சமீபத்தில் நடைபெற்ற திரைப்பட மேடை நிகழ்ச்சி ஒன்றில் கலந்துகொண்ட நடிகை ப்ரீத்தி முகுந்தன், விஜய் குறித்து பேசும்போது, “முதலமைச்சர் விஜய்” என்று குறிப்பிட்டார். அவர் அவ்வாறு கூறிய உடனேயே, அரங்கில் இருந்த ரசிகர்கள் உற்சாகக் கோஷங்களை எழுப்பி, பலத்த கரகோஷத்துடன் தங்களது வரவேற்பை வெளிப்படுத்தினர்.
மேடையில் பேசிய ப்ரீத்தி முகுந்தன், தமிழக வெற்றிக் கழகத்தின் (TVK) தலைவரான விஜய், தற்போது மக்களின் பணிகளில் மிகவும் தீவிரமாக செயல்பட்டு வருவதால், சாப்பிடுவதற்கோ, தூங்குவதற்கோ கூட நேரமில்லாமல் இயங்கி வருகிறார் என்று கூறினார்.
அவர் தொடர்ந்து பேசியபோது, அரங்கில் கூடியிருந்த ரசிகர்கள் “CM விஜய்” என்ற கோஷங்களை முழக்கமிட்டு, நிகழ்ச்சி அரங்கையே அதிரவைத்தனர்.
முன்னதாக, தனது ‘பிளாஸ்ட்’ (Blast) திரைப்படத்தின் ஆக்ஷன் காட்சிகள் குறித்து அளித்திருந்த ஒரு நேர்காணலில், நடிகர் விஜய் தான் தனக்கு மிகப்பெரிய இன்ஸ்பிரேஷன் என்றும், அவரைப் போலவே ஆக்ஷன் காட்சிகளில் சிறப்பாக நடிக்க வேண்டும் என்பதே தனது விருப்பமாக இருந்ததாகவும் ப்ரீத்தி முகுந்தன் தெரிவித்திருந்தார்.
மேலும், விஜய்யின் அரசியல் மற்றும் திரைப் பயணம் குறித்து பேசிய அவர், “விஜய் சார் எனக்கு மட்டும் இன்ஸ்பிரேஷன் கிடையாது. ஒட்டுமொத்த தமிழ்நாடே அவருக்கு ஓட்டு போட்டதற்கு, சினிமாவில் அவர் நடித்த காதல் கதைகள் மற்றும் பல்வேறு கதாபாத்திரங்கள் மூலம் மக்கள் அவர் மீது வைத்திருந்த அளவற்ற அன்பே காரணம். இது என் முதல் காதல் மட்டுமல்ல, என் மொத்தக் காதலும் இதுதான்,” என்று நெகிழ்ச்சியுடன் கூறியதாகத் தெரிவித்தார்.
2026 மே மாதம் வெளியாகி மிகப்பெரிய வெற்றியைப் பெற்ற ‘பிளாஸ்ட்’ திரைப்படத்தில், ப்ரீத்தி முகுந்தன் பல அதிரடியான ஆக்ஷன் காட்சிகளில் நடித்திருந்தார்.
இந்தப் படத்தில் டூப் கலைஞரை பயன்படுத்தாமல் சண்டைக் காட்சிகளில் நடிப்பதற்காக, அவர் பிரத்யேகமாக கராத்தே பயிற்சி பெற்று, ஸ்டண்ட் மாஸ்டர்களுடன் தீவிரமாக பயிற்சி மேற்கொண்டதாகவும், அதற்கு முக்கிய உந்துசக்தியாக விஜய்யின் ஆக்ஷன் பாணியே இருந்ததாகவும் கூறியுள்ளார்.
இந்த நிகழ்ச்சியின் போது, மேடையில் இருந்த தொகுப்பாளர், விஜய்யின் பிரபலமான வசனங்களில் ஒன்றை பேச முடியுமா என்று ப்ரீத்தி முகுந்தனிடம் கேட்டார். அதற்கு அவர், விஜய்யின் பிரபலமான “நீ படிச்ச ஸ்கூல்ல நான் ஹெட் மாஸ்டர்டா…” என்ற வசனத்தை மேற்கோள் காட்டி, அதுவே தனக்கு மிகவும் பிடித்த வசனம் என்று கூறியதையடுத்து, ரசிகர்கள் மீண்டும் உற்சாக ஆரவாரத்தில் ஈடுபட்டனர்.