“காக்கிச் சட்டைக்குள் காதல் லீலைகள்… கம்பி எண்ண வைத்த வன்கொடுமை வழக்கு! மாஜி டி.எஸ்.பி ஜாபர் சித்திக்!”

மனைவி ஷோபனா அளித்த வன்கொடுமை, உடல் ரீதியான தாக்குதல் மற்றும் சாதி ரீதியிலான இழிவுபடுத்தல் புகாரின் அடிப்படையில், முன்னாள் அரக்கோணம் டி.எஸ்.பி. ஒய். ஜாபர் சித்திக்கை சிபிசிஐடி போலீசார் கைது செய்து வேலூர் மத்திய சிறையில் அடைத்துள்ளனர்.

அவர் மீது குடும்ப வன்முறை தொடர்பான குற்றச்சாட்டுகள் மட்டுமின்றி, அதிகார துஷ்பிரயோகம் மற்றும் சட்டவிரோதமாகப் பஞ்சாயத்து செய்து வழக்குகளை முடிக்க முயன்றதாக எழுந்துள்ள புகார்கள் குறித்தும் போலீசார் தீவிர விசாரணை நடத்தி வருகின்றனர்.

டி.என்.பி.எஸ்.சி. குரூப்-1 தேர்வில் வெற்றி பெற்று டி.எஸ்.பி.யானவர்

கிருஷ்ணகிரி மாவட்டத்தைச் சேர்ந்த ஜாபர் சித்திக், கடந்த 2020-ஆம் ஆண்டு தமிழ்நாடு அரசுப் பணியாளர் தேர்வாணையம் (டி.என்.பி.எஸ்.சி.) நடத்திய குரூப்-1 தேர்வில் வெற்றி பெற்று, நேரடியாகக் காவல் துறையில் டி.எஸ்.பி.யாகப் பொறுப்பேற்றார். தஞ்சாவூர் மாவட்டம் திருவிடைமருதூர் மற்றும் ராணிப்பேட்டை மாவட்டம் அரக்கோணம் ஆகிய இடங்களில் டி.எஸ்.பி.யாகப் பணியாற்றியுள்ளார்.

போட்டித் தேர்வில் வெற்றி பெற்று நேரடியாக உயர் காவல் அதிகாரியாகப் பொறுப்பேற்றதால், ஆரம்பத்தில் அவருக்குத் துறை ரீதியாக நல்ல பெயர் இருந்ததாகக் கூறப்படுகிறது. அரக்கோணத்தில் பணியாற்றிய அவர், 2026-ஆம் ஆண்டு ஜூலை 4-ஆம் தேதி ராமநாதபுரம் மாவட்டம் பரமக்குடிக்கு இடமாற்றம் செய்யப்பட்டார

மனைவி அளித்த வன்கொடுமைப் புகார்

ஜாபர் சித்திக் காதல் திருமணம் செய்துகொண்ட அவரது மனைவி ஷோபனா, கணவருக்குப் பல பெண்களுடன் திருமணத்துக்கு அப்பாற்பட்ட தொடர்புகள் இருப்பதாகக் குற்றம்சாட்டியுள்ளார். இதுகுறித்து அவரிடம் கேள்வி எழுப்பியபோது, ஜாபர் சித்திக் தன்னை உடல் ரீதியாகத் தாக்கிச் சித்ரவதை செய்ததுடன், சாதி ரீதியாகவும் இழிவுபடுத்திப் பேசியதாகப் புகார் தெரிவித்திருந்தார்

முதலில், ஷோபனா அரக்கோணம் காவல் நிலையத்தில் புகார் அளித்தார். ஆனால், அப்பகுதியிலேயே ஜாபர் சித்திக் டி.எஸ்.பி.யாகப் பணியாற்றியதால், புகார் மீது உரிய விசாரணை நடத்தப்படாமல் அதை மூடிமறைக்க முயற்சி நடந்ததாகக் குற்றச்சாட்டு எழுந்தது.

இதையடுத்து அதிருப்தியடைந்த ஷோபனா, தமிழகக் காவல் துறை தலைமை இயக்குநரிடம் (டி.ஜி.பி.) நேரடியாகப் புகார் அளித்தார். அதன் பின்னரே இந்த வழக்கு சிபிசிஐடி விசாரணைக்கு மாற்றப்பட்டது

பணியிடை நீக்கம்; சிபிசிஐடி சோதனை

ஷோபனா அளித்த புகாரைத் தொடர்ந்து, ஜாபர் சித்திக் கடந்த ஆகஸ்ட் 21-ஆம் தேதி பணியிடை நீக்கம் செய்யப்பட்டார். இதற்கு முன்னதாக, ஆகஸ்ட் 22-ஆம் தேதி சிபிசிஐடி போலீசார் பரமக்குடியில் உள்ள அவரது முகாம் அலுவலகத்தில் திடீர் சோதனை நடத்தினர்.

இந்தச் சோதனையின்போது, அவரது குடும்பப் பிரச்னைகள் மற்றும் சட்டவிரோத நடவடிக்கைகள் தொடர்பாக முக்கிய ஆவணங்களும் டிஜிட்டல் ஆதாரங்களும் சிக்கியதாகத் தகவல்கள் வெளியாகின. இந்த ஆதாரங்களின் அடிப்படையிலும் விசாரணை முன்னெடுக்கப்பட்டதாகக் கூறப்படுகிறது.

பல மணி நேர விசாரணைக்குப் பிறகு கைது

வழக்குத் தொடர்பாக சிபிசிஐடி போலீசார் நடத்திய சுமார் 7 முதல் 8 மணி நேர விசாரணைக்குப் பிறகு, ஜாபர் சித்திக் கைது செய்யப்பட்டார். பின்னர், அவர் வேலூர் மத்திய சிறையில் அடைக்கப்பட்டார்.

பி.என்.எஸ். மற்றும் எஸ்.சி./எஸ்.டி. சட்டத்தின் கீழ் வழக்கு

ஜாபர் சித்திக் மீது எஸ்.சி./எஸ்.டி. (வன்கொடுமைத் தடுப்பு) சட்டத்தின் கீழ் வழக்குப்பதிவு செய்யப்பட்டுள்ளது. இதனுடன், புதிய குற்றவியல் சட்டமான பாரதிய நியாய சன்ஹிதாவின் (பி.என்.எஸ்.) கீழ்க்கண்ட பிரிவுகளும் சேர்க்கப்பட்டுள்ளதாகத் தெரிவிக்கப்படுகிறது:

• பிரிவு 85: கணவர் அல்லது அவரது உறவினர்களால் மனைவிக்குக் கொடுமை இழைக்கப்படுவது தொடர்பான குற்றம்.
• பிரிவு 115(2): தன்னார்வமாகக் காயம் ஏற்படுத்துதல்.
• பிரிவு 351(2): குற்றவியல் மிரட்டல்.

மனைவி அளித்த புகாரின் அடிப்படையில் பதிவு செய்யப்பட்டுள்ள இந்த வழக்கில், சிபிசிஐடி போலீசார் தொடர்ந்து விசாரணை மேற்கொண்டு வருகின்றனர்.

அதிகார துஷ்பிரயோகம், கட்டப்பஞ்சாயத்து குறித்தும் புகார்கள்

அரக்கோணத்தில் டி.எஸ்.பி.யாகப் பணியாற்றிய காலத்தில், ஜாபர் சித்திக் பல்வேறு முறைகேடுகளில் ஈடுபட்டதாகவும் புகார்கள் எழுந்துள்ளன. குறிப்பாக, குழந்தைகளுக்கு எதிரான பாலியல் குற்றங்கள் மற்றும் பெண்களுக்கு எதிரான வன்கொடுமை வழக்குகளில் பாதிக்கப்பட்டவர்களுக்கு உரிய நீதி கிடைக்கச் செய்வதற்குப் பதிலாக, குற்றம்சாட்டப்பட்டவர்களிடம் ஆதாயம் பெற்றுக்கொண்டு, சட்டவிரோதமாகப் பஞ்சாயத்து நடத்தி வழக்குகளை முடிக்க முயன்றதாகக் குற்றச்சாட்டுகள் முன்வைக்கப்பட்டுள்ளன.

மேலும், அவரது மனைவி ஷோபனாவின் தாயார் அரக்கோணத்தில் தி.மு.க. கவுன்சிலராகப் பணியாற்றியவர் எனக் கூறப்படுகிறது. இந்த அரசியல் செல்வாக்கைப் பயன்படுத்தி ஜாபர் சித்திக் பல்வேறு முறைகேடுகளுக்குத் துணைபோனதாகவும் புகார்கள் எழுந்துள்ளன.

கடந்த சட்டமன்றப் பொதுத் தேர்தலின்போது, அரக்கோணம் தொகுதியில் தி.மு.க.வினருக்கு ஆதரவாக ஜாபர் சித்திக் ஒருதலைப்பட்சமாகச் செயல்பட்டதாக, அப்போதைய அ.தி.மு.க. வேட்பாளரும் முன்னாள் எம்.எல்.ஏ.வுமான சு. ரவி தேர்தல் அதிகாரியிடம் அதிகாரப்பூர்வமாகப் புகார் அளித்திருந்தார்.

பல்வேறு கோணங்களில் சிபிசிஐடி விசாரணை

மனைவி அளித்த புகாரின் அடிப்படையில் தொடங்கிய இந்த வழக்கில், குடும்ப வன்முறை மற்றும் சாதி ரீதியிலான இழிவுபடுத்தல் தொடர்பான குற்றச்சாட்டுகளுடன், ஜாபர் சித்திக் பணியில் இருந்தபோது அதிகாரத்தைத் தவறாகப் பயன்படுத்தியதாகக் கூறப்படும் புகார்கள் குறித்தும் சிபிசிஐடி போலீசார் விசாரணை நடத்தி வருகின்றனர்.

குறிப்பாக, பெண்கள் மற்றும் குழந்தைகளுக்கு எதிரான குற்ற வழக்குகளைக் கையாண்ட விதம், சட்டவிரோதப் பஞ்சாயத்து குற்றச்சாட்டுகள், அரசியல் செல்வாக்கைப் பயன்படுத்தியதாகக் கூறப்படும் புகார்கள் ஆகியவை தொடர்பாகவும் விசாரணை நடைபெற்று வருவதாகத் தெரிவிக்கப்படுகிறது.

போட்டித் தேர்வில் வெற்றி பெற்று நேரடியாக டி.எஸ்.பி.யாகப் பொறுப்பேற்ற இளம் காவல் அதிகாரி ஒருவர், மனைவி அளித்த வன்கொடுமைப் புகாரின் அடிப்படையில் கைது செய்யப்பட்டு வேலூர் மத்திய சிறையில் அடைக்கப்பட்டிருப்பது காவல் துறை வட்டாரத்தில் அதிர்வலைகளை ஏற்படுத்தியுள்ளது. அவர் மீது சுமத்தப்பட்டுள்ள குற்றச்சாட்டுகள் குறித்து தொடர்பான விசாரணை தொடர்ந்து நடைபெற்று வருகிறது.