராஜ்மோகன் என்ன நடவடிக்கை எடுக்கப் போகிறார் என்றும் அன்பில் மகேஷ் சாடியுள்ளார்.
15 முதல் 20 ஆண்டுகள் வரை தடையின்றிப் பணியாற்றி, ஓய்வுபெறும் வயதை நெருங்கிக் கொண்டிருக்கும் 3.28 லட்சம் ஆசிரியர்களின் வாழ்வாதாரத்தை வைத்து தற்போதைய அரசு அரசியல் செய்யக் கூடாது என்றும் அவர் வலியுறுத்தியுள்ளார்.
இதற்கிடையே, தமிழக வெற்றிக் கழக அரசின் நிதியமைச்சர் ந. மரிய வில்சன், கடந்த திமுக ஆட்சிக்காலத்தில் பள்ளிக்கல்வித்துறை அமைச்சராக இருந்த அன்பில் மகேஷ் கல்வி நிறுவனங்களிடம் கட்டாய வசூல் செய்ததாகக் கடுமையான குற்றச்சாட்டை முன்வைத்திருந்தார். குறிப்பிட்ட தொகையை டி.நகரில் வைத்து அன்பில் மகேஷிடம் நேரடியாக வழங்கியதாகவும் அவர் சட்டப்பேரவையில் கூறியிருந்தார்.
இந்தக் குற்றச்சாட்டை முற்றிலுமாக மறுத்த அன்பில் மகேஷ், “அமைச்சராக இருக்கும் ஒருவரே சட்டப்பேரவையில் நின்று ‘நான் லஞ்சம் கொடுத்தேன்’ என்று ஒப்புக்கொள்வது சட்டப்படி குற்றம். எனவே, லஞ்ச ஒழிப்புத்துறை (DVAC) உடனடியாக அமைச்சர் மரிய வில்சனை அழைத்து விசாரணை நடத்த வேண்டும்” என சவால் விடுத்துள்ளார்.
இதற்கு பதிலடியாக, புதிய அரசு தரப்பில் அன்பில் மகேஷின் முந்தைய ஆட்சிக்காலப் பணிகள் குறித்து விமர்சனங்கள் முன்வைக்கப்பட்ட நிலையில், அதற்குப் பதிலடி கொடுக்கும் வகையிலேயே பள்ளிக்கல்வித்துறை தொடர்பாக அவர் சரமாரியான கேள்விகளை எழுப்பியுள்ளதாக அரசியல் விமர்சகர்கள் கருதுகின்றனர்.
திமுகவின் தொடர் விமர்சனங்களுக்கு பதிலளித்துள்ள தவெக தரப்பு, ஆசிரியர்களின் நலனைக் காப்பதில் அரசுக்கு முழு அக்கறை இருப்பதாக தெரிவித்துள்ளது. ஆட்சி பொறுப்பேற்ற சில மாதங்களிலேயே ஆசிரியர்களின் நலனுக்காக இவ்வளவு முக்கியத்துவம் வாய்ந்த வரலாற்றுச் சிறப்புமிக்க தீர்மானத்தை கொண்டு வந்துள்ளதாகவும் ஆளுங்கட்சித் தரப்பு கூறியுள்ளது.
இதனால், TET விலக்கு தீர்மானம், தமிழகத்திற்கான கல்வி நிதி விவகாரம், அமைச்சர் ராஜ்மோகனின் செயல்பாடு மற்றும் அன்பில் மகேஷ் மீது முன்வைக்கப்பட்ட லஞ்சக் குற்றச்சாட்டுகள் ஆகியவற்றை மையமாக வைத்து தவெக-திமுக இடையேயான அரசியல் மோதல் தமிழகத்தில் மேலும் தீவிரமடைந்துள்ளது.