அமெரிக்க அதிபர் டொனால்டு டிரம்ப், கூகுள் நிறுவனத்தின் தலைமைச் செயல் அதிகாரி சுந்தர் பிச்சையை “மான்ஸ்டர்” (Monster) என்று நகைச்சுவையாகப் பாராட்டிய சம்பவம் கவனம் பெற்றுள்ளது. வெள்ளை மாளிகையில் செயற்கை நுண்ணறிவு (AI) பாதுகாப்பு தொடர்பாக நடைபெற்ற உயர்மட்ட ஆலோசனைக் கூட்டத்திற்குப் பிறகு, வெஸ்ட் விங் பகுதியில் செய்தியாளர்களைச் சந்தித்தபோது இந்த சுவாரஸ்யமான உரையாடல் நடைபெற்றது.
சுந்தர் பிச்சையை மைக்கில் பேச அழைத்த டிரம்ப், அவர் பேசத் தொடங்குவதற்கு முன்பே, “இவர் ஒரு மான்ஸ்டர், ஆனால் யாருக்கும் தெரியாது” என்று நகைச்சுவையாகக் குறிப்பிட்டார். மேலும், “இவர் மிகப்பெரிய ஆளுமை. ஆனால் இவரை யாருக்கும் தெரியாது.
எவ்வளவு சிறந்த வாழ்க்கை! ஒரு மான்ஸ்டராக இருந்துகொண்டு, இந்த ஊடக நெருக்கடிகளை எதிர்கொள்ளாமல் இருப்பது எவ்வளவு நல்லது” என்றும் கூறினார். அரசியல்வாதிகள் அல்லது பிரபலங்களைப் போல ஊடக வெளிச்சத்தில் எப்போதும் இருக்காமல், உலகின் மிகப்பெரிய தொழில்நுட்ப நிறுவனங்களில் ஒன்றை வழிநடத்தும் சுந்தர் பிச்சையின் அமைதியான பொது வாழ்க்கையையே டிரம்ப் இவ்வாறு பாராட்டினார்.
இதைக் கேட்டு சிரித்த சுந்தர் பிச்சை, “நான் ஒரு மான்ஸ்டர் என்பதைவிட, இது எனக்கு ஒரு நல்ல டேக்லைனாக (Tagline) இருக்கும் என நம்புகிறேன்” என்று பதிலளித்தார். இதனால் அங்கிருந்தவர்கள் சிரித்தனர். பின்னர் செய்தியாளர்களைப் பார்த்த டிரம்ப், “நீங்கள் அவரைப் பற்றி தெரிந்துகொள்ள வேண்டியதெல்லாம் ஒன்றுதான் — சுந்தர்ர்ர் (SUNDARRR)! சுந்தர் என்பதுதான் அவரது பெயர்” என்று அவரது பெயரை அழுத்தமாகக் குறிப்பிட்டார்.
டிரம்ப் சுந்தர் பிச்சையைப் பாராட்டியபோது, அங்கிருந்த ஒரு வெளிநாட்டு செய்தியாளர், “உங்கள் பெயர் என்ன? (What’s your name?)” என்று சத்தமாகக் கேட்டார். உடனே குறுக்கிட்ட டிரம்ப், “அவரைப் பற்றி நீங்கள் வேறு எதுவும் தெரிந்துகொள்ள வேண்டியதில்லை… சுந்தர்ர்ர்! சுந்தர் என்பதுதான் அவரது பெயர்” என்று பதிலளித்தார். உலகமே உற்றுநோக்கும் செய்தியாளர் சந்திப்பில் திடீரென “மான்ஸ்டர்” என்று அழைக்கப்பட்டதால் சுந்தர் பிச்சை ஒரு கணம் தர்மசங்கடத்துடன் புன்னகைத்தாலும், தனது நகைச்சுவையான “டேக்லைன்” பதிலால் சூழலை சாதுரியமாகச் சமாளித்தார்.
இந்த முக்கியக் கூட்டத்தில் சுந்தர் பிச்சை மட்டுமின்றி, எலான் மஸ்க், மார்க் ஜுக்கர்பெர்க், என்விடியா சிஇஓ ஜென்சன் ஹுவாங், மைக்ரோசாப்ட் சிஇஓ சத்யா நாதெல்லா, ஓபன்ஏஐ அமைப்பின் கிரெக் ப்ராக்மேன், ஆன்த்ரோபிக் சிஇஓ டேரியோ அமோடெய் உள்ளிட்ட உலகின் முன்னணி டெக் தலைவர்கள் பங்கேற்றனர். இவர்களை டிரம்ப் “ஹை ஐக்யூ குரூப்” (High IQ Group) என்று வர்ணித்ததுடன், “உலகிலேயே மிகப்பெரிய ஆளுமைகள் இவர்கள். ஆனால் ஊடகங்களுக்கு இவர்களில் யாரையுமே சரியாகத் தெரியாது” என்றும் கிண்டலாகக் கூறினார்.
கூட்டத்தில் மேம்பட்ட AI அமைப்புகளை முறைப்படுத்துதல், கண்காணித்தல் மற்றும் அவற்றின் பாதுகாப்பை உறுதி செய்தல் உள்ளிட்ட முக்கிய அம்சங்கள் குறித்து விவாதிக்கப்பட்டன. இதன் ஒரு பகுதியாக, அட்வான்ஸ்டு AI சிஸ்டம்களின் பாதுகாப்பு தொடர்பாக புதிய தன்னார்வ ஒப்பந்தத்தில் (Voluntary Agreement on AI Safety) டிரம்ப் நிர்வாகமும் முன்னணி டெக் நிறுவனங்களும் உடன்பட்டுள்ளன.
கூகுள், மெட்டா உள்ளிட்ட நிறுவனங்கள் புதிய AI தயாரிப்புகளை பொதுமக்களுக்கு வெளியிடுவதற்கு முன், நிறுவனத்திற்குள்ளும் வெளிப்புற அமைப்புகள் மூலமும் கடுமையான பாதுகாப்பு தணிக்கை மற்றும் சோதனைகளை மேற்கொள்ள ஒப்புக்கொண்டுள்ளன.
இந்த ஒப்பந்தத்தை வரவேற்ற சுந்தர் பிச்சை, தொழில்நுட்பத் துறையைப் பொறுத்தவரை இது வரலாற்றுச் சிறப்புமிக்க தருணம் என்று கூறினார். AI மூலம் நாட்டின் ஜிடிபி (GDP) வளர்ச்சி உள்ளிட்ட பல்வேறு நன்மைகள் கிடைக்கக்கூடும் என்றாலும், அதில் உள்ள ஆபத்துகளையும் கையாள வேண்டும் என்று தெரிவித்தார்.
நிறுவனத்தின் நிதிப் பரிவர்த்தனைகளை எவ்வாறு கட்டுப்பாட்டுடன் கண்காணிக்கிறோமோ, அதேபோன்ற சிறந்த நடைமுறைகளை ‘சூப்பர் இன்டெலிஜென்ஸ்’ (Superintelligence) தொழில்நுட்ப உருவாக்கத்திலும் கொண்டு வர வேண்டும் என்றும் அவர் விளக்கினார்.
டெக் நிறுவனங்கள் தாங்களாகவே முன்வந்து, AI தொழில்நுட்பத்தை சுயக்கட்டுப்பாட்டுடன் (Self-police) பாதுகாப்பாக வளர்க்க வேண்டும் என்று டிரம்ப் வலியுறுத்தினார். இந்த உடன்பாட்டுக்கு டிரம்ப் நிர்வாகம் “சூப்பர் இன்டெலிஜென்ஸ் மீதான வெள்ளை மாளிகை உடன்படிக்கை” (White House Accord on Super Intelligence) என்று பெயரிட்டுள்ளது. AI-யின் அடுத்த கட்டமான ‘சூப்பர் இன்டெலிஜென்ஸ்’ தொடர்பான பாதுகாப்பு மற்றும் கண்காணிப்புக்கு இதில் முக்கியத்துவம் அளிக்கப்பட்டுள்ளது.
சுந்தர் பிச்சை ஒப்பந்தத்தை வரவேற்ற நிலையில், ஆன்த்ரோபிக் சிஇஓ டேரியோ அமோடெய் எச்சரிக்கையான தொனியில் பேசினார். AI தொழில்நுட்பத்தில் மிகப்பெரிய ஆபத்துகள் இருப்பதாகவும், அவற்றை எவ்வாறு கையாள்வது என்பது குறித்த விவாதங்கள் தொடர்ந்து நடைபெற்று வருவதாகவும் அவர் குறிப்பிட்டார்.
இதற்கிடையே, அமெரிக்காவில் AI உள்கட்டமைப்பை மேம்படுத்தவும், தரவு மையங்களை அமைக்கவும் கூகுள் நிறுவனம் 250 பில்லியன் டாலர் வரை முதலீடு செய்யத் தயாராக இருப்பதாக இந்தச் சந்திப்பின்போது விவாதிக்கப்பட்டது. மேடையில் டிரம்ப் சுந்தர் பிச்சையை “மான்ஸ்டர்” என்று பாராட்டியபோது, வழக்கமாக ஊடகங்களில் அதிகம் பேசும் எலான் மஸ்க் மற்றும் மார்க் ஜுக்கர்பெர்க் ஆகியோர் அமைதியாக இந்த நகைச்சுவையான உரையாடலைப் பார்த்துக்கொண்டிருந்தனர்.
சுந்தர் பிச்சையின் அசாத்திய தொழில்நுட்ப வெற்றியையும், பொதுவெளியில் அதிக விளம்பரம் இல்லாமல் அமைதியாக செயல்படும் அவரது ஆளுமையையும் சுட்டிக்காட்டியே டிரம்ப் “டெக் மான்ஸ்டர்” என்ற வார்த்தையைப் பயன்படுத்தியுள்ளார். டிரம்ப்–சுந்தர் பிச்சை இடையேயான இந்த நகைச்சுவையான உரையாடல் இடம்பெற்ற வீடியோ தற்போது சமூக வலைதளங்களில் வைரலாகி வருகிறது.