மத்திய சாலைப் போக்குவரத்து மற்றும் நெடுஞ்சாலைகள் அமைச்சகம் (MoRTH), மத்திய மோட்டார் வாகன விதிகளைத் திருத்தும் புதிய மசோதாவை வெளியிட்டுள்ளது. ஓட்டுநர் உரிம சேவைகளை மேலும் வெளிப்படையானதாகவும், எளிதில் அணுகக்கூடியதாகவும் மாற்றுவதே இதன் நோக்கம். ஓட்டுநர் உரிமங்களில் பெயர்கள், முகவரிகளை மாற்றுவதற்கான கட்டணத் தள்ளுபடியும் இதில் அடங்கும். பாதுகாப்பான ஓட்டுநர் தேர்வுகளில் தேர்ச்சி மதிப்பெண்களை உயர்த்துவது, ஆதார் அங்கீகாரத்திற்கான கட்டணத் தள்ளுபடி, விண்ணப்பங்களைச் செயலாக்குவதற்கான காலக்கெடுவை கடுமையாக்குவது போன்ற முன்மொழிவுகளையும் இந்த புதிய மசோதா கொண்டுள்ளது.
பாதுகாப்பான ஓட்டுநர் பயிற்சி டெஸ்டில் தேர்ச்சி பெறுவதற்கான குறைந்தபட்ச மதிப்பெண்களை 60%-லிருந்து 75%-ஆக உயர்த்த புதிய மசோதா முன்மொழிகிறது.
ஓட்டுநர்கள் போக்குவரத்து விதிகளை நன்கு புரிந்துகொள்ளும் வகையில், பாதுகாப்பான ஓட்டுநர் பயிற்சியின் கால அளவு குறைந்தபட்சம் 30 நிமிடங்களாக இருக்கும்.
ஒரு விண்ணப்பதாரர் ஆன்லைன் ஆதார் சரிபார்ப்பு மூலம் ஆன்லைன் ஓட்டுநர் உரிமச் சேவைகளைப் பெற்றால், கட்டணம் எதுவும் வசூலிக்கப்படாது. ஓட்டுநர் உரிமத்தில் பெயர், முகவரி, கைபேசி எண் மற்றும் பிற விவரங்களைப் புதுப்பிப்பதற்கான கட்டணங்களை விலக்குவதற்கு முன்மொழியப்பட்டுள்ளது.
பெயர் அல்லது முகவரி மாற்றங்களுக்கான விண்ணப்பங்களை அதிகாரிகள் 15 நாட்களுக்குள் அங்கீகரிக்கவோ அல்லது நிராகரிக்கவோ வேண்டும். விண்ணப்பத்தை நிராகரிப்பதற்கான தெளிவான காரணத்தையும் அவர்கள் வழங்க வேண்டும்.
முகவரி மாற்றத்திற்கான விண்ணப்பம் 30 நாட்களுக்கு எந்த முடிவும் எடுக்கப்படாமல் நிலுவையில் இருந்தால், அது அங்கீகரிக்கப்பட்டதாகக் கருதப்படும்.
ஆதார் அட்டை, பாஸ்போர்ட், வாக்காளர் அடையாள அட்டை, கல்விச் சான்றிதழ்கள் மற்றும் பிறப்புச் சான்றிதழ்கள் ஆகியவை அடையாளம், வயது மற்றும் முகவரிக்கான சான்றாகச் செல்லுபடியாகும். மின்சாரம் மற்றும் எரிவாயு கட்டண ரசீதுகள் 3 மாதங்களுக்கு மேல் பழமையானதாக இல்லாத பட்சத்தில், அவையும் முகவரிச் சான்றாகச் செல்லுபடியாகும். முன்பு முகவரி அல்லது வயதுக்கான சான்றாகப் பயன்படுத்தப்பட்ட எல்.ஐ.சி பாலிசிகள் இனி முகவரிச் சான்றாகக் கருதப்படாது.
உரிமம் புதுப்பித்தல், நகல் உரிமம் மற்றும் தனிப்பட்ட விவரங்களைப் புதுப்பித்தல் ஆகியவற்றுக்கு ஒரு ஒருங்கிணைந்த படிவம் இருக்கும், இதன் தரவுகள் நேரடியாக சாரதி இணையதளத்திலிருந்து பெறப்படும்.
ஒருவர் தனது ஓட்டுநர் உரிமத்தில் இருந்து ஒரு வாகன வகையை நிரந்தரமாக ஒப்படைக்க அல்லது நீக்க விண்ணப்பித்தால், அது 7 நாட்களுக்குள் நீக்கப்படும். ஆனாலும், ஒப்படைத்த பிறகு, அந்த நபர் அடுத்த ஒரு வருடத்திற்கு அந்த வகைக்கான புதிய பழகுநர் அல்லது ஓட்டுநர் உரிமத்தைப் பெறத் தகுதி பெறமாட்டார். ஆனாலும், இந்த விதிகள் இன்னும் நடைமுறைப்படுத்தப்படவில்லை. இது ஒரு மசோதா அறிவிப்பு ஆகும். இதுகுறித்த பொதுமக்களின் கருத்துக்களையும் ஆட்சேபனைகளையும் 30 நாட்களுக்குள் தெரிவிக்குமாறு கோரப்பட்டுள்ளது. கருத்துக்களைப் பெற்ற பிறகு, இந்த விதிகள் இறுதி செய்யப்பட்டு நாடு முழுவதும் செயல்படுத்தப்படும்.