மறைமலை நகரில் நவம்பர் 1 -இன்று நடைபெற்ற அ.தி.மு.க-வின் 55-வது ஆண்டு தொடக்க விழா. மேடை அதிர ஆர்ப்பரித்த தொண்டர்கள் மத்தியில் மைக் பிடித்த எடப்பாடி கே.பழனிசாமி, ஒரே வரியில் தமிழக அரசியலைத் தீப்பிடிக்க வைத்துவிட்டார்.
‘‘விஜய் தமிழ்நாட்டின் முதலமைச்சர் இல்லை. அவருக்கு மேல் மூன்று முதலமைச்சர்கள் இருக்கிறார்கள். தேர்தல் வியூக வகுப்பாளர்களைத் தேர்தலுக்குப் பயன்படுத்தினார்கள் சரி. ஆனால் ஆட்சிக்கு வந்த பிறகு அந்த மூன்று வியூக வகுப்பாளர்கள்தான் தமிழ்நாட்டை ஆண்டுகொண்டிருக்கிறார்கள். அவர்கள் என்ன சொல்கிறார்களோ அதுதான் தமிழ்நாட்டின் தலையெழுத்து. இந்த முதலமைச்சருக்கு ஒன்றும் தெரியாது!’’
என பேசும்போது அரங்கமே அதிர்ந்தது. பெயரை மட்டும் அவர் சொல்லவில்லை. அதுதான் இ.பி.எஸ் ஸ்டைல் என்கிறார்கள் அரசியல் நோக்கர்கள். ‘‘பெயரைச் சொன்னால் அவர்களுக்கு முக்கியத்துவம் கிடைத்துவிடும். பெயரை மறைத்து ‘3 முதல்வர்கள்’ என்றால் மக்கள் மனதில் சந்தேக விதை விழும். அதுதான் கணக்கு’’ என்கிறது கோட்டை வட்டாரங்கள்
இன்னும் கூடுதலாக தலைமைச் செயலக வட்டாரத்தில் நாம் அலசி ஆராய்ந்ததில், அந்த மூன்று நிழல் உருவங்களின் செயல்பாடுகள் துல்லியமாகத் தெரிகின்றன. 10.05.2026 அன்று சி.ஜோசப் விஜய் தமிழகத்தின் 22-வது முதல்வராகப் பதவியேற்ற நாள் முதல், கோட்டையின் அதிகார மையம் எங்கே இருக்கிறது என்பதை வைத்தே இந்தப் பட்டியல் உருவாகியிருக்கிறது.
1. ஜான் ஆரோக்கியசாமி – நிழல் மூளை டெல்லி வட்டாரங்கள் இவரை ‘சைலண்ட் ஆபரேட்டர்’ என்கின்றன. ஆந்திராவைப் பூர்வீகமாகக் கொண்டவர். ஐ-பேக் நிறுவனத்திலிருந்து வெளியேறிய 12 பேர் கொண்ட கோர் டீமுடன் தமிழகம் வந்தவர்.
தேர்தல் காலத்தில் இவரது வேலை என்ன தெரியுமா? தொகுதி வாரியான சாதி கணக்கு, பூத் லெவல் வாக்காளர் டேட்டா, தினசரி நரேட்டிவ் செட்டிங் என அத்தனையும் இவரது கன்ட்ரோலில்தான் இருந்தது. ‘‘விஜய் எங்கே பேச வேண்டும், என்ன பேச வேண்டும், எதைப் பேசக் கூடாது’’ என்பதை முடிவு செய்ததே இந்த டீம்தான்.
இப்போது ஆட்சியில்? தலைமைச் செயலகத்தில் அமைச்சர்களின் குறிப்பைவிட, ஜானின் குறிப்புக்குத்தான் முக்கியத்துவம் என்கிறார்கள் அதிகாரிகள். முதல்வரின் தினசரி அஜெண்டா, மாவட்ட ஆட்சியர்களுக்கான வீடியோ கான்பரன்ஸ் பாயின்ட்கள், ஏன்… அரசு விளம்பரங்களின் வாசகங்கள்கூட இவரது டேபிளைத் தாண்டித்தான் போகின்றன. ‘‘இவர் முதல்வர் அலுவலகத்தில் எந்தப் பதவியிலும் இல்லை. ஆனால், முதல்வர் அலுவலகமே இவரது பதவியாகிவிட்டது’’ என்கிறார் கோட்டை அதிகாரி ஒருவர் வேதனையுடன்.
2. கபில் சாஹு – வியூகச் சிற்பி , பத்து ஆண்டுகள், ஒன்பது மாநிலங்கள்… இதுதான் கபில் சாஹுவின் பயோடேட்டா. டெல்லியில் ஆம் ஆத்மிக்கு எதிரான வியூக வெற்றிக்குப் பிறகு, தன் முழு டீமுடன் சென்னையில் முகாமிட்டவர்.
‘‘விஜய் ரதம்’’ திட்டம் நினைவிருக்கிறதா? 234 தொகுதிகளையும் 60 நாட்களில் சுற்றிய அந்த மெகா திட்டத்தின் வரைபடம் இவரது மூளையில் உதித்ததுதான். இளைஞர் அணி திரட்டல், முதல் முறை வாக்காளர்களைக் குறிவைத்த ரீல்ஸ் யுத்தம், பூத் கமிட்டிகளை ஆப் மூலம் இணைத்தது என த.வெ.க-வின் முழு பிரசாரக் கட்டமைப்பையும் செதுக்கிய சிற்பி இவர்.
எடப்பாடி சொன்ன ‘தேர்தல் வியூக வகுப்பாளர்’ என்ற வார்த்தை நேரடியாக இவரைத்தான் குறிக்கிறது என்கிறது அ.தி.மு.க தரப்பு. இப்போது இவர் என்ன செய்கிறார்? அரசின் மக்கள் தொடர்புத் துறையின் ‘ஆலோசகர்’ என்ற பெயரில், அமைச்சர்களின் சுற்றுப்பயண அட்டவணையை இவர்தான் தீர்மானிக்கிறார் என்கிறது உள்விவரம். எந்தத் திட்டத்தை முதல்வர் அறிவிக்க வேண்டும், எந்தத் திட்டத்தை நிறுத்தி வைக்க வேண்டும் என்ற ‘பாலிசி பில்டர்’ வேலையையும் இவரது டீமே பார்க்கிறது.
3. ஆதவ் அர்ஜுனா – அதிகார மையம் , மற்ற இருவருக்கும் இவருக்கும் ஒரு வித்தியாசம் உண்டு. இவர் வியூக வகுப்பாளரிலிருந்து அமைச்சராக மாறியவர். தற்போது நெடுஞ்சாலைத் துறை அமைச்சர். வில்லிவாக்கம் எம்.எல்.ஏ.
தேர்தல் காலத்தில் பிரசார மேலாண்மைப் பொதுச்செயலாளராக இருந்தவர், இப்போது அமைச்சரவையின் ‘இரண்டாம் நிலை பவர் சென்டர்’. முதல்வர் விஜய்க்கு அடுத்து, அதிகாரிகள் நியமனம், டெண்டர் முடிவுகள், மாவட்டச் செயலாளர்கள் நியமனம் என அத்தனையிலும் இவரது கையெழுத்து இருக்கிறது என்கிறார்கள்.
இன்னொரு மேடையில் எடப்பாடி, ‘‘விஜய்க்கு ஆப்பு வைக்கப்போவதே ஆதவ் அர்ஜுனாவும், நிர்மல் குமாரும்தான்’’ என்று எச்சரித்ததும் இங்கே கவனிக்கத்தக்கது.
இவர்கள் தவிர, புஸ்ஸி ஆனந்த் (எ) என்.ஆனந்த், சி.டி.ஆர்.நிர்மல் குமார், டாக்டர் கே.ஜி.அருண்ராஜ் ஆகியோர் உள்வட்டத்தில் இருந்தாலும், எடப்பாடியின் கணக்கில் ‘மூன்று முதல்வர்கள்’ என்பது ஆட்சியை இயக்கும் இந்த வெளி மூளைகளையே குறிக்கிறது.
2026 தேர்தலில் 108 இடங்களை அள்ளி, தி.மு.க – அ.தி.மு.க என்ற இரு துருவங்களையும் சாய்த்த விஜய்யின் வெற்றிக்குப் பின்னால் இருந்தது இந்த வியூகக் குழுதான் என்பதில் மாற்றுக் கருத்து இல்லை.
ஆனால், கேள்வி இதுதான்… அவர்கள் இப்போதும் ஆட்சியை இயக்குகிறார்களா? இல்லை, விஜய் தன்னிச்சையாக முடிவெடுக்கத் தொடங்கிவிட்டாரா?
கோட்டை வட்டாரம் சொல்கிறது… ‘‘முதல்வர் நாற்காலியில் விஜய். ஆனால், ரிமோட் வேறு கைகளில்!’’, இது தொடரும்…