மும்பையில் அமைந்துள்ள நீதா முகேஷ் அம்பானி கலாச்சார மையம் (NMACC) தனது வெற்றிகரமான 3 ஆண்டுகளை நிறைவு செய்துள்ளது. இந்தியக் கலை, கலாச்சாரம் மற்றும் பாரம்பரியத்தை உலக அரங்கிற்கு கொண்டு செல்லும் நோக்கில் தொடங்கப்பட்ட இந்த மையம், குறுகிய காலத்திலேயே கலைத்துறையில் பல்வேறு சாதனைகளைப் படைத்துள்ளது.
NMACC-ன் 3 ஆண்டு பயணத்தில் இதுவரை 3,500-க்கும் மேற்பட்ட சர்வதேச மற்றும் இந்திய கலை நிகழ்ச்சிகள், நாடகங்கள் அரங்கேற்றப்பட்டுள்ளன. உலகத் தரம் வாய்ந்த மேடைகளில் 10 ஆயிரத்திற்கும் மேற்பட்ட உள்நாட்டு மற்றும் வெளிநாட்டு கலைஞர்கள் தங்களது திறமைகளை வெளிப்படுத்த வாய்ப்பு வழங்கப்பட்டுள்ளது. மேலும், கடந்த 3 ஆண்டுகளில் சுமார் 25 லட்சம் பார்வையாளர்கள் NMACC-க்கு வருகை தந்து பல்வேறு நிகழ்ச்சிகளை கண்டு ரசித்துள்ளனர்.
NMACC தனது 3 ஆண்டுகளை நிறைவு செய்ததை முன்னிட்டு, அதன் நிறுவனர் நீதா அம்பானி சமூக வலைதளமான Facebook மூலம் இந்த சாதனையைப் பகிர்ந்துள்ளார். 3-ஆம் ஆண்டு கொண்டாட்டத்தில் உரையாற்றிய அவர், இந்திய கலாச்சாரத்தில் ‘மூன்று’ என்ற எண்ணின் ஆன்மீக முக்கியத்துவத்தை குறிப்பிட்டு, இந்தியக் கலைகளை சர்வதேச அளவில் கொண்டு சேர்க்கும் பயணம் தொடர்ந்து நடைபெறும் என உறுதியளித்தார்.
இந்த விழாவின் போது இந்திய இளைஞர்களுக்காகவும் முக்கிய அறிவிப்பு வெளியிடப்பட்டது. இளம் திறமையாளர்களை ஊக்குவிக்கும் வகையில், பள்ளிகள் மற்றும் கல்லூரிகளுக்கு இடையே நடனம், நாடகம், இசை மற்றும் ஓவியம் உள்ளிட்ட கலைப் போட்டிகள் நடத்தப்பட உள்ளன. மேலும், மாணவர்களுக்காக நேரடிப் பயிற்சிப் பட்டறைகள் மற்றும் இன்டர்ன்ஷிப் வாய்ப்புகளும் NMACC மூலம் வழங்கப்படும் என அறிவிக்கப்பட்டுள்ளது.
NMACC-ன் 3-வது ஆண்டு சாதனையின் மற்றொரு முக்கிய அம்சமாக, அதன் முதல் பிரமாண்ட நாடகத் தயாரிப்பான ‘சிவிலைசேஷன் டு நேஷன்’ (Civilization to Nation) மற்றும் இந்தியாவின் பாரம்பரிய கைத்தறி கலைகளைப் போற்றும் ‘ஸ்வதேஷ்’ (Swadesh) ஃபேஷன் ஷோ ஆகியவை அமெரிக்காவின் நியூயார்க்கில் உள்ள புகழ்பெற்ற லிங்கன் சென்டரில் அரங்கேற்றத் திட்டமிடப்பட்டுள்ளன. இதன் மூலம் இந்தியக் கலை சர்வதேச மேடைக்கு நேரடியாக எடுத்துச் செல்லப்படுகிறது.
இந்த நாடகத்திற்காக இந்தியாவின் முன்னணி ஆடை வடிவமைப்பாளர்கள் மற்றும் கைவினைஞர்கள் குழு சுமார் ஒரு வருடம் உழைத்து 1,200-க்கும் மேற்பட்ட பிரத்யேக ஆடைகளை உருவாக்கியுள்ளது. இந்திய நாடக வரலாற்றில் ஒரே நிகழ்ச்சிக்காக இவ்வளவு அதிகமான ஆடைகள் வடிவமைக்கப்படுவது இதுவே முதல்முறை என தெரிவிக்கப்பட்டுள்ளது.
3-ஆம் ஆண்டு கொண்டாட்டத்தின் முக்கிய நிகழ்வாக, ஏப்ரல் 3 மற்றும் 4 ஆகிய தேதிகளில் பிரபல இசைக்கலைஞரும் கிராமி விருது வென்றவருமான சங்கர் மகாதேவன் மற்றும் பிரபல பாடகி ஸ்ரேயா கோஷல் இணைந்து வழங்கிய பிரமாண்ட இசை நிகழ்ச்சி நடைபெற்றது. பாலிவுட்டின் கிளாசிக் பாடல்கள் முதல் சமகால இசை வரை பல்வேறு பாடல்கள் இடம்பெற்ற இந்த நிகழ்ச்சி, ரசிகர்களை வெகுவாக கவர்ந்தது.
இந்த ஆண்டு விழாவின் கருப்பொருளாக “ஏக் சுர் – பாரத் கி ஆவாஸ்” இடம்பெற்றது. “இந்தியா பல மொழிகளில் பேசினாலும், ஒரே இசையில்தான் பாடுகிறது” என்ற கருத்தை மையமாகக் கொண்டு நிகழ்ச்சிகள் நடத்தப்பட்டன. சங்கர்–இசான்–லாய் கூட்டணியுடன் ஸ்ரேயா கோஷல் இணைந்து பாலிவுட்டின் கிளாசிக் மற்றும் ஆன்மீகப் பாடல்களைப் பாடி பார்வையாளர்களை இசை வெள்ளத்தில் ஆழ்த்தினர்.
விழாவில் நீதா அம்பானி அணிந்திருந்த ஆடையும் அனைவரது கவனத்தையும் ஈர்த்தது. பாரம்பரிய கைவினைத்திறனை பிரதிபலிக்கும் வகையில் சிவப்பு நிறக் கலவையுடன் கூடிய பிரத்யேக தங்க நிற பட்டுப் புடவையை அணிந்து அவர் கலந்துகொண்டார். இதன் மூலம் இந்தியாவின் பாரம்பரிய நெசவுக் கலைக்கும் அவர் பெருமை சேர்த்தார்.
கடந்த 3 ஆண்டுகளில் NMACC-ல் அரங்கேறிய நிகழ்ச்சிகள் இந்தி மற்றும் ஆங்கிலத்துடன் மட்டுப்படுத்தப்படாமல், 15-க்கும் மேற்பட்ட இந்திய மற்றும் சர்வதேச மொழிகளில் நடத்தப்பட்டுள்ளன. இதன் மூலம் மொழி மற்றும் கலாச்சார பன்முகத்தன்மையை இந்த மையம் தொடர்ந்து வெளிப்படுத்தி வருகிறது.
3-வது ஆண்டு விழாவில் பல முன்னணி பாலிவுட் நட்சத்திரங்கள் மற்றும் உலகளாவிய கலைஞர்கள் கலந்துகொண்டு வாழ்த்துகளைத் தெரிவித்தனர். வழக்கமாக சர்வதேச விழாக்களில் ரெட் கார்பெட் வரவேற்பு இடம்பெறும் நிலையில், இந்த ஆண்டு விழாவுக்காக பிரத்யேகமாக ‘பிங்க் கார்பெட்’ அமைக்கப்பட்டது. இதில் பாலிவுட் நடிகர் சல்மான் கான், சித்தார்த் மல்ஹோத்ரா, கியாரா அத்வானி மற்றும் கிரிக்கெட் ஜாம்பவான் சச்சின் டெண்டுல்கர் தனது குடும்பத்தினருடன் கலந்துகொண்டனர்.
மேலும், உலகப் புகழ்பெற்ற வெனிஸ் பினாலே கலைக் கண்காட்சியில் ‘இந்தியா பெவிலியன்’ வரலாற்றுச் சிறப்புமிக்க வகையில் மீண்டும் இடம்பெற்றதை கௌரவிக்கும் விதமாக, நீதா அம்பானி சிறப்பு இரவு விருந்தையும் ஏற்பாடு செய்தார். இதன் மூலம் இந்தியக் கலைஞர்கள் மற்றும் கைவினைஞர்களின் திறமைகள் சர்வதேச அளவில் முன்னிலைப்படுத்தப்பட்டன.
NMACC-க்கு வரும் பார்வையாளர்களின் அனுபவத்தை மேம்படுத்தும் வகையிலும் பல்வேறு புதிய தொழில்நுட்பங்கள் பயன்படுத்தப்படுகின்றன. குறிப்பாக, இடைவேளையின்போது கஃபேக்களில் நீண்ட வரிசையில் காத்திருப்பதைத் தவிர்க்கும் வகையில், பார்வையாளர்கள் வரிசையில் நிற்கும்போதே ஆர்டர்களைத் தயாரிக்கும் தொழில்நுட்பம் அறிமுகப்படுத்தப்பட்டுள்ளது. இதனால் கவுண்டருக்குச் சென்ற உடனேயே காபி மற்றும் ஸ்நாக்ஸ் உள்ளிட்ட உணவுப் பொருட்களைப் பெற முடியும்.
NMACC-ன் பிரமாண்ட கட்டிடத்திற்குள் நுழையும் போதே பார்வையாளர்களை வரவேற்கும் அமைதியான நறுமணமும், அங்கு அமைந்துள்ள தெய்வீகமான ராதா-கிருஷ்ணர் கோவிலும் சிறப்பு ஈர்ப்பாக விளங்குகின்றன.
இந்தியக் கலை, கலாச்சாரம் மற்றும் பாரம்பரியத்தை உலக அரங்கில் தொடர்ந்து முன்னெடுத்துச் செல்லும் நோக்கில் தொடங்கப்பட்ட NMACC, தனது 3 ஆண்டு பயணத்தில் பல்வேறு சாதனைகளைப் படைத்துள்ள நிலையில், வரும் ஆண்டுகளிலும் சர்வதேச அளவில் இந்தியக் கலையின் பெருமையை நிலைநாட்டும் பயணத்தைத் தொடரும் என எதிர்பார்க்கப்படுகிறது.