நடிகை திரிஷா குறித்து சர்ச்சைக்குரிய வகையில் பேசியதாக எழுந்த புகாரில், தமிழ்நாடு சட்டமன்ற எதிர்க்கட்சித் தலைவர் உதயநிதி ஸ்டாலின் கைது செய்யப்பட்டுள்ளார். இந்தக் கைது, பெண்களின் பாதுகாப்பிற்காக முன்னாள் முதலமைச்சர் மு. கருணாநிதி தலைமையிலான திமுக அரசு கொண்டு வந்த “தமிழ்நாடு பெண்கள் வன்கொடுமை தடுப்புச் சட்டம், 1998” (Tamil Nadu Prohibition of Harassment of Women Act, 1998) கீழ் மேற்கொள்ளப்பட்டிருப்பது அரசியல் வட்டாரத்தில் பரபரப்பை ஏற்படுத்தியுள்ளது.
தஞ்சாவூரில் நடைபெற்ற காவிரி விவகாரப் போராட்டக் கூட்டத்தில், கூட்டத்தில் இருந்த சிலர் நடிகை திரிஷாவின் பெயரை முழக்கமிட்டபோது, முதல்வர் விஜய் மற்றும் நடிகை திரிஷா குறித்து உதயநிதி ஸ்டாலின் இரட்டை அர்த்தத்தில் இழிவாகப் பேசியதாகக் குற்றச்சாட்டு எழுந்தது. இதையடுத்து, தமிழக வெற்றிக் கழகத்தின் (தவெக) மகளிரணி சார்பில் தஞ்சாவூர் காவல் நிலையத்தில் புகார் அளிக்கப்பட்டது.
இந்தப் புகாரின் அடிப்படையில், பாரதிய நியாய சன்ஹிதா (BNS), தகவல் தொழில்நுட்பச் சட்டம் மற்றும் தமிழ்நாடு பெண்கள் வன்கொடுமை தடுப்புச் சட்டத்தின் (TNPHW Act) பிரிவு 4 உள்ளிட்ட பல்வேறு பிரிவுகளின் கீழ் வழக்குப்பதிவு செய்யப்பட்டது.
இதனைத் தொடர்ந்து, ஆகஸ்ட் 4, 2026 அன்று காலை, சென்னை நீலாங்கரையில் உள்ள அவரது இல்லத்தில் வைத்து உதயநிதி ஸ்டாலின் கைது செய்யப்பட்டார். பின்னர் அவர் தரப்பில் சென்னை உயர்நீதிமன்றத்தில் அவசர மனு தாக்கல் செய்யப்பட்டது. வழக்கை விசாரித்த நீதிமன்றம், கைதுக்குப் பிந்தைய நடைமுறைகள் முடிந்ததும் அதே நாளில் அவரை விடுவிக்க வேண்டும் என்று உத்தரவிட்டது. அதன்படி, காவல் நிலையப் பிணையில் உதயநிதி ஸ்டாலின் விடுவிக்கப்பட்டார்.
தன் மீதான குற்றச்சாட்டுகளை மறுத்துள்ள உதயநிதி ஸ்டாலின், தனது பேச்சு “கட்-காப்பி-பேஸ்ட்” செய்து திரித்துப் பரப்பப்பட்டுள்ளதாகவும், இது அரசியல் நோக்கத்துடன் தொடரப்பட்ட போலி வழக்கு என்றும், சட்டரீதியாக இதை எதிர்கொள்வேன் என்றும் தெரிவித்துள்ளார்.
இந்தக் கைது தொடர்பாக அதிகம் பேசப்படும் அம்சம், உதயநிதி மீது பயன்படுத்தப்பட்டிருக்கும் சட்டமே ஆகும். பெண்களின் பாதுகாப்பை உறுதி செய்யும் நோக்கில், 1998ஆம் ஆண்டு அப்போதைய முதலமைச்சர் மு. கருணாநிதி தலைமையிலான திமுக அரசு “தமிழ்நாடு பெண்கள் வன்கொடுமை தடுப்புச் சட்டத்தை” கொண்டு வந்தது. தற்போது அதே சட்டத்தின் கீழ் கருணாநிதியின் பேரனும், எதிர்க்கட்சித் தலைவருமான உதயநிதி ஸ்டாலின் மீது வழக்குப்பதிவு செய்யப்பட்டிருப்பது அரசியல் விவாதத்திற்கு வழிவகுத்துள்ளது.
இந்தச் சட்டம் உருவான பின்னணியும் குறிப்பிடத்தக்கது. 1998 ஜூலை மாதம், சென்னை எத்திராஜ் கல்லூரி மாணவி சாரதா, பேருந்தில் பயணித்தபோது சில சமூக விரோதிகளின் கேலி மற்றும் பாலியல் தொந்தரவால் கடுமையாகப் பாதிக்கப்பட்டு உயிரிழந்த சம்பவம் தமிழகம் முழுவதும் அதிர்வலைகளை ஏற்படுத்தியது. பெண்களின் பாதுகாப்பு குறித்த கோரிக்கைகள் வலுத்ததைத் தொடர்ந்து, இந்திய அரசியல் சாசனத்தின் 213ஆம் பிரிவின் கீழ், 1998 ஜூலை 30ஆம் தேதி ஆளுநரின் ஒப்புதலுடன் முதற்கட்டமாக அவசரச் சட்டம் (Ordinance) பிறப்பிக்கப்பட்டது.
பின்னர், தமிழக சட்டமன்றத்தில் இதற்கான மசோதா தாக்கல் செய்யப்பட்டு, உறுப்பினர்களின் விவாதத்திற்குப் பிறகு ஒருமனதாக நிறைவேற்றப்பட்டது. ஆளுநரின் ஒப்புதல் கிடைத்ததைத் தொடர்ந்து, 1998 டிசம்பர் 21ஆம் தேதி அரசிதழில் வெளியிடப்பட்டு, “தமிழ்நாடு சட்டம் எண் 44 – 1998” என்ற பெயரில் அதிகாரப்பூர்வமாகச் சட்டமாக அமலுக்கு வந்தது.
இந்தச் சட்டத்தின்படி, கல்வி நிறுவனங்கள், பேருந்து நிலையங்கள், கோயில்கள், கடற்கரைகள், பொது போக்குவரத்து உள்ளிட்ட அனைத்து பொது இடங்களிலும் பெண்களை கேலி செய்வது, இழிவுபடுத்துவது அல்லது வன்கொடுமை செய்வது தடை செய்யப்பட்டுள்ளது. குறிப்பாக, சட்டத்தின் பிரிவு 4-ன் கீழ் பெண்களை வன்கொடுமை செய்யும் அல்லது அதற்குத் துணைபுரியும் நபர்களுக்கு மூன்று ஆண்டுகள் வரை சிறைத்தண்டனையும், குறைந்தபட்சம் ரூ.10,000 அபராதமும் விதிக்க வழிவகை செய்யப்பட்டுள்ளது.
2002ஆம் ஆண்டு இந்தச் சட்டத்தில் முக்கிய திருத்தங்கள் மேற்கொள்ளப்பட்டன. “Eve-Teasing” என்ற சொல்லுக்குப் பதிலாக “Harassment of Woman” என்ற பரந்த வரையறை கொண்டு வரப்பட்டது. மேலும், பெண்கள் வன்கொடுமையால் உயிரிழந்தாலோ அல்லது தற்கொலை செய்துகொண்டாலோ கடுமையான தண்டனை வழங்கும் 4A மற்றும் 4B ஆகிய புதிய பிரிவுகளும் சேர்க்கப்பட்டன.
அதனைத் தொடர்ந்து, 2025 ஜனவரியில் முதலமைச்சர் மு.க. ஸ்டாலின் தலைமையிலான அரசு இந்தச் சட்டத்தை மேலும் பலப்படுத்தியது. சமூக வலைத்தளங்கள், டிஜிட்டல் தளங்கள் மற்றும் மின்னணு ஊடகங்கள் மூலம் பெண்களை இழிவுபடுத்துவதும் இந்தச் சட்டத்தின் வரம்பிற்குள் கொண்டு வரப்பட்டு, தண்டனை விதிகளும் மேலும் கடுமையாக்கப்பட்டன.
பெண்களின் பாதுகாப்பை உறுதி செய்யும் நோக்கில் கருணாநிதி தலைமையிலான அரசு கொண்டு வந்த இந்தச் சட்டம், பின்னர் பல்வேறு திருத்தங்களின் மூலம் வலுப்படுத்தப்பட்ட நிலையில், தற்போது அதே சட்டத்தின் கீழ் அவரது பேரனும் எதிர்க்கட்சித் தலைவருமான உதயநிதி ஸ்டாலின் மீது வழக்குப்பதிவு செய்யப்பட்டிருப்பது தமிழக அரசியலில் முக்கிய விவாதப் பொருளாக மாறியுள்ளது.