90-களில் அயோத்திகுப்பம் வீரமணி போன்ற பெயர்களை தமிழ்நாடு மறந்திருக்காது. அதன்பிறகு காவல்துறையின் இரும்புக்கரம் ரவுடி கலாச்சாரத்தை பெருமளவு ஒடுக்கியது. தமிழகம் முழுக்க அறியப்படும் ரவுடி என்று யாரும் இல்லாத நிலை உருவானது. அரசியல்வாதிகளும் ரவுடிகளுடனான தொடர்பை மறைவாக வைத்துக்கொள்ளத் தொடங்கினர்.
ஆனால், சினிமா அந்த வெற்றிடத்தை நிரப்பியது. கத்தி தூக்குவதுதான் கெத்து, அரிவாள் சுழற்றுவதுதான் ஹீரோயிசம், பழிவாங்குவதுதான் வீரம் என்று திரையில் கற்றுக்கொடுக்கப்பட்டது. அதன் நீட்சியாக இன்று நம் கண்ணுக்குத் தெரியாமல் இன்ஸ்டாகிராமுக்குள் ஒரு இருண்ட உலகம் இயங்கிக் கொண்டிருக்கிறது. அதன் சமீபத்திய ரத்த சாட்சிதான் ‘சுள்ளான்’ மதன்.
யார் இந்த சுள்ளான் மதன்?
சிவகங்கை மாவட்டம், ஒக்கூர் அருகே உள்ள புதுப்பட்டி கிராமத்தைச் சேர்ந்தவன் மதன் என்கிற ‘சுள்ளான்’ மதன். வயது 26 தான். சினிமா ஸ்டைலில் முடி வளர்த்து, கூலிங் கிளாஸ் அணிந்து, இன்ஸ்டாகிராமில் “ஏரியாவுல நாங்கதான் கெத்து” என ரீல்ஸ் போட்டு 2K கிட்ஸ்களின் ஹீரோவாக வலம் வந்தவன்.
ஆனால் போலீஸ் ரெக்கார்டில் இவன் ஒரு பிரபல ஹிஸ்டரி ஷீட்டர். இவன் மீது கொலை, கொலை முயற்சி, வழிப்பறி, அடிதடி என 23-க்கும் மேற்பட்ட வழக்குகள். அதில் 6 கொலை வழக்குகள் என்கிறது காவல்துறை. சில தகவல்கள் 14 முதல் 30 வழக்குகள் வரை இருப்பதாகச் சொல்கின்றன
இன்ஸ்டாவில் இவனுக்கு பல ஆயிரம் ஃபாலோயர்கள். அத்தனை பேரும் ‘புள்ளிங்கோ கேங்’. ‘சுள்ளான் மதன் குரூப்ஸ்’, ‘மதன் கேங்’ என்று பெயர் வைத்துக்கொண்டு, ஹீரோயிச பாடல்களை வைத்து எடிட் செய்து ரீல்ஸ் போட்டு சுற்றித் திரிகிறார்கள். பல ரீல்ஸ்களில் ஆடைக்குள் இருந்து அருவாளை புடுங்கி சுழற்றுவது கையில் கத்தி சகிதம் போஸ். இவனுக்கு எதிரான குரூப்பும் இப்படித்தான். ரீல்ஸ் போடுவது, ஸ்லோமோஷனில் நடந்து வருவது, அரிவாளை சுழற்றுவதுதான் கெத்து என்று நினைப்பது மட்டும்தான் இரு தரப்புக்கும் இடையே உள்ள ஒரே ஒற்றுமை.
2024 இரட்டைக் கொலை: திருப்புமுனை!
சுள்ளான் மதன் பெயர் தமிழ்நாடு முழுக்க பரவக் காரணமான சம்பவம் 2024-ல் நடந்தது.
2024 ஜனவரியில், கல்லல் அருகே பனங்குடி கிராமத்தில் நடந்த மஞ்சுவிரட்டு போட்டியில் மாடு பிடிப்பதில் தகராறு. ஒருபக்கம் சுள்ளான் மதன் கும்பல்… இன்னொரு பக்கம் மதுரை வாடிப்பட்டி நாச்சிகுளத்தைச் சேர்ந்த அண்ணன்-தம்பிகளான ஜெயசூர்யா (24), சுபாஷ் (23).
அந்த மோதலின் தொடர்ச்சியாக, 2024 ஜூன் 30-ம் தேதி கொல்லங்குடியில் தோட்டத்தில் தூங்கிக் கொண்டிருந்த அந்த இரு சகோதரர்களும் கொடூரமாக வெட்டிக் கொலை செய்யப்பட்டனர். இந்த இரட்டைக் கொலை வழக்கில் முக்கிய குற்றவாளியாக கைது செய்யப்பட்டான் சுள்ளான் மதன். குண்டர் சட்டத்தின் கீழ் சிறையில் அடைக்கப்பட்டான்.
சுமார் 2 ஆண்டுகள் ராமநாதபுரம் சிறையில் இருந்த மதன், 2026 செப்டம்பர் 30 / அக்டோபர் 7-ல் ஜாமீனில் வெளியே வந்தான். வெளியே வந்தும் அடங்கவில்லை. “செத்து போனாலும் கெத்து போகாது” என அவனும் அவனது கைத்தடிகளும் இன்ஸ்டாவில் ரீல்ஸ் போட்டு, எதிர் தரப்பை சீண்டும் பதிவுகளை போட்டனர். இதுவே அவனுக்கு எமனாக முடிந்தது என்கிறது போலீஸ்.
ரத்தம் தெறித்த அக்டோபர் 18!
ஜாமீனில் வந்த 11-வது நாள்… அக்டோபர் 18-ம் தேதி, மேலமங்கலம் கிராமத்தில் நடந்த மஞ்சுவிரட்டு பார்க்க நண்பர்களுடன் சென்றான் மதன்.
அங்கே 4 டூவீலர்களில் அரிவாளுடன் வந்த 8 பேர் கும்பல், மதனையும் அவன் நண்பர்களையும் ஓட ஓட விரட்டியது. கரும்புக்காட்டுக்குள் புகுந்த மதனை சுற்றி வளைத்து சரமாரியாக வெட்டிச் சாய்த்தது. சம்பவ இடத்திலேயே ரத்த வெள்ளத்தில் பலியானான்.
இது 2024 இரட்டைக் கொலைக்கு பழிக்குப் பழியாக நடத்தப்பட்டதா என்ற கோணத்தில் போலீஸ் விசாரிக்கிறது. கைது செய்யப்பட்டவர்களில் ஒருவரான பாபுவின் உறவினர் ராஜேஷை (19), கடந்த ஆண்டு சுள்ளான் மதனின் நண்பர் அருண்பாண்டி கொலை செய்ததாகவும், அதன் பழிவாங்கலே இது என்றும் ஒரு தகவல் உலா வருகிறது.
கொலை நடந்த 12 மணி நேரத்திற்குள் 3 தனிப்படைகள் அமைத்து போலீஸ் வலை வீசியதில் திருமங்கலம் பிரதீப் (28), உடைகுளம் பாலமுருகன் (26), வேலாங்குளம் பாபு (22/23) ஆகிய 3 பேர் கைது செய்யப்பட்டுள்ளனர். மேலும் 5 பேர் தலைமறைவாக உள்ளனர். மொத்தம் 9 பேர் மீது வழக்குப் பதிவு.
இன்ஸ்டா ரவுடிகளின் கூடாரம்!
சிவகங்கை மாவட்டத்தில் மட்டும் கடந்த 2-3 வருடங்களில் 40 கொலைகள் நடந்திருக்கிறதாம். அதில் பல கொலைகள் பழிக்குப் பழி கொலைகள்தான். மதன் கொல்லப்பட்டதும் அப்படித்தான்.
மதனின் மரணத்திற்குப் பிறகு அவருடைய ஆட்கள் ரீல்ஸ் போட்டு சபதம் எடுக்கிறார்கள். அந்த ரீல்ஸில் இருப்பவனுக்கு மீசை கூட முளைக்கவில்லை. ஆனால் அவன் பழிவாங்குவேன் என்று சபதம் போடுகிறான்.
இன்ஸ்டாகிராம் ரவுடிகளின் கூடாரமாகிறது என கடந்த சில வருடங்களாகவே குற்றம் சாட்டப்படுகிறது. சென்னையில் ஒரு வட இந்திய வாலிபரை வெட்டி அதை ரீல்ஸாக போட்ட பிறகு, அதைப் பார்த்துதான் காவல்துறை அவர்களை கைது செய்தது குறிப்பிடத்தக்கது.
இதுபோன்ற கெத்து காட்டும் ரவுடிகளை இளைஞர்கள் மட்டுமல்ல, சிறுவர்களும் பாலோ செய்கிறார்கள். இவர்களுக்கு கிடைக்கும் வியூஸ், கமெண்ட்ஸ், ஆதரவு இவற்றையெல்லாம் பார்த்து ‘நாமும் இதுபோல செய்தால்தான் கெத்து’ என்று தடம் மாறுகிறார்கள். பதின்ம வயது பெண்களும் இவர்களை பாலோ செய்கிறார்கள் என்பது இன்னும் வேதனை.
நம் கண்முன்னே அடுத்த தலைமுறை சீரழிந்து வருகிறது. எடுத்ததற்கெல்லாம் வெட்டு, தொட்டதற்கெல்லாம் கொலை என்று மாறி வருகிறது. அதற்கு இன்ஸ்டா ரவுடித்தனம் தூண்டுகிறது.
காவல்துறை இதையெல்லாம் கண்டுகொள்கிறதா? இன்றைக்கு பல கொலைகளின் ஆரம்பம் சமூகவலைதளமாகத்தான் இருக்கிறது. அரசு இவர்களின் வேர்களை கண்டறிந்து, ஆரம்பத்திலேயே கட்டுப்படுத்த ஒரு குழு அமைக்க வேண்டும். சமூக அக்கறையும், எதிர்கால தலைமுறையினர் மீது அக்கறையும் உள்ள அரசாக இதற்கு நடவடிக்கை எடுக்க வேண்டும்.
சிவகங்கை சீமையில் இந்த மோதல் இத்துடன் முடியுமா… அல்லது இன்னொரு ரத்த அத்தியாயம் தொடங்குமா?
போலீஸ் கெடுபிடியால் அப்பகுதி முழுவதும் பதற்றம் நிலவுகிறது!